বঞ্চনা-প্ৰতাৰণাৰে বিশ্ব প্ৰতিবন্ধী দিৱসৰ দিনটোতে প্ৰতিবন্ধীসকলক ‘প্ৰতাৰণা দিৱস’ পালন কৰিবলৈ বাধ্য কৰোৱা চৰকাৰে আজি শ্ৰীমন্ত শংকৰদেৱ কলাক্ষেত্ৰত অনুষ্ঠিত কৰিলে আন্তৰ্জাতিক দিব্যাংগ দিৱস।
শ্ৰীমন্ত শংকৰদেৱ আন্তৰ্জাতিক প্ৰেক্ষাগৃহত সীমিত সংখ্যক বিশেষভাৱে সক্ষম লোকক লৈয়ে সমাজ কল্যাণ বিভাগে আন্তৰ্জাতিক দিব্যাংগ দিৱসৰ কাৰ্য্যসূচী পতাৰ চেষ্টা কৰে।
উল্লেখযোগ্য যে চৰকাৰ বঞ্চনাৰ বিৰুদ্ধে আজি ৰাজ্যৰ প্ৰতিবন্ধীসকলে প্ৰতিবন্ধী সুৰক্ষা সংস্থা, অসমৰ নেতৃত্বত মুখত ক’লা কাপোৰ বান্ধি প্ৰতিবাদী কাৰ্য্যসূচী ৰূপায়ণ কৰে। তেওঁলোকে ইয়াক প্ৰতাৰণা দিৱস নাম দিয়ে।
প্ৰতিবন্ধীৰ প্ৰতিবাদৰ বিপৰীতে ৰাজ্য চৰকাৰৰ সমাজ কল্যাণ বিভাগৰ মন্ত্ৰী প্ৰমীলাৰাণী ব্ৰহ্মই চৰকাৰী কাৰ্যসূচীটোত উপস্থিত থাকি দিব্যাংগ পেঞ্চন আৰু স্বাস্থ্যজনিত আঁচনিসমূহ ফলপ্ৰসূ ৰূপায়ণৰ আশ্বাস প্ৰদান কৰে। লগতে বিশেষভাৱে সক্ষম লোকৰ বাবে খালী হৈ থকা (বেকলগ) বিভিন্ন বিভাগৰ পদসমূহ পুৰণৰ যৎপৰোনাস্তি চেষ্টা কৰিব বুলিও মন্ত্ৰী ব্ৰহ্মই প্ৰকাশ কৰে।
কিন্তু তেনেকৈ ক’লেও মন্ত্ৰীগৰাকীয়ে নিজ মুখেই স্বীকাৰ কৰে যে বিভিন্ন বিভাগত ৪,৪১৯টা পদত দিব্যাংগ লোকক নিযুক্তি দিয়াৰ কথা আছিল যদিও এতিয়া ইমান সংখ্যক পদ খালী নাই।
মুঠ ২৩টা বিভাগত এতিয়া বিশেষভাৱে সক্ষম প্ৰাৰ্থীৰ বাবে মাত্ৰ ৬৪০টাহে খালী পদ আছে।
আন ২৭ বিভাগৰ পৰা বেকলগ পদৰ তালিকা ওলাবলৈ বাকী আছে বুলি কয় মন্ত্ৰীগৰাকীয়ে অহা ডিচেম্বৰৰ ভিতৰত এহেজাৰ পদত দিব্যাংগসকলক নিযুক্তিৰ ব্যৱস্থা কৰিব বুলি আজিৰ আন্তৰ্জাতিক দিব্যাংগ দিৱসৰ কাৰ্যসূচীত সমাজ কল্যাণ মন্ত্ৰীগৰাকীয়ে প্ৰতিশ্ৰুতি দিয়ে।
আনহাতে আজিৰ কাৰ্য্যসূচীটোতে প্ৰমীলাৰাণী ব্ৰহ্মই দিব্যাংগসকলৰ উচ্চ শিক্ষাৰ বাবে এখন কেন্দ্ৰীয় বিশ্ববিদ্যালয় স্থাপনৰ যো-জা চলোৱা বুলি কয়। ভাৰত চৰকাৰে অনুমোদন জনোৱা এই কেন্দ্ৰীয় বিশ্ববিদ্যালয়খনৰ আধাৰশিলা বকোত স্থাপন কৰা হ’ব বুলি জানিবলৈ দিয়ে মন্ত্ৰীগৰাকীয়ে।
