এটা সময়ত জাতীয় অন্দোলনক সন্মুখৰ পৰা নেতৃত্ব দিয়া ‘সৰ্বা দা’ অৰ্থাৎ সদৌ অসম ছাত্ৰ সন্থাৰ একালৰ সভাপতি সৰ্বানন্দ সোণোৱালৰ পদূলিত আজি গৰজি উঠিল খোদ সদৌ অসম ছাত্ৰ সন্থা আৰু ২৮ টা জাতীয়-জনগোষ্ঠীয় সংগঠনে। আজিৰ এই প্ৰতিবাদৰ বিষয় আছিল নাগৰিকত্ব সংশোধনী বিধেয়কৰ বিৰোধিতা।
সৰ্বানন্দ সোণোৱাল আজি ৰাজ্যৰ মুখ্য মন্ত্ৰী। কিন্তু জাতীয় সংগঠনৰ মজিয়াৰ পৰা জাতিৰ সংকটৰ সময়ত নেতৃত্ব দি ‘জাতীয় নায়ক’ৰ আখ্যা লাভ কৰা মুখ্য মন্ত্ৰী সোণোৱাল আজি নিমাত। সেয়ে ‘জাতীয় নায়ক’ক খিলঞ্জীয়াৰ অস্তিত্বৰ প্ৰশ্ন সোঁৱৰাবলৈ আজি দিচপুৰ পালেগৈ জাতীয়-জনগোষ্ঠীয় দল-সংগঠন সমুহ।
কেৱল মুখ্য মন্ত্ৰীয়েই নহয়, জাতীয় সংগঠনৰ মজিয়াৰ পৰা আহি আজি দিচপুৰত শাসনৰ গাদীত আছে বহুকেইজন মন্ত্ৰী আৰু বিধায়ক।
নাগৰিকত্ব সংশোধনী বিধেয়কক লৈ অসমৰ খিলঞ্জীয়া জাতি-জনগোষ্ঠীৰ ৰাইজে ধাৰাবাহিকভাৱে প্ৰতিবাদ কৰি থকাৰ পাছতো জাতীয় সংগঠনৰ মজিয়াৰ পৰা গৈ দিচপুৰ দখল কৰি খিলঞ্জীয়া ৰাইজৰ বিপৰীতে অৱস্থান কৰা জনপ্ৰতিনিধি সকলক উদ্দেশ্যি গ্ৰহণ কৰিলে ‘সকীয়নি বিক্ষোভ’।
দিচপুৰৰ গনেশ মন্দিৰৰ সমীপৰ গনেশ উদ্যানত সমবেত হৈ আছুসহ ২৮ জাতীয় জনগোষ্ঠীয় সংগঠনে অনুষ্ঠিত কৰিলে এখন প্ৰতিবাদী সভা। ইয়াৰ পাছতে দিচপুৰ লাষ্টগেইট অভিমুখে প্ৰতিবাদী সমদল উলিয়াই সহস্রাধিক প্ৰতিবাদকাৰীয়ে।
প্ৰতিবাদী সভাত ভাষণ প্ৰদান কৰি আছুৰ মুখ্য উপদেষ্টা ড০ সমুজ্বল কুমাৰ ভট্টাচাৰ্যই একালৰ তেওঁৰ সতীৰ্থ মুখ্য মন্ত্ৰী সৰ্বানন্দ সোণোৱালক উদ্দেশ্যি কয়, ‘’সমগ্ৰ অসমৰ অঞ্চলে অঞ্চলে আন্দোলন চলিল। চানমাৰিৰ খেলপথাৰ, লতাশিল খেলপথাৰতো প্ৰতিবাদ হ’ল। সন্মানীয় মুখ্য মন্ত্ৰী সৰ্বানন্দ সোণোৱাল, আৰু মন্ত্ৰী-বিধায়কসকল আজি আমি সকলো খিলঞ্জীয়া, ভূমিপুত্ৰসকল দিচপুৰ পাইছো। আজি তেওঁলোক (জনপ্ৰতিনিধিসকল) দিচপুৰত বহি আছে, কিন্তু আমাৰ সকীয়নী যদি নুশুনে তেওঁলোকৰ চলাফুৰা বন্ধ হৈ যাব।‘
তেওঁ লগতে সৰ্বানন্দ সোণোৱালে ‘জাতিধবংসী’ বিধেয়কৰ সপক্ষে আছে নে নাই সেই কথা স্পষ্ট কৰিবলৈও দাবী জনায়।
‘’মুখ্য মন্ত্ৰী ডাঙৰীয়া, আপুনি কোৱা অসমৰ ৰাইজৰ স্বাৰ্থ বিঘ্নিত হ’ব পৰা কাম আমি নকৰো বোলা বাক্যশাৰী আমি শুনিলো কিন্তু আমি আশ্বস্ত হোৱা নাই। আপুনি ৰাইজক শংকিত নহ’বলৈ কৈছে। কিন্তু আমি দিচপুৰত থিয় হৈ কৈছো অসমৰ খিলঞ্জীয়া মানুহ শংকিত হৈছো’’,- এইদৰে কয় সমুজ্বল ভট্টাচাৰ্যই।
