‘অসম চুক্তি’ স্বাক্ষৰিত হোৱাৰ সূদীৰ্ঘ ৩৩ বছৰৰ পাছত ঐতিহাসিক অসম আন্দোলনত ৮৫৫জন অসমীয়াৰ মৃত্যুক লৈ এতিয়া ৰাজ্যত চলিছে ইজনে সিজনৰ গালৈ দায় ঠেলাৰ ৰাজনীতি। এই ৰাজনীতিত অসন্তুষ্ট জাতীয় চহিদ পৰিয়াল।
প্ৰাক্তন মুখ্য মন্ত্ৰী তৰুণ গগৈয়ে ১৮ ফেব্ৰুৱাৰিত অসম আন্দোলনৰ ৮৫৫জন অসমীয়াই চহিদ হ’ব লগীয়া হোৱাৰ বাবে সদৌ অসম ছাত্ৰ সন্থা আৰু তেতিয়াৰ আছুৰ সভাপতি প্ৰফুল্ল কুমাৰ মহন্তক দোষাৰোপ কৰাৰ পিছৰ দিনটোত গগৈক উভতি ধৰিলে মহন্তই।
গুৱাহাটীৰ হোটেল ৰাজধানী ৰিজেন্সিত এখন সংবাদমেল অনুষ্ঠিত কৰি অসম আন্দোলনৰ নেতা তথা প্ৰাক্তন মুখ্য মন্ত্ৰী প্ৰফুল্ল কুমাৰ মহন্তই গগৈৰ দাবী তথ্যভিত্তিক নহয় বুলি উল্লেখ কৰি কংগ্ৰেছকেই অসম আন্দোলনৰ ৮৫৫জন অসমীয়াৰ হত্যাকাৰী বুলি দাবী কৰে।
“তৰুণ গগৈয়ে ভিত্তি বছৰ সন্দৰ্ভত যি মন্তব্য আগ বঢ়াইছে ইয়াৰ কোনো সত্যতা নাই। যদি সত্যতা আছে সেয়া তথ্য সহকাৰে প্ৰচাৰ মাধ্যমৰ জৰিয়তে আগ বঢ়াওক”, তৰুণ গগৈলৈ মহন্তৰ প্ৰত্যাহ্বান।
তৰুণ গগৈয়ে বিভ্ৰান্তিকৰ তথ্য ৰাইজৰ মাজত প্ৰচাৰ কৰা বুলি মন্তব্য কৰি মহন্তই আগলৈ গগৈক এনে কথাৰ পৰা বিৰত থাকিবলৈ আহ্বান জনায়।
উল্লেখ্য যে, কালি এখন সংবাদমেলত প্ৰাক্তন মুখ্য মন্ত্ৰী তৰুণ গগৈয়ে কৈছিল যে ১৯৮০ চনতে ইন্দিৰা গান্ধী অসমলৈ আহি আন্দোলনৰ নেতৃত্বক ১৯৭১ চনৰ ভিত্তি বছৰ মানি ল’বলৈ আহ্বান জনাইছিল, কিন্তু আন্দোলনৰ নেতৃত্বত থকা সকলে সেইটো গ্ৰহণ কৰা নাছিল। কিন্তু একেই ভিত্তি বছৰ ১৯৮৫ চনত মানি ল’লে।
১৯৮০ চনতে ইন্দিৰা গান্ধীৰ প্ৰস্তাৱ মানি লোৱা হ’লে ৮৫৫জন চহিদ হ’ব লগীয়া নহ’ল হেঁতেন বুলিও গগৈয়ে মন্তব্য কৰিছিল। তেওঁ প্ৰফুল্ল কুমাৰ মহন্ত আৰু আছুক আন্দোলনকাৰীসকলৰ মৃত্যুৰ বাবে দোষাৰোপ কৰিছিল।
ইয়াৰ পাছতেই আজি প্ৰফুল্ল কুমাৰ মহন্তই কয়, ‘৮৫৫জন আন্দোলনকাৰীক কংগ্ৰেছে বন্দুক-বাৰুদ আৰু টাঙোনেৰে হত্যা কৰিছিল। গতিকে কংগ্ৰেছ অসম আন্দোলনৰ চহিদসকলক হত্যা কৰা এক নম্বৰ দল।
তেওঁ অসমৰ তদানীন্তন মুখ্য মন্ত্ৰী হিতেশ্বৰ শইকীয়া আৰু কেন্দ্ৰীয় মন্ত্ৰী হিচাপে থকা তৰুণ গগৈকো এইক্ষেত্ৰত দোষাৰোপ কৰি তেওঁলোকে অসমৰ সমস্যাৰ সমাধান বিচৰা নাছিল আৰু তেওঁলোকে প্ৰধান মন্ত্ৰী ইন্দিৰা গান্ধীকো সমস্যাটো সমাধানৰ বাবে অনুৰোধ জনোৱা নাছিল বুলি মন্তব্য কৰে।
১৯৭১ চনৰ ২৪ মাৰ্চ ভিত্তি বছৰ সৰ্বসন্মতিক্ৰমে মানি লোৱা হৈছিল বুলি দাবী কৰি কেৱল আছু আৰু তেওঁ নিজে একপক্ষীয় সিদ্ধান্ত লোৱা নাছিল বুলিও প্ৰফুল্ল কুমাৰ মহন্তই মন্তব্য কৰে।
ইপিনে অসম আন্দোলন আৰু চহিদসকলক কেন্দ্ৰ কৰি এই বিতৰ্কক লৈ অসন্তুষ্ট সদৌ অসম জাতীয় চহিদ পৰিয়াল সমন্বয়ৰক্ষী পৰিষদ। পৰিষদৰ সভাপতি ৰাজেন ডেকাই তৰুণ গগৈয়ে কোৱা কথা মুখে মুখেহে চলি আছে, সেয়া কোনো কাগজে-পত্ৰই নাই বুলি মন্তব্য কৰে।
‘১৯৫১ চন বাদেই দিলো, ১৯৭১ চন যিহেতু ভিত্তি বছৰ লোৱা হৈছিল তাৰ পাছত কংগ্ৰেছে কি কৰিলে? কংগ্ৰেছৰ এনে ধৰণৰ কথা কোৱাৰ অৰ্থই নাই। অসমৰ ৰাইজে চুক্তিখন মানি লৈছে, গতিকে চুক্তি মতে কাম কৰক। বোকা ছটিওৱা ৰাজনীতি কৰি লাভ নাই’, ৰাজেন ডেকাৰ মন্তব্য।
তৰুণ গগৈৰ মন্তব্য দুৰ্ভাগ্যজনক বুলি মন্তব্য কৰি ডেকাই কংগ্ৰেছে ভোটৰ লালসাত এনে ধৰণৰ ৰাজনীতি কৰিব বিচাৰিছে বুলিও কয়।
