নাগৰিকত্ব সংশোধনী বিধেয়কৰ বিৰুদ্ধে অসমৰ খিলঞ্জীয়া ৰাইজৰ লগতে বিভিন্ন জাতীয় জনগোষ্ঠীয় সংগঠনে প্ৰৱল আন্দোলন গঢ়ি তোলাৰ পাছতো নিৰ্বিকাৰ ৰাজ্যৰ মুখ্য মন্ত্ৰী সৰ্বানন্দ সোণোৱাল। জাতীয়তাবাদী মঞ্চৰ পৰা শাসনৰ গাদীত অধিষ্ঠিত হোৱা অসমৰ মুখ্য মন্ত্ৰীজনৰ অৱস্থানৰ বিপৰীতে এক সুস্পষ্ট স্থিতি লৈছে ইখনৰ পাছত আনখন ৰাজ্যৰ মুখ্য মন্ত্ৰীয়ে।
মেঘালয়ৰ মুখ্য মন্ত্ৰী কনৰাড চাংমা, বিহাৰৰ মুখ্য মন্ত্ৰী নীতীশ কুমাৰৰ পাছত এইবাৰ অন্ধ্ৰ প্ৰদেশৰ মুখ্য মন্ত্ৰী চন্দ্ৰবাবু নাইডুৰ স্পষ্ট মত। অন্ধ্ৰ প্ৰদেশ চৰকাৰে বিৰোধিতা কৰিব নাগৰিকত্ব সংশোধনী বিধেয়কৰ। আজি সদৌ অসম ছাত্ৰ সন্থাৰ নেতৃত্বক এই প্ৰতিশ্ৰুতি দিয়ে নাইডুৱে।
সোমবাৰে সন্ধিয়া সদৌ অসম ছাত্ৰ সন্থাৰ মুখ্য উপদেষ্টা ড০ সমুজ্জ্বল কুমাৰ ভট্টাচাৰ্য, সভাপতি দীপাংক কুমাৰ নাথ, সাধাৰণ সম্পাদক লুৰিণজ্যোতি গগৈ, শিক্ষাবিদ বসন্ত ডেকা, আৰু ড০ শিখৰ কুমাৰ শৰ্মাই ৰাজ্যখনৰ ৰাজধানী অমৰাৱতীত মুখ্য মন্ত্ৰী নাইডুক সাক্ষাৎ কৰি বিধেয়কখন বিৰোধিতা কৰাৰ বাবে আনুৰোধ জনায়।
আছুৰ প্ৰতিনিধিৰ সৈতে হোৱা সাক্ষাতত চন্দ্ৰবাবু নাইডুৱে তেলুগু দেশম পাৰ্টি নেতৃত্বাধীন অন্ধ্ৰ প্ৰদেশ চৰকাৰে বিৰোধিতা কৰি যাব বুলি জানিবলৈ দিয়ে বুলি এক বিবৃতিযোগে ছাত্ৰ সন্থাৰ তৰফৰ পৰা নৰ্থ-ইষ্ট নাওক জনায়।
তেওঁ লগতে যুটীয়া সংসদীয় সমিতিত থকা তেলুগু দেশম পাৰ্টিৰ সদস্যগৰাকীক কাইলৈ অনুষ্ঠিত হ’ব লগীয়া জে পি চিৰ বৈঠকত বিধেয়কখনৰ বিৰোধিতা কৰিবলৈ নিৰ্দেশ দিব বুলিও কয়।
ইয়াৰ উপৰি অসমৰ খিলঞ্জীয়া ৰাইজ আৰু বিভিন্ন দল-সংগঠনে প্ৰতিবাদ কৰি অহা বিধেয়কখনৰ বিৰুদ্ধে দেশৰ আন আন ৰাজনৈতিক দলৰ লগত সহমতত উপনীত হ’বলৈ পদক্ষেপ গ্ৰহণ কৰিব বুলিও আছুৰ প্ৰতিনিধিক জনায়।
উল্লেখ্য যে, কাইলৈ নতুন দিল্লীত নাগৰিকত্ব সংশোধনী বিধেয়ক সন্দৰ্ভত যুটীয়া সংসদীয় সমিতিৰ এখন গুৰুত্বপূৰ্ণ বৈঠক অনুষ্ঠিত হ’ব। এই বৈঠকৰ আগদিনাই চন্দ্ৰবাবু নাইডুৰ এই আশ্বাস নিশ্চয়কৈ তাৎপৰ্যপূৰ্ণ।
