সামৰণি পৰিল শ্ৰীমন্ত শংকৰদেৱ সংঘৰ ৮৮ সংখ্যক মৰিগাঁও অধিৱেশনৰ। লাখ লাখ ভকত-বৈষ্ণৱৰ সমাগমেৰে দ্বিতীয় বৈকুণ্ঠত পৰিণত হ’ল সাহিত্যৰথী লক্ষ্মীনাথ বেজবৰুৱা সমন্বয় ক্ষেত্ৰ। হৰিনামৰে মুখৰিত হৈ পৰিল চৌদিশ।
কিন্তু অধিৱেশনৰ চাৰিওটা দিনতেই অব্যহৃত হৈ থাকিল কোটি টকা খৰচ কৰি বিশেষভাৱে নিৰ্মাণ কৰা অস্থায়ী হেলিপেড। আনকি কাৰ বাবে হেলিপেড নিৰ্মাণ কৰা হৈছিল সেই কথাও স্পষ্ট নহ’ল।
অধিৱেশনৰ মূল মণ্ডপৰ পৰা প্ৰায় ৫০০ মিটাৰ নিলগত প্ৰশাসনে নিৰ্মাণ কৰিছিল অস্থায়ী হেলিপেডখন। প্ৰায় ৪ বিঘা কৃষিভূমিৰ ওপৰত তিনিখন হেলিকপ্টাৰ অৱতৰণ কৰিব পৰা হেলিপেডখনৰ লগতে তাৰ পৰা মূল মণ্ডপ সংলগ্ন কৰি নিৰ্মাণ হৈছিল এটা পকী পথো। জানিব পৰা মতে হেলিপেড আৰু পকী পথছোৱা নিৰ্মাণৰ বাবত খৰচ হৈছিল প্ৰায় ২ কোটি টকা।
কিন্তু অপচয়ত পৰিণত হ’ল এই বৃহৎ পৰিমাণৰ ধনৰাশি। চাৰিদিনীয়া অধিৱেশনখনত এখনো হেলিকপ্টাৰ এই হেলিপেডত অৱতৰণ নহ’ল। গতিকে প্ৰশ্ন হয় কাৰ বাবে ৰাজকোষৰ ধৰ খৰচ কৰি নিৰ্মাণ কৰা হৈছিল এই হেলিপেডখন।
অধিৱেশনৰ পূৰ্বে প্ৰধান মন্ত্ৰী নৰেন্দ্ৰ মোদী শ্ৰীমন্ত শংকৰদেৱ সংঘৰ মৰিগাঁও অধিৱেশনত ভাগ ল’ব বুলি এক বাতৰি প্ৰকাশ পাইছিল। মন্ত্ৰী হিমন্ত বিশ্ব শৰ্মায়ো প্ৰধান মন্ত্ৰীয়ে ৮ আৰু ৯ ফেব্ৰুৱাৰিৰ উত্তৰ-পূব ভ্ৰমণৰ কোনোবা এটা সময়ত অধিৱেশনত ভাগ ল’ব পাৰে বুলি মন্তব্য কৰিছিল। কিন্তু মোদী সঁচাকৈয়ে আহিব লগীয়া আছিল নে নাই তাৰ নিশ্চিত তথ্য পোৱা নগ’ল।
ইপিনে, অধিৱেশনৰ কাৰ্যসূচীত নাম নাছিল প্ৰধান মন্ত্ৰী নৰেন্দ্ৰ মোদীৰ। সংঘই অধিৱেশনৰ কেইবামাহৰো পূৰ্বে প্ৰধান মন্ত্ৰীক আমন্ত্ৰণ জনাই পত্ৰ প্ৰেৰণ কৰিছিল যদিও পাছত নাগৰিকত্ব সংশোধনী বিধেয়কৰ বিৰোধিতাৰে সেই আমন্ত্ৰণ বাতিল কৰা বুলি নৱনিৰ্বাচিত পদাধিকাৰ কমলাকান্ত গগৈয়ে আমাক জানিবলৈ দিছিল।
আনহাতে, শংকৰ সংঘৰ মৰিগাঁও অধিৱেশনলৈ নৰেন্দ্ৰ মোদী অহাৰ কোনো তথ্য নথকাৰ কথা আৰক্ষী প্ৰশাসনেও প্ৰকাশ কৰিছিল।
প্ৰধান মন্ত্ৰী নাহিলেও তেওঁৰ সলনি হেলিপেডখনত মুখ্য মন্ত্ৰী সৰ্বানন্দ সোণোৱালৰ হেলিকপ্টাৰ অৱতৰণ কৰিব পাৰে বুলি ভৱাৰ থল আছিল। কিয়নো ক’লা পতাকাৰ ভয়ত শেহতীয়াভাৱে কেইবাদিনো মুখ্য মন্ত্ৰী সোণোৱালে আকাশমাৰ্গেৰে গৈয়ে বিভিন্ন কাৰ্যসূচীত ভাগ লোৱা দেখা গৈছে। কালি অৰ্থাৎ ৮ ফেব্ৰুৱাৰিত অধিৱেশনৰ মুকলি সভাত মুখ্য মন্ত্ৰীগৰাকী মুখ্য অতিথি হিচাপে নিমন্ত্ৰিতও হৈছিল। কিন্তু অধিবেশনলৈ নগ’ল মুখ্য মন্ত্ৰী সোণোৱালো।
গতিকে কৃষি ভূমি বিনষ্ট কৰি শিল, চিমেণ্ট, বালিৰে নিৰ্মাণ কৰা কোটিটকীয়া অস্থায়ী হেলিপেড আৰু মূল মণ্ডপ সংযোগী পকী পথটো ব্যৱহাৰ নোহোৱাকৈয়ে পৰি ৰ’ল।
ইপিনে, অধিৱেশনলৈ মুখ্য মন্ত্ৰীৰ উপৰি হিমন্ত বিশ্ব শৰ্মা, চন্দ্ৰমোহন পাটোৱাৰীকে ধৰি বিজেপি চৰকাৰৰ কেইবাজনো মন্ত্ৰী নিমন্ত্ৰিত হৈছিল যদিও উপস্থিত নাথাকিল কোনো এজন। অৱশ্যে ৰাজ্যিক বিজেপিৰ সভাপতি ৰঞ্জিত দাস উপস্থিত হৈ কালিৰ ভাগৱত ভ্ৰমণত ভাগ লয়।
ইয়াৰ বিপৰীতে ৯ ফেব্ৰুৱাৰিত সামৰণিৰ দিনাৰ কাৰ্যসূচীত উপস্থিত থাকে দুই প্ৰাক্তন মুখ্য মন্ত্ৰী প্ৰফুল্ল কুমাৰ মহন্ত আৰু তৰুণ গগৈ।
