নগাঁও জিলাৰ চামগুৰি আৰক্ষী থানাৰ অন্তৰ্গত আমনিত আজি এখন গেছ ভৰ্তি টেংকাৰ দুৰ্ঘটনাগ্ৰস্ত হৈ এজন লোকে প্ৰাণ হেৰুৱাব লগা হয়। নিহত লোকজনক টেংকাৰখনৰ চালক গোপাল শৰ্মা (৫৩) বুলি চিনাক্ত কৰা হৈছে।
প্ৰাপ্ত তথ্য মতে আজি পুৱা প্ৰায় ৪:৩০ বজাত বঙাইগাঁৱৰ পৰা গুৱাহাটী হৈ তিনিচুকীয়ালৈ গেছ সৰবৰাহৰ বাবে গৈ থকা এ এছ ২৬ চি ৫১১০ নম্বৰৰ টেংকাৰখনে আমনিৰ আমতলত ৩৭নং ৰাষ্ট্ৰীয় ঘাইপথৰ ওপৰত থকা পকী দলঙৰ ৰেলিং ভাঙি দ’ খাৱৈত বাগৰি পৰে।
আনহাতে দুৰ্ঘটনাগ্ৰস্ত টেংকাৰখনৰ পৰা গেছ নিৰ্গত হোৱা ঘটনাই কাষৰ অঞ্চলবাসীৰ মাজত তীব্ৰ উত্তেজনা সৃষ্টি কৰিছে। চামগুৰি আৰক্ষীয়ে খবৰ পাই ঘটনাস্থলীত উপস্থিত হৈ সমাগম ঘটা লোকসকলক নিৰ্দিষ্ট দূৰলৈ আঁতৰাই দিছে।
ইয়াৰ উপৰি প্ৰশাসনে সংশ্লিষ্ট কোম্পানীৰ লগত যোগাযোগ কৰিছে যদিও গুৱাহাটীৰ পৰা অইল কোম্পানীৰ কোনো মানুহ আহি নোপোৱাত টেংকাৰখনৰ পৰা বাতৰি লিখা পৰ্যন্ত গেছ নিৰ্গত হৈ থকা পৰিলক্ষিত হৈছে। অৱশ্যে দুৰ্ঘটনাস্থলীত যাতে কোনো অঘটন নঘটে আৰক্ষী প্ৰশাসনে তাৰ বাবে ব্যৱস্থা গ্ৰহণ কৰিছে বুলি জানিব পৰা গৈছে।
দুৰ্ঘটনাটোত প্ৰাণ হেৰুৱা টেংকাৰখনৰ চালকগৰাকীৰ ঘৰ পশ্চিমবংগৰ কলিকতাত বুলি আৰক্ষীয়ে জানিবলৈ দিয়ে।
