নাগৰিকত্ব সংশোধনী বিধেয়কৰ বিৰোধিতাৰে চলি অহা ধাৰাবাহিক প্ৰতিবাদী আন্দোলনৰ লগতে শেহতীয়াকৈ ছয় জনগোষ্ঠীক জনজাতিকৰণৰ সমৰ্থন আৰু বিৰোধিতাৰে বিভিন্ন সংগঠনে গ্ৰহণ কৰা প্ৰতিবাদী কাৰ্যসূচীসমূহে অসম মাধ্যমিক শিক্ষা পৰিষদক উদ্বিগ্ন কৰি তুলিছে।
ইতিমধ্যে পৰীক্ষাৰ সূচী ঘোষণা কৰা হাইস্কুল শিক্ষান্ত আৰু উচ্চতৰ মাধ্যমিক চূড়ান্ত পৰীক্ষা সমাগত। মাধ্যমিক শিক্ষা পৰিষদ, অসম (ছেবা) আৰু মাধ্যমিক শিক্ষা সংসদ এই পৰীক্ষাৰ বাবে ইতিমধ্যে সাজু হৈছে। কিন্তু ৰাজ্যখনৰ শেহতীয়া পৰিস্থিতিৰ বাবে উদ্বিগ্ন হৈ পৰিছে ছেবা।
বৰ্তমান পৰিস্থিতিলৈ লক্ষ্য ৰাখি হাইস্কুল শিক্ষান্ত পৰীক্ষাৰ সময়ত দল-সংগঠনসমূহক ছেবাই বন্ধ নিদিবলৈ আহ্বান জনাইছে। নিৰ্দ্ধাৰিত সূচী অনুসৰি অহা ২২ আৰু ২৪ জানুৱাৰিত হাইস্কুল শিক্ষান্ত পৰীক্ষাৰ ব্যাৱহাৰিক বিষয়ৰ পৰীক্ষা অনুষ্ঠিত হ’ব।
ছেবাই জানিব দিয়া মতে, ইতিমধ্যে আহ্বান জনোৱা বন্ধৰ ফলত ব্যাৱহাৰিক বিষয়ৰ উত্তৰবহী কঢ়িওৱা ট্ৰাক বহু স্থানত আবদ্ধ হৈ আছে। এনে পৰিস্থিতিত ছেবাৰ পৰীক্ষা নিয়ন্ত্ৰক নয়নজ্যোতি শৰ্মাই ৰাজ্যখনৰ পৰীক্ষাৰ্থীসকলৰ স্বাৰ্থৰ প্ৰতি লক্ষ্য ৰাখি পৰীক্ষাৰ সময়ছোৱাত দল-সংগঠনসমূহক বন্ধ ঘোষণা নকৰিবলৈ আহ্বান জনাইছে।
