শাসক দল বিজেপিৰ সংগ এৰিলে জাতিঙ্গা পৰিষদীয় সমষ্টিৰ সদস্য তথা পাৰ্বত্য স্বায়ত্ত শাসিত পৰিষদৰ শিক্ষা বিভাগৰ ইএম ফ্লেমিঙ ৰূপছিয়ে। আজি ৰাতিপুৱা বিজেপিৰ ডিমা হাচাও জিলাৰ সভাপতি নিপোলাল হোজাইৰ হাতত ফ্লেমিঙে তেওঁৰ পদত্যাগ পত্ৰ দাখিল কৰে।
উল্লেখযোগ্য যে উত্তৰ কাছাৰ পাৰ্বত্য স্বায়ত্ত শাসিত পৰিষদৰ নিৰ্বাচনৰ প্ৰাক্ মুহুৰ্তত ইএম ৰূপছিৰ পদত্যাগ তাৎৰ্য্যপূৰ্ণ হিচাপে বিবেচিত হৈ পৰিছে। কিয়নো ফ্লেমিঙে এপিনে বিজেপিৰ টিকট বিচৰা নাই অথচ তেওঁ নিৰ্বাচনত প্ৰতিদ্বন্দিতা কৰাটোও নিশ্চিত।
এনে পৰিস্থিতিত ফ্লেমিঙৰ পদত্যাগৰ কাৰণ কি সেয়া ৰহস্যজনক হৈ পৰিছে। ৰূপছিয়ে তেওঁৰ পদত্যাগ পত্ৰত অনিবাৰ্য কাৰণত পদত্যাগ কৰা বুলি উল্লেখ কৰিছে।
ইপিনে, তেওঁৰ নিজৰ মতামত জানিবৰ বাবে ফ্লেমিঙৰ লগত বহুবাৰ যোগাযোগ কৰাৰ চেষ্টা কৰা হৈছিল যদিও তেওঁক পোৱা নগ’ল। অৱশ্যে, বিজেপিৰ জিলা সভাপতি নিপোলাল হোজাইয়ে আজি ৰাতিপুৱা ফ্লেমিঙ ৰূপছিয়ে পদত্যাগ পত্ৰ প্ৰেৰণ কৰা বুলি জানিবলৈ দিয়ে।
