ৰাজ্যত দুটা পৰ্যায়ত অনুষ্ঠিত হ’বলগীয়া পঞ্চায়ত নিৰ্বাচনৰ বাবে ৰাজনৈতিক দলসমূহে ব্যাপক ৰূপত আৰম্ভ কৰিছে নিজৰ নিজৰ প্ৰচাৰ অভিযান। সকলো ৰাজনৈতিক দলৰে এটাই লক্ষ্য ৰাজ্যৰ অধিকাংশ পঞ্চায়ত নিজৰ দখলত অনা। সেয়ে ৰাজ্যৰ চুকে কোণে অনুষ্ঠিত হোৱা নিৰ্বাচনী সভাসমূহত দেখা গৈছে হাই প্ৰফাইল নেতাৰ উপস্থিতি তথা উদাত্ত ভাষণ।
শাসকীয় বিজেপি-অগপ-কংগ্ৰেছ সকলো বৰ্তমান ব্যস্ত নিৰ্বাচনী প্ৰচাৰত। আৰম্ভ হৈছে ৰাজনৈতিক দলসমূহৰ মাজত গালি-গালাজ। কোনোৱে যদি উদাত্ত ভাষণেৰে ৰাইজক আকৰ্ষিত কৰাৰ চেষ্টা চলাইছে কোনোৱে প্ৰচাৰৰ বাবে হেলিকপ্টাৰ ব্যৱহাৰ কৰি দৃষ্টি কাঢ়িছে ৰাইজৰ।
উল্লেখ্য যে পঞ্চায়ত নিৰ্বাচনৰ বাবে বিজেপিৰ প্ৰাৰ্থীৰ হৈ মন্ত্ৰী ড০ হিমন্ত বিশ্ব শৰ্মাই ৰাজ্যৰ চুকে কোণে প্ৰচাৰত অংশ লৈছে। প্ৰভাৱশালী মন্ত্ৰীগৰাকীয়ে এদিনত অংশ লৈছে তিনি-চাৰিখন প্ৰচাৰ সভাত। ৰাতিপুৱা যদি উজনি অসমত, দুপৰীয়া মধ্য অসমত আৰু আবেলি অংশ লৈছে নামনি অসমত। এই সকলোবোৰ সম্ভৱ হৈছে একমাত্ৰ হেলিকপ্টাৰৰ বাবে। কিন্তু এতিয়া এই হেলিকপ্টাৰৰ বাবেই তীব্ৰ সমালোচনাৰ সন্মুখীন হ’বলগীয়া হৈছে বিজেপি দলৰ লগতে মন্ত্ৰী হিমন্ত বিশ্ব শৰ্মা।
উল্লেখ্য যে পঞ্চায়ত নিৰ্বাচনৰ প্ৰচাৰৰ বাবে অসমৰ আকাশত হেলিকপ্টাৰ উৰুওৱা কাৰ্যক তীব্ৰ ভাষাৰে সমালোচনা কৰিছে প্ৰাক্তন মুখ্য মন্ত্ৰী প্ৰফুল্ল মহন্তৰ লগতে বিভিন্ন ৰাজনৈতিক নেতাই। হেলিকপ্টাৰ ব্যৱহাৰ সন্দৰ্ভত মহন্তই কয় যে সাধাৰণ পঞ্চায়ত নিৰ্বাচনতে যদি এইদৰে হেলিকপ্টাৰ ব্যৱহাৰ কৰি প্ৰচাৰ চলোৱা হয় তেন্তে অনাগত দিনত ৰাজ্যত দুৰ্নীতি বৃদ্ধি পোৱাটো খাটাং।
ইয়াৰ উপৰি তেওঁ কয় যে নিৰ্বাচন সমূহত যিমানেই ব্যয়বহুল প্ৰচাৰ চলোৱা হ’ব সিমানেই দুৰ্নীতিক প্ৰশ্ৰয় দিয়া হ’ব। এইদৰে প্ৰচাৰ চলোৱা এটা চমকৰ লগতে ৰাজহুৱা ধনৰ অপচয় বুলি মন্তব্য কৰে।
ইফালে হিমন্তই প্ৰচাৰৰ বাবে হেলিকপ্টাৰ ব্যৱহাৰ কৰা কাৰ্যক বিৰোধী দলপতি দেবব্ৰত শইকীয়াও গৰিহণা দিয়াৰ লগতে এয়া ছিণ্ডিকেট, দুৰ্নীতিৰে ঘটা ধনেৰে বিজেপিয়ে প্ৰচাৰ চলাই থকা বুলি কয়।
উল্লেখ্য যে বিজেপিয়ে পঞ্চায়ত নিৰ্বাচনৰ প্ৰচাৰৰ বাবে দুখন হেলিকপ্টাৰ ব্যৱহাৰ কৰিছে। এঘণ্টাত এখন হেলিকপ্টাৰ উৰিলে খৰছ হয় ৯০ৰ পৰা ৯৯ হাজাৰ। এইদৰে মুখ্য মন্ত্ৰী আৰু বিত্ত মন্ত্ৰীয়ে প্ৰচাৰৰ বাবে দৈনিক ১০-১২ লাখ টকা চৰকাৰী ধন অপচয় কৰি আছে।
বিভিন্ন সমস্যাৰে জৰ্জৰিত অসমৰ দৰে এখন ৰাজ্যৰ পঞ্চায়ত নিৰ্বাচনৰ প্ৰচাৰৰ বাবদ দৈনিক এইদৰে ১০-১২ লাখ টকা ব্যয় কৰা কাৰ্যক বিৰোধী ৰাজনৈতিক দলসমূহৰ লগতে অৰাজনৈতিক দল-সংগঠনৰ নেতা-কৰ্মীসকলেও শাসকীয় দলটোক তীব্ৰ ভাষাৰে সমালোচনা কৰা দেখা গৈছে।
