সদৌ অসম নাৰ্চ সন্থাই চলাই থকা আন্দোলনক লৈ সন্থাৰ নিজৰ মাজতেই মতবিৰোধ ঘটাৰ কথা জানিব পৰা গৈছে।
জানিব পৰা মতে সন্থাৰ সভাপতি অঞ্জনা শইকীয়াৰ সৈতে এটা অংশই কৰ্মবিৰতি স্থগিত কৰিব বিচাৰিছে। আনকি তেওঁলোকে কৰ্ম বিৰতি প্ৰত্যাহাৰ কৰি আজি কৰ্তব্যত যোগদানো কৰিছে।
আনহাতে, কালিৰ আলোচনাক লৈ সন্তুষ্ট নহয় সন্থাৰ সম্পাদিকা জুনু চুতীয়া দিহিঙিয়াৰ সৈতে আনটো অংশ। সেই অংশটোৱে আন্দোলন অব্যাহত ৰখাৰ কথা স্পষ্ট কৰিছে। সাধাৰণ সম্পাদিকা জুনু চুতীয়া দিহিঙিয়াই সন্থাই আন্দোলন স্থগিত কৰা নাই বুলি সংবাদ মাধ্যমক বিবৃতি যোগে জানিবলৈ দিয়ে।
ইপিনে, বৃহস্পতিবাৰে ৰাজ্য চৰকাৰ স্বাস্থ্য বিভাগৰ প্ৰধান সচিব সমীৰ সিনহাৰ সৈতে সদৌ অসম নাৰ্চ সন্থাৰ আলোচনা অনুস্থিত হৈছিল। উক্ত আলোচনাৰ পাছতে নাৰ্ছ সন্থাৰ মাজত মত বিৰোধ ঘটে আৰু একাংশই আন্দোলন প্ৰত্যাহাৰ কৰিবলৈ সিদ্ধান্ত লোৱাৰ বিপৰীতে আন অংশই আন্দোলন চলাই যোৱাৰ পক্ষত সিদ্ধান্ত লয়।
সন্থাৰ সভাপতি অঞ্জনা শইকীয়াই কয়, “ৰাজ্য চৰকাৰৰ সৈতে হোৱা আলোচনা সৌহাৰ্দপূৰ্ণ আছিল। চৰকাৰে আমাৰ দাবীসমুহ বিবেচনা কৰাৰ অশ্বাস দিছে। গতিকে কৰ্মবিৰতি সাময়িকভাৱে স্থগিত ৰখাৰ সিদ্ধান্ত গ্ৰহণ কৰিছো।”
আনহাতে, সাধাৰণ সম্পাদিকা জুনু চুতীয়া দিহিঙিয়াই বৃহস্পতিবাৰৰ আলোচনাত অসন্তুষ্টি প্ৰকাশ কৰি আজি এক বিবৃতিযোগে আলোচনাৰ অন্তত দিয়া কাৰ্য বিৱৰণী (minutes) কোনোপধ্যে গ্ৰহণযোগ্য নহয় বুলি কয়। পূৰ্বেও এনে ধৰণৰ ‘minutes’ দিছিল। তাত কোনো বিভাগীয় জাননী জাৰি কৰা নাই।
তেওঁ লগতে কয় যে আমি এই আন্দোলন স্থগিত ৰখাৰ পক্ষপাতী নহয়। চৰকাৰী জাননী (notifications) নোপোৱালৈকে আমি কেতিয়াও আমাৰ আন্দোলন প্ৰত্যাহাৰ নকৰো।
উল্লেখযোগ্য যে যোৱা সোমবাৰৰ পৰা সদৌ অসম নাৰ্ছ সন্থাই তেওঁলোকৰ বিভিন্ন দাবীৰ সমৰ্থনত অনিৰ্দ্দিষ্টকালীন কৰ্মবিৰতি পালন কৰি আহিছে। নাৰ্ছ সন্থাৰ কৰ্ম বিৰতি কাৰ্যসূচীৰ ফলত ৰাজ্যৰ ৰাজহুৱা স্বাস্থ্যসেৱা খণ্ডত হাহাকাৰ অৱস্থাৰ সৃষ্টি হয়। ৰাজ্যৰ চিকিৎসা মহাবিদ্যালয় কেইখনৰ লগতে চৰকাৰী হাস্পাতলসমূহত ৰোগীসকলে ভীষণ সমস্যাৰ সন্মুখীন হ’বলগীয়া হৈছে।
দীৰ্ঘদিন ধৰি নাৰ্ছসকলৰ অভাৱ-অভিযোগসমূহৰ প্ৰতি চৰকাৰে গুৰুত্ব নিদিয়াৰ অভিযোগ উত্থাপন কৰি নাৰ্ছ সন্থাই নাৰ্ছসকলৰ দৰমহা গাঁথনিত থকা বিসংগতি দূৰ কৰা, ষ্টাফ নাৰ্ছক সমহাৰত দৰমহা প্ৰদান কৰা, ষ্টাফ নাৰ্ছৰ চাকৰি বিধি প্ৰকাশ কৰা আদি দাবীত এই কৰ্মবিৰতি পালন কৰিছে।
