পঞ্চায়ত নিৰ্বাচনৰ সময়ছোৱাত ভংগ হওঁ হওঁ অৱস্থাত থকা অগপ-বিজেপিৰ মিত্ৰতালৈ পঞ্চায়ত নিৰ্বাচনৰ পিছত নতুন পূৰ্বতকৈ অধিক সুস্থিৰতা ঘূৰি আহিছে। ২৯ ডিচেম্বৰত বিজেপিৰ ৰাষ্ট্ৰীয় সাধাৰণ সম্পাদক তথা অসমৰ প্ৰভাৰী ৰাম মাধৱে তেজপুৰত সাংবাদিকৰ আগত এই ইংগিত দিয়ে।
ৰাম মাধৱে কয়, ‘আগন্তুক লোকসভা নিৰ্বাচনত দুয়োটা অগপ-বিজেপিৰ মাজত মিত্ৰতা বাহাল থাকিব।‘
উল্লেখযোগ্য যে নাগৰিকত্ব সংশোধনী বিধেয়কক লৈ অগপই বিজেপিৰ নীতিৰ তীব্ৰ বিৰোধিতা কৰি আহিছে আৰু বিধেয়কখন গৃহীত হ’লে তেওঁলোকে মিত্ৰতা ভংগ কৰিব বুলি হুমকি দি আহিছে। আনহাতে মিত্ৰতাৰে ৰাজ্যত চৰকাৰ গঠন কৰি থকা সত্ত্বেও অগপ আৰু বিজেপি দল দুটাই সুকীয়া সুকীয়াকৈ পঞ্চায়ত নিৰ্বাচনত অৱতীৰ্ণ হৈছিল। অৱশ্যে পঞ্চায়ত নিৰ্বাচনত শোচনীয় ফল লাভ কৰাৰ পিছতে অগপৰ আগৰ দৃঢ় কণ্ঠ নোহোৱা হোৱা দেখা গৈছে।
২৯ ডিচেম্বৰত বিজেপি অসমৰ প্ৰভাৰী ৰাম মাধৱে তেজপুৰ আৱৰ্ত ভৱনত অগপৰ স্থানীয় বিধায়ক তথা জ্যেষ্ঠ নেতা বৃন্দাবন গোস্বামীৰ সৈতে এখন বৈঠকত মিলিত হয়।
ইয়াক সৌজন্যমূলক সাক্ষাৎ বুলি কয় যদিও বৈঠকৰ পিছতে ৰাম মাধৱে দল দুটাৰ মিত্ৰতা আগন্তুক লোকসভা নিৰ্বাচনত বাহাল থকাৰ ইংগিত দিয়ে।
ৰাম মাধৱৰ এই ঘোষণাই অসম বিজেপিৰ সভাপতি ৰঞ্জিত দাসে পঞ্চায়ত নিৰ্বাচনৰ পিছতে বিজেপিৰ ৰাষ্ট্ৰীয় সভাপতি অমিত শ্বাহলৈ পঞ্চায়ত নিৰ্বাচনত অগপই শত্ৰুৰ দৰে আচৰণ কৰা বুলি যি পত্ৰ প্ৰেৰণ কৰিছিল, তাৰ একো প্ৰভাৱ নপৰাৰ ইংগিত দিলে।
আনহাতে অগপৰ দলীয় নেতৃত্বয়ো পঞ্চায়ত নিৰ্বাচনৰ পিছত একাধিকবাৰ বৈঠকত মিলিত হৈছে যদিও মিত্ৰতা ভংগৰ হুংকাৰ ঢিলাই দিয়াটোৱেও দল দুটাৰ মাজৰ বুজাবুজি ভিতৰি ঠিকেই থকাটো প্ৰমাণ কৰে।
