নাগৰিকত্ব সংশোধনী বিধেয়ক লোকসভাত গৃহীত হোৱাৰ পাছত প্ৰধান মন্ত্ৰী নৰেন্দ্ৰ মোদীৰ প্ৰথমটো উত্তৰ-পূব ভ্ৰমণত চৌদিশ প্ৰতিবাদৰ ধ্বনিৰে উত্তাল হ’ল অসম।
আজি মোদীয়ে চাংসাৰিৰ কাৰ্য্যসূচীত ভাষণ প্ৰদান কৰি থকা মুহূৰ্তটোতে ৰাজ্যৰ সৰ্বত্ৰে সদৌ অসম ছাত্ৰ সন্থাই ৰাজ্যজুৰি মোদীৰ পুত্তলিকা দাহ কৰি তেওঁৰ উত্তৰ-পূব ভ্ৰমণৰ বিৰোধিতা কৰে। সংগঠনটোৱে গুৱাহাটীৰ চহিদ ভৱনৰ সন্মুখত প্ৰধান মন্ত্ৰীৰ পুত্তলিকা দাহ কৰাৰ লগতে হাতে হাতে ক’লা পতাকা লৈ শ্ল’গান দিয়ে। মহানগৰীত জাৰি কৰি ৰখা ১৪৪ ধাৰাক সম্পূৰ্ণ অৱজ্ঞা কৰে ছাত্ৰ সংগঠনটোৱে।
কাৰ্যসূচীটোৰ নেতৃত্ব দি সদৌ গুৱাহাটী ছাত্ৰ সন্থাৰ সভাপতি ৰজমিল আলীয়ে কয়, “আছু আৰু ৩০টা জনগোষ্ঠীয় সংগঠন, অসম সাহিত্য সভাকে ধৰি বিভিন্ন দল-সংগঠন আৰু অসম তথা উত্তৰ-পূৰ্বাঞ্চলৰ ৰাইজে বিৰোধিতা কৰি থকাৰ পাছতো এই প্ৰতিবাদৰ ভাষা নৰেন্দ্ৰ মোদী নেতৃত্বধীন বিজেপি চৰকাৰে বুজি নাপালে। নৰেন্দ্ৰ মোদী এজন মিছলীয়া প্ৰধান মন্ত্ৰী, সেই কথাও এতিয়া প্ৰমাণিত হ’ল”।
তেওঁ লগতে ‘জাতিধ্বংসী’ নাগৰিকত্ব সংশোধনী বিধেয়ক বাতিল নকৰা পৰ্যন্ত ছাত্ৰ সন্থা ক্ষান্ত নহয় বুলিও মন্তব্য কৰে।
ইপিনে একে সময়তে ডিব্ৰুগড়তো প্ৰধান মন্ত্ৰীৰ ভ্ৰমণৰ বিৰোধিতা কৰে ডিব্ৰুগড় জিলা ছাত্ৰ সন্থাই। মোহনবাৰীত বিমানবন্দৰৰ সমীপত ক’লা বেলুন উৰুৱাই সংগঠনটোৰ কৰ্মীসকলে এই প্ৰতিবাদ সাব্যস্ত কৰে।
গহপুৰতো আছুৰ উপৰি কেইবাটাও সংগঠনে মোদীৰ পুত্তলিকা দাহ কৰি ক’লা পতাকা লৈ প্ৰতিবাদ সাব্যস্ত কৰি নাগৰিকত্ব সংশোধনী বিধেয়ক বাতিলৰ দাবী উত্থাপন কৰে।
গোৱালপাৰাৰ দুধনৈত ৩৭ নং ৰাষ্ট্ৰীয় ঘাইপথৰ ওপৰত নৰেন্দ্ৰ মোদীৰ পুত্তলিকা দাহৰ লগতে কিছু সময়ৰ বাবে পথটো অৱৰোধ কৰি ৰাখে ছাত্ৰ সন্থাৰ প্ৰতিবাদকাৰীয়ে।
এইদৰে অসমৰ উজনিৰ পৰা নামনিলৈ সদৌ অসম ছাত্ৰ সন্থাই মোদীৰ ভ্ৰমণৰ বিৰোধিতাৰে ব্যপক প্ৰতিবাদ সাব্যস্ত কৰে।
ইপিনে, প্ৰধান মন্ত্ৰী নৰেন্দ্ৰ মোদীয়ে আজি চাংসাৰিত এইমছৰ ভূমি পূজন কৰে। ইয়াৰ উপৰি গুৱাহাটী উত্তৰ-গুৱাহাটী সংযোগী দলঙৰো আধাৰশিলা স্থাপন কৰে।
মোদীয়ে আধাৰশিলা স্থাপন কৰা এই প্ৰকল্পসমূহ কোনো কাৰণত বিজেপিৰ কৃতিত্ব হ’ব নোৱাৰে বুলি মন্তব্য কৰি “এয়া অসমৰ ৰাইজৰ প্ৰাপ্য আৰু আমাৰ প্ৰাপ্য আমি পামেই” বুলিহে দাবী কৰে আছুৰ মুখ্য উপদেষ্টা ড০ সমুজ্বল কুমাৰ ভট্টাচাৰ্যই। এইমছ স্থাপনৰ অসম চুক্তিৰ ৭ নম্বৰ দফা অনুসৰি ত্ৰিপাক্ষিক বৈঠকত সিদ্ধান্ত হৈছিল বুলিও তেওঁ কয়।
উন্নয়নমূলক কাম হ’বই লাগিব বুলি কৈ ‘কিন্তু অসমৰ ৰাইজে ‘জাতিধ্বংসী’ বিধেয়কখন মানি নলয় আৰু ইয়াক বাতিল কৰিবই লাগিব’ বুলিও তেওঁ স্পষ্ট কৰি দিয়ে।
“চৰকাৰৰ উদ্যোগত সভা পাতি মানুহ গোটাই দেখুৱাব বিচাৰিছে। কিন্তু সমগ্ৰ অসমত জিলা, মহকুমা, অঞ্চলে অঞ্চলে আজি প্ৰতিবাদ হৈছে। চৰকাৰী অনুষ্ঠানৰ মানুহৰ সংখ্যা যিমানেই নেদেখুৱাওক কিয় অসমৰ ৰাইজৰ প্ৰতিবাদ তাতকৈ বহুগুণেই শক্তিশালী”, সমুজ্বল ভট্টাচাৰ্য।
তেওঁ লগতে বিধেয়ক বাতিল নোহোৱা পৰ্যন্ত সমগ্ৰ উত্তৰ-পূৰ্বাঞ্চলত আন্দোলন চলিয়েই থাকিব বুলিও হুংকাৰ দিয়ে।
