অসমৰ কোচ ৰাজবংশীকে ধৰি ছয় জনগোষ্ঠীক জনজাতিকৰণৰ পৰা বঞ্চিত কৰি ৰাজনৈতিক দলসমূহে ভূমিপত্ৰ জাতি-জনগোষ্ঠীসমূহৰ আৱেগ-অনুভূতিক লৈ খেলা কৰি অহাৰ অভিযোগ উত্থাপন কৰিছে সদৌ অসম কোচ ৰাজবংশী সন্মিলনীয়ে।
সন্মিলনীয়ে লগতে নাগৰিকত্ব সংশোধনী বিধেয়ক-২০১৬’ৰ জৰিয়তে সৰু-বৰ জাতি-জনগোষ্ঠীসমূহৰ ধ্বংস কৰি বিজেপি নোতৃত্বাধীন কেন্দ্ৰ আৰু ৰাজ্য চৰকাৰে অসমক বিদেশীৰ চৰণীয়া পথাৰ কৰিবলৈ ভয়ংকৰ ষড়যন্ত্ৰ অব্যাহত ৰখাৰো অভিযোগ তুলিছে।
সেয়েহে, এই সকলোৰে বিৰুদ্ধে সদৌ অসম কোচ ৰাজবংশী সন্মিলনীয়ে অহা ১২ নৱেম্বৰত সমগ্ৰ ৰাজ্যজুৰি অৱস্থান ধৰ্মঘট কাৰ্যসূচীৰে তীব্ৰ প্ৰতিবাদ সাব্যস্ত কৰাৰ সিদ্ধান্ত গ্ৰহণ কৰিছে।
সন্মিলনীৰ সভাপতি বীৰেশ্বৰ শইকীয়া আৰু সাধাৰণ সম্পাদক ৰণজিৎ কুমাৰ ৰায়ে সমগ্ৰ ৰাজ্যৰ কোচ ৰাজবংশী জনসাধাৰণক এই প্ৰতিবাদী কাৰ্যসূচী সফল কৰি তুলিবলৈ আহ্বান জনাইছে। তদুপৰি, সন্মিলনীৰ অন্তৰ্গত ৩৫খন জিলা সমিতিয়ে জিলা সদৰসমূহত ১২ নৱেম্বৰৰ পুৱা দহ বজাৰ পৰা অৱস্থান ধৰ্মঘট কাৰ্যসূচী ৰূপায়ণ কৰিব বুলি নেতাদ্বয়ে জানিবলৈ দিয়ে।
আনহাতে, বিজেপি দল তথা চৰকাৰে কোচ ৰাজবংশীসকলক জনজাতিৰ মৰ্যাদা দিয়াৰ প্ৰতিশ্ৰুতি দিও প্ৰবঞ্চনা কৰাৰ সমুচিত প্ৰত্যুত্তৰ দিবলৈও সাজু হৈছে সদৌ অসম কোচ ৰাজবংশী সন্মিলনীয়ে। তদুপৰি, মুখ্যমন্ত্ৰী সোণোৱালে কোচ ৰাজবংশীসকলৰ মাজত বিভাজনৰ ৰাজনীতি কৰি জনগোষ্ঠীটোক উন্নয়নৰ পৰা বঞ্চিত কৰি অহাৰ অভিযোগো উত্থাপন কৰিছে সন্মিলনীয়ে।
কোচ ৰাজবংশীসকলৰ লগতে ছয় জনগোষ্ঠীক জনজাতিৰ মৰ্যাদা দিয়া হ’ব বুলি প্ৰতিশ্ৰুতি দি কোনো কাৰ্যকৰী পদক্ষেপ গ্ৰহণ নকৰা বিজেপিৰ জাতি-জনগোষ্ঠীবিৰোধী ভূমিকাৰ বাবে আগন্তুক পঞ্চায়ত নিৰ্বাচনতেই বিজেপিক এসেকা দিবলৈ কোচ ৰাজবংশীসকল বদ্ধপৰিকৰ বুলি সদৰী কৰিছে নেতাদ্বয়ে। আনহাতে, ১২ নৱেম্বৰৰ কাৰ্যসূচীৰ পিছতেই সন্মিলনীয়ে ৰাজ্যজুৰি পুনৰ প্ৰতিবাদী কাৰ্যসূচী আৰম্ভ কৰাৰ কথাও ব্যক্ত কৰে।
