অসম চৰকাৰৰ অৱসৰপ্ৰাপ্ত অতিৰিক্ত মুখ্য সচিৱ এম জি ভি কে ভানুৱে আজি গুৱাহাটীৰ ৰাজীৱ ভৱনত আনুষ্ঠানিকভাৱে কংগ্ৰেছত যোগদান কৰে। প্ৰদেশ কংগ্ৰেছৰ সভাপতি ৰিপুন বৰাৰ উপস্থিতিত আয়োজিত এক অনুষ্ঠানত দলটোত যোগদান কৰে অৱসৰপ্ৰাপ্ত আমোলাজনে।
লোকসভা নিৰ্বাচনৰ আগমুহূৰ্তত এই যোগদান গুৰুত্বপূৰ্ণ বুলি বিবেচিত হৈছে। কিয়নো আগন্তুক লোকসভা নিৰ্বাচনত এম জি ভি কে ভানুৱে তেজপুৰ লোকসভা সমষ্টিৰ পৰা প্ৰতিদন্দ্বিতা কৰিব বুলি চৰ্চিত হৈ আছিল।
আনহাতে, আজি ভানুৰ কংগ্ৰেছত যোগদানৰ লগে লগে সেই কথা অধিক স্পষ্ট হৈ পৰে। ভানুৱে কংগ্ৰেছ দলত আনুষ্ঠানিকভাৱে যোগদান কৰি দিয়া ভাষণত ২০১৯ৰ লোকসভা নিৰ্বাচনত প্ৰাৰ্থিত্ব আগবঢ়াব বুলি সদৰী কৰে।
‘’মই তেজপুৰখন ভালপাওঁ। তাত মই ঘৰ সাজি থকাৰ ব্যৱস্থা কৰিছো। ভগবানে যদি দিয়ে তেজপুৰৰ উন্নয়নৰ বাবে কাম কৰিব বিচাৰো,’’-ভানুৱে কয়।
অৱশ্যে, এবছৰ পূৰ্বে অৱসৰ গ্ৰহণ কৰা ভানুৱে লগতে কয় যে দলে প্ৰাৰ্থিত্ব নিদিলেও তেওঁৰ আপত্তি নাথাকিব আৰু যিজনকে তেজপুৰত প্ৰাৰ্থিত্ব দিয়ে তেওঁক বিজয়ী কৰিবলৈ তেওঁ কষ্ট কৰিব।
আনহাতে, ৰাজীৱ ভৱনত অনুষ্ঠিত আজিৰ যোগদান সমাৰোহত অৱসৰপ্ৰাপ্ত শীৰ্ষ আৰক্ষী বিষয়া বীৰেন গগৈ, লক্ষ্মী গোস্বামী, মনিমালা হাজৰিকাকে ধৰি কেইবাজনো ব্যক্তিয়ে কংগ্ৰেছত যোদগান কৰে।