একেদৰে, অসমৰ খিলঞ্জীয়া ৰাইজৰ হৈ জনপ্ৰতিনিধি সকলক নাগৰিকত্ব সংশোধনী বিধেয়কৰ সপক্ষে ওকালতি নকৰিবলৈ সকীয়াই দিয়ে নিখিল বড়ো ছাত্ৰ সন্থাৰ সভাপতি প্ৰমোদ বড়োৱে।
বড়োৱে কয়, ‘’আপোনালোকে ৰাজনৈতিক স্বাৰ্থ সিদ্ধিৰ বাবে যদি দিল্লীৰ ওচৰত দূৰ্বল হৈছে হৈ থাকক, কিন্তু অসমৰ ৰাইজক দূৰ্বল বুলি নাভাবিব। যদি দিল্লীৰ লগত যুঁজ দিব নোৱাৰো বুলি ভাবি লৈছে তেনেহ’লে মনে মনে থাকক। কিন্তু অসমীয়াৰ হৈ বিধেয়কখনৰ সপক্ষে ওকালতি কৰিবলৈ আপোনালোকক অসমৰ খিলঞ্জীয়া ৰাইজে লাইচেন্স দিয়া নাই।‘’
নাগৰিকত্ব সংশোধনী বিধেয়কৰ প্ৰৱৰ্তনৰে কেন্দ্ৰীয় চৰকাৰে কৰা ষড়যন্ত্ৰৰ বিপক্ষে যুঁজিবলৈ সুত্ৰ বিচাৰি নোপোৱাটো অসম চৰকাৰৰ মন্ত্ৰী-বিধায়কসকলৰ অসফলতা আৰু অজ্ঞানতাৰহে পৰিচায়ক বুলি প্ৰমোদ বড়োৱে মন্তব্য কৰে।
তেওঁ লগতে মুখ্য মন্ত্ৰীক সকীয়াই দি তেওঁ কয়, ‘’আপুনি আগ্নেয়গিৰিৰ ওপৰত থিয় হৈ আছে। ব্ৰহ্মপুত্ৰ পানীৰ তলত কিমান ধাৰ আছে সেয়া ওপৰত চালে দেখা নাপাব।‘’
জাতীয় সংগঠনৰ পৰা গৈ দিচপুৰত শাসনৰ গাদী দখল কৰা জনপ্ৰতিনিধিসকলে আজি অসমৰ জাতি-ধৰ্মৰ ভেদা-ভেদহীন পৰিবেশৰ কথা পাহৰি ধৰ্মীয় মেৰুকৰণেৰে সংখ্যাগৰিষ্ঠতাৰ ৰাজনীতি কৰিবলৈ চেষ্টা কৰিছে বুলিও মন্তব্য কৰে নিখিল ৰাভা ছাত্ৰ সন্থাৰ সভাপতি ৰমেণ সিং ৰাভাই। তেওঁ লগতে আগন্তুক পঞ্চায়ত নিৰ্বাচনত বিজেপিক উচিত প্ৰত্যুত্বৰ দিবলৈও আহ্বান জনায়।
আজিৰ এই সকীয়নী বিক্ষোভতে বিজেপি বিধায়ক শিলাদিত্য দেব, এটা বাঙালী সংগঠনৰ নেতা সুকুমাৰ বিশ্বাসকে ধৰি কেইবাজনেও বিতৰ্কিত মন্তব্য কৰি থকাৰ পাছতো চৰকাৰে কোনো ব্যৱস্থা গ্ৰহণ নকৰাক লৈও বহুকেইজন জাতীয়-জনগোষ্ঠীয় নেতাই অসন্তুষ্টি প্ৰকাশ কৰে।
একে প্ৰসংগতে আলোচনাপন্থী আলফা নেতা মৃনাল হাজৰিকা আৰু জীতেন দত্তই খিলঞ্জীয়া ৰাইজৰ হৈ মাত মতাৰ বাবেই গ্ৰেপ্তাৰ কৰি জেললৈ প্ৰেৰণ কৰা কাৰ্যক ধিক্কাৰ দিয়ে আছুৰ সভাপতি দীপাংক কুমাৰ নাথে।
এই সকীয়নী বিক্ষোভত মিচিং, কাৰ্বি, তিৱা, গাৰো, টাই আহোম, মৰাণ, মটক, মদাহী, চাহ জনগোষ্ঠীকে ধৰি ২৮ টা জনগোষ্ঠীৰ সংগঠনৰ উপৰিও সদৌ অসম কৰ্মচাৰী পৰিষদ, সদৌ অসম কেন্দ্ৰীয় আৰু অৰ্ধকেন্দ্ৰীয় কৰ্মচাৰী পৰিষদকে ধৰি কেইবাটাও সংগঠনে অংশ গ্ৰহণ কৰে।
