পৰিৱৰ্তনৰ শ্ল’গান দি শাসনলৈ অহা বিজেপি নেতৃত্বাধীন চৰকাৰখনে ‘এডভাণ্টেইজ আছাম’ অনুষ্ঠিত কৰি অসমৰ ৰাইজক বিনিয়োগ, উদ্যোগ আৰু বাণিজ্যিক উন্নয়নৰ সোণালী সপোন দেখুৱালে। কিন্তু মাহৰ পাছত মাহ ধৰি অচল হৈ থকা নগাঁও আৰু কাছাৰ কাগজ কল দুটাৰ কৰ্মচাৰী সকলৰ চকুপানীয়েই ইয়াৰ বাস্তৱ ছবিখন প্ৰতিফলিত কৰে।
উদ্যোগ-বাণিজ্যৰ বিকাশ দূৰৈৰ কথা, উৎসৱ পতাৰ নামত ৰাজকোষৰ কোটি কোটি টকা খৰচ কৰা বিজেপি চৰকাৰৰ দিনত এতিয়া উদ্যোগ পুনৰুজ্জীৱিত কৰাৰ বাবে আহ্বান কৰিব লগীয়া হৈছে ‘বন্ধ’ কাৰ্যসূচী।
অহা ২২ নৱেম্বৰত হিন্দুস্তান কাগজ নিগম লিমিটেডৰ অধীনস্থ নগাঁও কাগজ কল আৰু কাছাৰ কাগজ কল পুনৰুজ্জীৱিতকৰণৰ দাবীত পুৱা ৫ বজাৰ পৰা ১২ ঘণ্টীয়া ‘মধ্য অসম’ আৰু ‘বৰাক উপত্যকা’ বন্ধৰ আহ্বান জনাইছে এইচ্ছ পি চি পেপাৰ মিলছ ৰিভাইভেল একশ্যন্ কমিটীয়ে।
মঙলবাৰে গুৱাহাটীত এখন সংবাদমেল অনুষ্ঠিত কৰি সমিতিখনে এই বন্ধৰ আহ্বান জনাইছে। কাগজ কল দুটাক পুনৰ কাৰ্যক্ষম কৰি তোলাৰ বাবে সংগ্ৰাম চলাবলৈ কাগজকল কৰ্মী য়ুনিয়ন, সদৌ অসম ট্ৰাইবেল সংঘকে ধৰি কেইবাটাও জাতীয়-জনগোষ্ঠীয় সংগঠনৰ প্ৰতিনিধিয়ে উমৈহতীয়াভাৱে গঠন কৰিছে এই এইচ্ছ পি চি পেপাৰ মিলছ ৰিভাইভেল একশ্যন কমিটী।
উল্লেখ্য যে ২০১৫ চনৰ মাৰ্চ মাহৰ পৰা কাছাৰ কাগজ কলৰ উৎপাদন বন্ধ হৈ থকাৰ বিপৰীতে ২০১৭ চনৰ অক্টোবৰ মাহৰ পৰা বন্ধ হৈ আছে নগাঁও কাগজ কল। কাগজ কল দুটা বন্ধ হৈ থকাৰ ফলত এতিয়া পানীত হাঁহ নচৰা অৱস্থা হৈছে তাত কৰ্মৰত শ শ কৰ্মচাৰী আৰু তেওঁলোকৰ পৰিয়ালৰ। চৰম আৰ্থিক সংকটত ভুগি কাগজ দুটাৰ দুজন কৰ্মচাৰীয়ে আত্মহত্যাৰ পথ বাছি লোৱাৰ উপৰি প্ৰয়োজনীয় চিকিৎসাৰ অভাৱত ৩৬জন কৰ্মচাৰী মৃত্যুমুখত পৰিছে।
ইপিনে, কাগজ কল দুটা পুনৰুজ্জীৱিত কৰাৰ ক্ষেত্ৰত বিজেপি চৰকাৰে কেৱল আশ্বাসতে সীমাবদ্ধ থকা বুলি ক্ষোভ উজাৰে এইচ্ছ পি চি পেপাৰ মিলছ ৰিভাইভেল একশ্যন কমিটীৰ মুখ্য আহ্বায়ক তথা কাগজকল কৰ্মী য়ুনিয়নৰ সম্পাদক আনন্দ বৰদলৈয়ে।
