বৰ্তমান বেংকতো সুৰক্ষিত নোহোৱা হৈছে গ্ৰাহকৰ জমা ধন। চাইবাৰ অপৰাধীৰ গ্ৰাসত এইবাৰ পৰিছে ভাৰতীয় ষ্টেট বেংকৰ কলিয়াবৰ শাখা। কলিয়াবৰত থকা ষ্টেট বেংকৰ শাখাটোত থকা গ্ৰাহকৰ বেংক একাউণ্টৰ পৰা জমা ধন হৰলুকি হোৱাৰ ইটোৰ পিচত আনটো ঘটনা পোহৰলৈ আহিছে। হেকাৰে বিশেষকৈ লক্ষ্য কৰিছে চৰকাৰী বিদ্যালয়ৰ শিক্ষক-শিক্ষয়িত্ৰীসকলক। বেংক একাউণ্টৰ পৰা ধন হৰলুকী হোৱাৰ ঘটনা সঘনাই সংঘটিত হৈ আহিছে কলিয়াবৰৰ ষ্টেট বেংকত।
কলিয়াবৰৰ নলতলিৰ ‘ন-পূৱথৰীয়া’ গাঁৱৰ ৰঞ্জুমাই বৰা নামৰ শিক্ষয়িত্ৰী গৰাকীৰ SBI কলিয়াবৰ শাখাৰ 11656847405 নম্বৰ একাউণ্টৰ পৰা চাৰি লাখ দহ হাজাৰ টকা স্বয়ংক্ৰিয়ভাৱে অন্তৰ্ধান হ’ল। বেংকলৈ আহি শিক্ষয়িত্ৰী গৰাকীয়ে ধন উলিয়াব ধৰোঁতে পোহৰলৈ আহে ধন অন্তৰ্ধানৰ এই ঘটনা।
চলিত মাহৰ ১১ তাৰিখৰ পৰা ১৪ তাৰিখৰ ভিতৰত চাৰিদিনত মুঠ ২৮ বাৰত নোহোৱা হয় চাৰি লাখ দহ হাজাৰ টকাৰ এই বুজন পৰিমাণৰ ধনৰাশি। বিগত ২০ অক্টোবৰলৈকে শিক্ষয়িত্ৰী গৰাকী একাউণ্টত জমা আছিল ৩ লাখ ৭০ হাজাৰ ৭২৭ টকা। ১১ আৰু ১৩ নবেম্বৰৰ ভিতৰত এই ধনৰাশি চাইবাৰ অপৰাধীয়ে হৰলুকী কৰাৰ পিচত ১৪ নবেম্বৰত শিক্ষয়িত্ৰী গৰাকীৰ একাউণ্টত জমা হোৱা বেতনৰ ধনসহ চল্লিশ হাজাৰ পাঁচশ টকা উলিয়াই নিয়ে হেকাৰে।
আনহাতে ভুক্তভোগী শিক্ষয়িত্ৰী গৰাকীয়ে কলিয়াবৰৰ আৰক্ষী থানাত এজাহাৰ দাখিল কৰাৰ পিচতে কলিয়াবৰ ষ্টেট বেংকত উপস্থিত হয় আৰক্ষীৰ দল। কিন্তু ভুক্তভোগী শিক্ষয়িত্ৰীগৰাকীৰ পৰিয়ালৰ প্ৰশ্ন, কেনেকৈ গ্ৰাহক ইচ্ছাৰ বিপৰীতে বেংক একাউণ্টৰ পৰা অন্তৰ্ধান হ’ল নিজৰ সাচতীয়া ধন?
বিগত ৯ নবেম্বৰত শিক্ষয়িত্ৰীগৰাকীলৈ অচিনাকী লোকৰ এটা ফোনকল আহিছিল। অচিনাকী লোকজনে শিক্ষয়িত্ৰী গৰাকীৰ ভোটকেন্দ্ৰ নাম সোধাৰ লগতে কিছুসময় নানাধৰণৰ কথা পাতি কাটি দিছিল ফোনকলটো। তাৰ কিছু সময়ৰ পিচৰে পৰা বৰ্তমানলৈ বিকল হৈ আছে শিক্ষয়িত্ৰী গৰাকীৰ ফোন নম্বৰটো। তাৰ দুদিন পিচৰে পৰা চাইবাৰ অপৰাধীয়ে লুটি নিছে শিক্ষয়িত্ৰী গৰাকীৰ একাউণ্টৰ জমা ধন।
সম্প্ৰতি কলিয়াবৰ আৰক্ষীয়ে সমগ্ৰ ঘটনাটো তদন্তৰ বাবে নগাঁও আৰক্ষীৰ চাইবাৰ ক্ৰাইম চেললৈ প্ৰেৰণ কৰিছে।
