গণৰাজ্য দিৱসত নাগৰিকক অপমান কৰাৰ অধিকাৰ ক’ত পালে মুখ্য মন্ত্ৰী সোণোৱালে?

ক্ৰমবৰ্ধমান, জনবহুল গুৱাহাটীৰ বুকুত ৰাজ্যিক চিৰিয়াখানাৰ সমীপৰ শ্ৰদ্ধাঞ্জলি কানন উশাহ লোৱাৰ অকমান মুকলি ঠাই মহানগৰবাসীৰ। অন্ততঃ সেই উদ্দেশ্যেৰেই উদ্যানখনৰ ব্যৱস্থা কৰিছিল জি এম ডি এ’ই।

ব্যস্ত মহানগৰীৰ অলপ মুকলি উশাহ ল’বলৈ উদ্যানখনত প্ৰতিদিনে কাহিলী পুৱাৰে পৰা আগমন হয় অসংখ্য লোকৰ। ডেকা-ডেকেৰীতকৈ সেইসকলৰ মাজত জ্যেষ্ঠ লোকৰ সংখ্যা বেছি। আকৌ এদিন সুস্থ হোৱাৰ আশাত পক্ষাঘাতত আক্ৰান্ত ৰোগীসকলো আনৰ হাতত ধৰি তাত খোজ দিবলৈ আহে। ইয়াত আছে এটা লাফিং ক্লাবো।

আৰু গণৰাজ্য দিৱসৰ দিনাই “মুখ্য মন্ত্ৰীৰ কাৰ্য্যসূচী থকাৰ বাবে” পুৱাৰে পৰা হঠাতে বন্ধ কৰি দিয়া হ’ল উদ্যানখন। নাই কোনো আগতীয়া জাননী।

উদ্যানখনৰ প্ৰৱেশ পথত দণ্ডায়মান অসম আৰক্ষীৰ জোৱানে এজন এজনকৈ ঘূৰাই পঠাইছে উদ্যানখনত প্ৰতিদিনে পুৱা সমাগম হোৱা প্ৰায় ৫০০গৰাকী লোকক।

প্ৰতিদিনে যোৱাৰ দৰে তাত খোজ কাঢ়িবলৈ গৈ পুৱা ৬ বজাতে উপস্থিত হোৱা এজন জ্যেষ্ঠ লোকে এই নিষিদ্ধতাৰ বিৰুদ্ধে প্ৰতিবাদ জনোৱাত আৰক্ষীৰ উত্তৰ, “ওপৰৰ নিৰ্দেশ আছে।” ব্যক্তিজনে নিৰ্দেশৰ জাননী চাব খোজাত আহি ওলাল গুৱাহাটীৰ নতুন আৰক্ষী আয়ুক্ত দীপক কুমাৰ!

“আজিলৈ এৰক আৰু। চি এমৰ কাৰ্য্যসূচী আছে,” কৰমৰ্দনেৰে জ্যেষ্ঠ নাগৰিকজনক এই দিহা আই পি এছ কুমাৰৰ!

গণৰাজ্য দিৱস বা আন যিকোনো দিনতে স্বদেশৰ নাগৰিকৰ চলাচলৰ স্বাধীনতাত এইটো কি ধৰণৰ হস্তক্ষেপ, প্ৰশ্ন খোজ কাঢ়িবলৈ গৈ বিমুখ হোৱা ভাৰতৰ নাগৰিকজনৰ। “গণৰাজ্য দিৱসৰ ৰাতিপুৱাতে এইটো নাগৰিকলৈ মুখ্য মন্ত্ৰীৰ কি ধৰণৰ উপহাৰ?” প্ৰশ্ন নাম প্ৰকাশ কৰিব নোখোজা আন এজন ব্যক্তিৰ। নাম প্ৰকাশ কৰিব নোখোজাৰ কাৰণ “‘Obvious’, you know, democracy, republic!”, নিৰীহ নাগৰিকৰ উত্তৰ।

মনত পেলাব নিশ্চয় পাৰি, শাসনলৈ আহি এইজন মুখ্য মন্ত্ৰী সোণোৱালে সাধাৰণ নাগৰিকৰ সৈতে ত্ৰেফিক নিয়ম মানিছিল। তাক লৈ চলিছিল ব্যাপক চৰ্চা। এতিয়া নামানে! নিজৰ চাবুৱাৰ ঘৰলৈ ৰে’লত গৈছিল। এতিয়া হেলিকপ্তাৰত উৰে।

সেয়া দেখুৱাবলৈ আছিল, ৫ বছৰ নৌহওঁতেই সময়ে প্ৰমাণ কৰিলে।

গণতন্ত্ৰৰ আধাৰ ইয়াৰ জনসাধাৰণ, দেশৰ নাগৰিক। নহ’লে কাৰ বাবে এই গণতন্ত্ৰ, আৰু কাৰ দ্বাৰা?

গণৰাজ্য দিৱসত নাগৰিকক অপমান কৰাৰ অধিকাৰ ক’ত পালে মুখ্য মন্ত্ৰী সোণোৱালে?