তেওঁ কয়, “চৰকাৰে আমাক ইচ্ছাকৃতভাৱে হত্যা কৰাৰ দৰে হৈছে। ৰাষ্ট্ৰপতিয়ে কাগজকল দুটাক পুনৰ উদ্ধাৰ কৰাৰ বাবে ৯০ কোটি টকাৰ বিত্তীয় পুঁজিত অনুমোদন জনাইছে যদিও এতিয়ালৈ চৰকাৰে সেই ধনো মোকলাই দিয়া নাই। এতিয়া চৰকাৰখনে কাগজ কল দুটাক কাৰ্যক্ষম কৰি নুতুলি কম টকাৰ বিনিময়ত পুঁজিপতি গোষ্ঠীক গতাই দিয়াৰ চেষ্টা চলাই আছে।”
কাগজ কল দুটাৰ ক্ষেত্ৰত কথা দি কথা ৰাখিব নোৱৰা বুলি তেওঁ মুখ্য মন্ত্ৰী সৰ্বানন্দ সোণোৱালকো সমালোচনা কৰে।
উল্লেখ্য যে, কেইমাহমানৰ পূৰ্বে সন্দিকৈ ছোৱালী মহাবিদ্যালয়ৰ এগৰাকী ছাত্ৰী তথা জাগীৰোডৰ নগাঁও কাগজ কলৰ এজন কৰ্মচাৰীৰ কন্যাই মুখ্য মন্ত্ৰীৰে হোৱা সাক্ষাতত কাগজকলৰ কৰ্মীসকলে সন্মুখীন হোৱা দুখ-দুৰ্দশাৰ কথা বিৱৰি উচুপি উঠিছিল। ইয়াৰ পাছত মুখ্য মন্ত্ৰী সোণোৱালে কাগজ কল দুটাৰ ক্ষেত্ৰত ছমাহৰ ভিতৰত ব্যৱস্থা গ্ৰহণৰ আশ্বাস দিছিল।
আজি সেই কথা সোঁৱৰাই মুখ্য মন্ত্ৰীৰ সেই আশ্বাস প্ৰহসনত পৰিণত হোৱা বুলি মন্তব্য কৰিলে আনন্দ বৰদলৈয়ে।
আনহাতে, ২০১৬ চনৰ নিৰ্বাচনৰ পূৰ্বে প্ৰধান মন্ত্ৰী নৰেন্দ্ৰ মোদীয়ে শিলচৰৰ জনসভাত ভাষণ প্ৰদান কৰি কাগজ কল পুনৰুজ্জীবিত কৰাৰ প্ৰতিশ্ৰুতি দিছিল বুলি উল্লেখ কৰে সদৌ অসম ট্ৰাইবেল সংঘৰ সম্পাদক তথা উমৈহতীয়া সমিতিখনৰ আহ্বায়ক আদিত্য খাখলাৰীয়ে। তেওঁ নৰেন্দ্ৰ মোদীৰ সেই প্ৰতিশ্ৰুতি অসাৰ প্ৰতিপন্ন হোৱা বুলিও অভিযোগ কৰে।
লগতে তেওঁ কয়, “চৰকাৰে কেৱল ব্যক্তিগত খণ্ডৰ কাগজ কলৰ লাভ আদায়ৰ সুবিধা কৰি দিয়াৰ বাবেই ৰাজহুৱা খণ্ডৰ এই কাগজকল দুটা বন্ধ কৰি দিছে।”
ইয়াৰ উপৰি পৰিচালনাৰ ভুলৰ বাবেই দুয়োটা কাগজ কল বন্ধ হোৱা বুলিও মন্তব্য কৰে।
ইপিনে, জাগীৰোড কাগজ কলৰ অব্যহৃত ভূমি চৰকাৰে বিক্ৰী কৰাৰ পৰিকল্পনা কৰি থকাৰো অভিযোগ আনে আদিত্য খাখলাৰীয়ে।
“সেই মাটি ট্ৰাইবেল ব্লকৰ অধীনস্থ। তাত কাগজ কল নিৰ্মাণৰ বাবেহে অনুমতি দিয়া হৈছিল। কিন্তু সেই মাটি চৰকাৰক বিক্ৰী কৰিব দিয়া নহ’ব”, এইদৰে গৰজি উঠে খাখলাৰীয়ে। প্ৰয়োজনত তেওঁ আইনৰ ওচৰ চপাৰো হুংকাৰ দিয়ে।
