জম্মু আৰু কাশ্মীৰৰ পুলৱামাত পাকিস্তানী সন্ত্ৰাসবাদীৰ বৰ্বৰতাৰ প্ৰতিবাদত স্বতঃস্ফূৰ্তভাৱে ৰাজপথলৈ ওলাই আহিল পাহাৰীয়া জিলা সদৰ হাফলঙৰ ৰাইজ। হাফলং লেডিছ ৱেলফেয়াৰ অৰ্গেনাইজেইশ্যনৰ লগতে স্থানীয় একাধিক দল-সংগঠন, ছাত্ৰ সমাজ, ব্যবসায়ী সংস্থাৰ উদ্যোগত চহৰখনত ১৬ ফেব্ৰুৱাৰিৰ সন্ধিয়া এটা প্ৰতিবাদী সমদল উলিওৱা হয়।
সৰ্বস্তৰৰ ৰাইজে হাতে হাতে মমবাতি লৈ চহিদ বীৰ জোৱানৰ আত্মবলিদান সুঁৱৰি শ্ৰদ্ধাঞ্জলি জ্ঞাপন কৰে। হাফলং চিনোড ৰটাৰিত বন্তি প্ৰজ্বলনৰে শুভাৰম্ভ কৰি হাতে হাতে প্লেকাৰ্ড লৈ এনে বৰ্বৰতাৰ প্ৰতিবাদত সমদল উলিয়ায়। প্ৰতিবাদকাৰীসকলৰ পাকিস্তান মুৰ্দাবাদ ধ্বনিত উত্তাল হৈ পৰে হাফলঙৰ আকাশ-বতাহ। সমদল হাফলং চহৰৰ প্ৰধান পথেৰে আহি জিলাৰ উপায়ুক্ত কাৰ্যালয় চৌহদত আহি অন্ত পৰে। জিলা উপায়ুক্তৰ কাৰ্যালয়ৰ সম্মুখত স্থাপন কৰা অস্থায়ী চহিদ বেদীত জোৱানকেইগৰাকীৰ আত্মাৰ সদ্গতিৰ অৰ্থে শ্ৰদ্ধাঞ্জলি অৰ্পণ কৰাৰ লগতে চহিদৰ আত্মাৰ চিৰশান্তি কামনা কৰি এক মিনিট নীৰৱতা পালন কৰা হয়।
সন্ত্ৰাসবাদী কাৰ্যকলাপক উপস্থিত ৰাইজে তীব্ৰ ভাষাৰে সকলোৱে গৰিহণা দিয়াৰ লগতে সন্ত্ৰাসবাদীক কঠোৰ হাতেৰে দমন কৰাৰ কাৰণে চৰকাৰক আহ্বান জনায়।
ডিমাচা এপেক্স ব’ডি জাদিখে নাইশ্বো হছমৰ সাধাৰণ সম্পাদক ফ্ৰেজাৰ চেংগুইনে কয় “কাশ্মীৰৰ পুলৱামাত চি আৰ পি এফ জোৱানৰ কনভয়ত যি বৰ্বৰ আক্ৰমণ, তাক গৰিহণা দিয়াৰ ভাষা নাই। আমি চৰকাৰক এটাই আহ্বান জনাওঁ যে যিকোনো বিনিময়ত কাশ্মীৰ বা ভাৰতভূমিক সন্ত্ৰাসমুক্ত কৰিব লাগে।”
একে ভাষাত গৰিহণা দিয়ে হাফলং লেডিছ ৱেলফেয়াৰ অৰ্গেনাইজেইশ্যনৰ সাধাৰণ সম্পাদক গোপা চৌধুৰীয়ে। তেওঁ কয়, “আৰু সহ্য নহয় ।এতিয়া জবাব দিয়াৰ সময়।” লগতে তেওঁ চহিদ পৰিয়ালক সমবেদনা জ্ঞাপন কৰে। আজিৰ প্ৰতিবাদত আৰক্ষীৰ লগতে চি আৰ পি এফ বাহিনীৰ সদস্যসকলেও অংশগ্ৰহণ কৰে ।
