বিজেপি উত্থাপিত নাগৰিকত্ব বিধেয়কক লৈ সৃষ্ট ৰাজ্যজোৰা প্ৰতিবাদৰ মাজত এতিয়াও “কঠোৰ সিদ্ধান্ত” নোলোৱা অগপৰ ভিতৰচ’ৰাত বিস্ফোৰণৰ উকমুকনি তুলিছে তৃণমূল কৰ্মীৰ এখন পত্ৰই।
কিন্তু খোদ প্ৰধান মন্ত্ৰী নৰেন্দ্ৰ মোদীয়ে অসমৰ মাটিতে বিধেয়কখনকলৈ মুকলি সমৰ্থন আগবঢ়োৱাৰ পাছতো এতিয়াও সাক্ষাৎ আৰু পত্ৰ প্ৰেৰণৰ ৰাজনীতিত অটল আছে আঞ্চলিক দলটোৰ সভাপতি অতুল বৰা।
মিত্ৰ বিজেপিক ধাৰাবাহিকভাৱে অগপ শীৰ্ষ নেতৃত্বই দি অহা “কঠোৰ সিদ্ধান্ত”ৰ সকীয়নিৰ সলনি “সোনকালে গ্ৰহণ”ৰ বাবে মন্ত্ৰী তথা দলটোৰ সভাপতিজনলৈ পত্ৰ প্ৰেৰণ কৰিছে অগপৰ গুৱাহাটী সমিতিয়ে।
“দলে বিগত দিনত গ্ৰহণ কৰা কঠোৰ সিদ্ধান্ত কাৰ্য্যকৰী কৰাত যাতে পলম নকৰে তাৰ বাবে আমি মহানগৰ সমিতিয়ে অনুৰোধ জনাইছো,” সভাপতিলৈ পত্ৰত অনুৰোধ মহানগৰ সমিতিৰ সভাপতি জিতেন ডেকা, কাৰ্য্যকৰী সভাপতি হেমেন লহকৰ আৰু সাধাৰণ সম্পাদকদ্বয় গিৰীণ তালুকদাৰ আৰু খনীন্দ্ৰ বৰাৰ।
মিত্ৰ বিজেপি নেতৃত্বাধীন চৰকাৰে বিধেয়কৰ যোগেদি অবৈধ বাংলাদেশীক সাম্প্ৰদায়িকতাৰে বিভক্ত কৰি অসমত সংস্থাপন কৰাৰ যি সিদ্ধান্ত গ্ৰহণ কৰিছে, সেই ক্ষেত্ৰত দলৰ শীৰ্ষ নেতৃত্বৰ স্থিতিৰ বিপৰীতে ‘আত্ম সন্মানত আঘাত লাগিছে’ অগপৰ তৃণমূল কৰ্মীৰ। সেয়ে কৰ্মীসকলৰ ‘আত্ম সন্মান’ ৰক্ষা কৰিবলৈ সভাপতি অতুল বৰালৈ কাতৰ অনুৰোধ জনাইছে অগপৰ তৃণমূল কৰ্মীয়ে।
এই সন্দৰ্ভত দলটোৰ গুৱাহাটী মহানগৰ সমিতিয়ে দলৰ নেতৃত্বলৈ এখন পত্ৰ প্ৰেৰণ কৰিছে। সম্প্ৰতি এই পত্ৰই খলকনি তুলিছে অগপৰ আমবাৰী কাৰ্যালয়ত।
বিজেপিৰ সৈতে মিত্ৰতা ত্যাগৰ কঠোৰ সিদ্ধান্ত গ্ৰহণ কৰাত নেতৃত্বক পলম নকৰিবলৈ মহানগৰ সমিতিয়ে এই পত্ৰযোগে কাতৰ অনুৰোধ জনাইছে। লগতে দলৰ বিভিন্ন নেতাৰ কৰ্মকাণ্ডই মহানগৰ সমিতিৰ নেতৃত্বৰ লগতে তৃণমূল কৰ্মীসকলৰ মনোবল হ্ৰাস কৰিছে বুলিও পত্ৰখনত উল্লেখ কৰিছে।
‘অসমৰ বৰ্তমানৰ সংকটময় পৰিস্থিতিৰ সময়ত দলে এক শক্তিশালী অৱস্থান গ্ৰহণ কৰি সমগ্ৰ জাতিটোক এক ভয়াৱহ ভৱিষ্যতৰ পৰা মুক্ত কৰাৰ নেতৃত্ব গ্ৰহণ কৰাৰ বাবে আপোচবিহীন সিদ্ধান্ত গ্ৰহণ কৰা উচিত বুলি আমি অনুভৱ কৰো’, পত্ৰখনত মহানগৰ সমিতিয়ে উল্লেখ কৰিছে।
বিজেপিৰ সৈতে মিত্ৰতাত থাকি অগপই সম মৰ্যাদা নোপোৱা, বিজেপিয়ে দম্ভ, অহংকাৰ, শালীনতা চেৰাই যোৱা পৰিলক্ষিত হোৱা বুলিও উল্লেখ আছে পত্ৰখনত।
‘এক আত্মসন্মান থকা দলীয় কৰ্মী হিচাপে আমি মহানগৰ সমিতিৰ সকলো সদস্যই মৰ্মাহত হৈছো’ বুলিও মহানগৰ সমিতিয়ে খেদ প্ৰকাশ কৰিছে।
