ভাৰতৰ ৰাষ্ট্ৰপতি ৰামনাথ কোবিন্দ আজি ২৯ নৱেম্বৰ বৃহস্পতিবাৰে বৰঝাৰৰ বায়ুসেনাঘাটীত থকা ১১৮ হেলিকপ্টাৰ য়ুনিটত উপস্থিত হয়। বৰঝাৰৰ ভাৰতীয় বায়ুসেনাঘাটীত থকা ১১৮ হেলিকপ্টাৰ য়ুনিট প্ৰেচিডেণ্টছ ষ্টেণ্ডাৰ্ড এৱাৰ্ডৰ বাবে নিৰ্বাচিত হোৱাৰ পৰিপ্ৰেক্ষিতত এটা আনুষ্ঠানিক পেৰেড অনুষ্ঠানৰ আয়োজন কৰা হৈছিল। এই পেৰেড অনুষ্ঠানত উপস্থিত থাকে অসমৰ ৰাজ্যপাল জগদীশ মুখী, মুখ্য মন্ত্ৰী সৰ্বানন্দ সোণোৱাল আৰু ভাৰতীয় বায়ুসেনা বাহিনীৰ সৰ্বাধিনায়ক এয়াৰ চীফ মাৰ্শ্বেল বীৰেন্দৰ সিং ধানোৱা।
পেৰেড অনুষ্ঠানত উপস্থিত থকা ৰাষ্ট্ৰপতিগৰাকীয়ে আজি বিশ্বই ভাৰতক বেলেগ চকুৰে লক্ষ্য কৰিছে। বৰঝাৰৰ বায়ুসেনাঘাটীত ১১৮ হেলিকপ্টাৰ য়ুনিটক প্ৰেচিডেণ্টছ স্পেচিয়েল এৱাৰ্ড আৰু মেমোৱাৰাস্থিত আকাশমাৰ্গ প্ৰতিৰক্ষা মহাবিদ্যালয়ক (Air Defence College) কালাৰ্ছ এৱাৰ্ড প্ৰদান কৰাৰ সময়ত প্ৰদান কৰা ভাষণত তেওঁ কয়, ‘‘মই অলপতে ভিয়েটনাম আৰু অষ্ট্ৰেলিয়া ভ্ৰমণৰ পৰা উভতি আহিছোঁ। এই ৰাষ্ট্সমূহত মই প্ৰতিৰক্ষা, আন্তৰ্জাতিক নিৰাপত্তা, বাণিজ্য, সংস্কৃতি আদি বিভিন্ন পৰস্পৰ স্বাৰ্থজড়িত বিষয়ৰ ওপৰত আলোচনা কৰিছিলো। এই সুদীৰ্ঘ আলোচনাত এটা কথাই স্পষ্ট হৈ পৰিছিল। সেয়া হৈছে বিশ্বই ভাৰতবৰ্ষক আজি নতুন দৃষ্টিৰে অৱলোকন কৰিছে।’’
ৰাষ্ট্ৰপতিগৰাকীয়ে আৰু কৈছে যে ভাৰত এক প্ৰধান শক্তি হিচাপে পৰিগণিত হৈছে আৰু আন্তৰ্জাতিক নিৰাপত্তা, বাণিজ্য আৰু ব্যৱসায় আৰু পাৰিপাৰ্শিক সুৰক্ষাৰ উদাহৰণক আকাৰ দিয়াৰ ক্ষেত্ৰত এটা অগ্ৰগণ্য ভূমিকা গ্ৰহম কৰিবলৈ আগবাঢ়িছে।
ৰাষ্ট্ৰপতিগৰাকীয়ে কয়, আন্তৰ্জাতিক পৰ্যায়ত ভাৰত উজলি উঠাৰ বহুকেইটা মাত্ৰা আছে। এই ক্ষেত্ৰত আমাৰ সামৰিক বাহিনীৰ সাহস আৰু সামৰ্থ্যই বিশেষ মৰ্যাদা লাভ কৰিছে।
উল্লেখ্য যে প্ৰেচিডেণ্টছ স্পেচিয়েল এৱাৰ্ড আৰু কালাৰ্ছ এৱাৰ্ড সেনা বাহিনীৰ ইউনিটক প্ৰদান কৰা সৰ্বোচ্চ সন্মান। গোটটোৱে শান্তি আৰু যুদ্ধৰ সময়ত ৰাষ্ট্ৰলৈ আগবঢ়োৱা অমূল্য অৱদানৰ স্বীকৃতি হিচাপে এই সন্মান প্ৰদান কৰা হয়।
উল্লেখ্য যে ১১৮ হেলিকপ্টাৰ য়ুনিট (চেলেঞ্জাৰ) হৈছে এমআই-৮ হেলিকপ্টাৰ মোতায়েন থকা হেলিকপ্টাৰ আছে। এই য়ুনিটটো ১৯৭১ৰ ২২ নৱেম্বৰত চাবুৱা বায়ুসেনা ঘাটীত স্থাপন কৰা হৈছিল বুলি এয়াৰ মাৰ্শ্বেল নাম্বিয়াৰে জনাইছে।
আনহাতে লক্ষ্ণৌৰ মেমোউৰা বায়ুসেনা ঘাটীত অৱস্থিত আকাশমাৰ্গ প্ৰতিৰক্ষা মহাবিদ্যালয় হৈছে ভাৰতীয় বায়ুসেনা বাহিনীৰ এখন আগশাৰীৰ প্ৰশিক্ষণ প্ৰতিষ্ঠান। এই মহাবিদ্যালয়খনে কেবল ভাৰতীয় বায়ুসেনাৰ বিষয়াসকলক প্ৰশিক্ষণ দিয়াৰ উপৰিও ভগ্নী সেৱাসমূহৰ লগতে বন্ধুভাৱাপন্ন ৰাষ্ট্ৰলৈও পেচাদাৰী প্ৰশিক্ষণ প্ৰদান কৰে।
