গুৱাহাটীৰ জজ খেলপথাৰত আজিৰ পৰা অনুষ্ঠিত হ’ব পঞ্চম সংখ্যক আন্তঃৰাষ্ট্ৰীয় প্ৰবীণ ফুটবল প্ৰতিযোগিতা। প্ৰতিযোগিতাখনত অংশ লোৱাৰ উদ্দেশ্যে ইতিমধ্যে গুৱাহাটীত আহি উপস্থিত হৈছে ৰাষ্ট্ৰীয়-আন্তঃৰাষ্ট্ৰীয় পৰ্যায়ৰ প্ৰাক্তন ফুটবলাৰ।
য়ুনাইটেড ব্ৰাদাৰ্ছ ক্লাবে আয়োজন কৰা প্ৰতিযোগিতাখন আজি বিয়লি ৫ বজাত ভাৰতীয় ফুটবল দলৰ প্ৰাক্তন অধিনায়ক বাইচুং ভূটীয়াই উদ্বোধন কৰিব। ১২টা দলে অংশগ্ৰহণ কৰিবলগীয়া প্ৰতিযোগিতাখনৰ বাবে ইতিমধ্যে গুৱাহাটীত আহি উপস্থিত হৈছে বাংলাদেশ আৰু নেপালৰ ফুটবল দল।
প্ৰতিযোগিতাখনৰ আয়োজকে বুধবাৰে এখন সংবাদমেলৰ জৰিয়তে প্ৰতিযোগিতাখনৰ প্ৰস্তুতি সম্পৰ্কত বিৱৰণী আগবঢ়ায়। তদুপৰি উদ্বোধনী অনুষ্ঠানত জনপ্ৰিয় কণ্ঠশিল্পী জুবিন গাৰ্গ নেতৃত্বাধীন অৰ্টিষ্ট ইলেভেন আৰু মিডিয়া একাডশৰ মাজত এখন প্ৰীতি ফুটবল মেচো অনুষ্ঠিত হ’ব উদ্যোক্তাই জানিবলৈ দিয়ে।
আনহাতে প্ৰতিযোগিতাখনৰ লগত সংগতি ৰাখি প্ৰাক্তন আন্তৰ্জাতিক খেলুৱৈ দেৱাশিস ৰয় আৰু ৰাজ্যৰ দুগৰাকী ক্ৰীড়া সাংবাদিক পৱিত্ৰ গগৈ আৰু বিপুল বৰ্মনক সম্বৰ্ধনা জনাব।
৪০ ঊৰ্ধ্বৰ প্ৰাক্তন ৰাষ্ট্ৰীয়-আন্তঃৰাষ্ট্ৰীয় খেলুৱৈৰ সমাহাৰেৰে আজিৰ পৰা গুৱাহাটীত চাৰিদিনলৈ অনুষ্ঠিত হ’বলগীয়া প্ৰতিযোগিতাখনত বাংলাদেশ আৰু নেপাল দলৰ উপৰি কলকাতাৰ ইষ্ট-বেংগল, মোহন বাগান আদি দলৰ প্ৰাক্তন খেলুৱৈৰে গঠিত প্ৰবীণ একাদশ, দিল্লী, নাগালেণ্ড, মণিপুৰ, মেঘালয়ৰ লগতে দুলীয়াজান, কোকৰাঝাৰ আদিৰ প্ৰবীণ ফুটবল খেলুৱৈৰ দলে ভাগ ল’ব।
প্ৰতিযোগিতাখনৰ বিজয়ী দলক কনক চন্দ্ৰ বৰুৱা ট্ৰফীৰ লগতে ৫০ হাজাৰ টকা আৰু ৰানাৰ্ছ আপ দলক হবিবুন নেছা সোঁৱৰণী ট্ৰফীৰ লগতে ৩০ হাজাৰ টকাৰ আৰ্থিক পুৰস্কাৰ আগবড়োৱা হ’ব। আনহাতে অহা দেওবাৰে প্ৰতিযোগিতাৰ দুয়োখন ছেমিফাইনেল আৰু ফাইনেল খেল অনুষ্ঠিত হ’ব বুলি আয়োজকে জনায়।
