লখিমপুৰ জিলাৰ ২ নং দক্ষিণ ৰূপহীৰ নিৱাসী শিক্ষক দেৱী প্ৰসাদ উপাধ্যায়ৰ গৃহত সংঘটিত হোৱা এক ঘটনাই সমগ্ৰ অঞ্চলটোতে কৌতুহলৰ সৃষ্টি কৰিছে৷ শিক্ষক গৰাকীয়ে জনোৱা অনুসৰি তেওঁৰ গৃহত থকা প্ৰায় চাৰি বছৰ পুৰণি এটা দমকলেৰে মাটিৰ বাহিৰলৈ ওলাই থকা পাইপেৰে যোৱা এসপ্তাহ ধৰি গেছ নিৰ্গত হৈ আছে৷
পাইপ ডালৰ ওলাই থকা অংশত জুই লগাই দিলে জুই জ্বলি উঠে শিক্ষকগৰাকীয়ে জনাইছে। চাৰিবছৰৰ পূৰ্বে দমকলটো উঠাই পেলোৱা হৈছিল যদিও পাইপডাল মাটিৰ তলতেই ৰৈ গৈছিল৷ কিন্তু এসপ্তাহ মানৰ আগৰ পৰা পাইপডালৰ মুখেৰে গেছ উলাই থকা কথা জানিব পাৰি দীপাৱলীৰ দিনা জুই লগাই দিয়াত পাইপডালৰ বাহিৰলৈ ওলাই থকা অংশটোত জ্বলি উঠিছিল৷
শিক্ষক গৰাকীয়ে সেই জুইত চাহ বনোৱাৰ কথাও জানিবলৈ দিছে৷ প্ৰাকৃতিক গেছৰ বাবেই এই ঘটনা সংঘটিত হৈছে বুলি সন্দেহ প্ৰকাশ কৰিছে যদিও কোনো বিশেষজ্ঞইহে প্ৰকৃত সত্য উদঘাটন কৰিবলৈ সক্ষম হ’ব ৷ এতিয়া এই বিষয়টো সৰৱ চৰ্চা সমগ্ৰ অঞ্চলতে৷
