পেট্ৰ’লৰ ক্ৰমবৰ্ধমান মূল্য বৃদ্ধিৰ প্ৰতি কোনোধৰণৰ পৰোৱা নাই বিজেপি নেতৃত্বাধীন বিজেপি চৰকাৰৰ। শাসনত থাকিও সমগ্ৰ ভাৰততে ভোটাৰক আকৃষ্ট কৰাৰ উদ্দেশ্যে অহা ২ মাৰ্চৰ দিনা প্ৰতিটো লোকসভা সমষ্টিতে বাইক ৰেলী বাহিৰ কৰিব বিজেপিয়ে।
আজি বিজেপিৰ ৰাজ্যিক কাৰ্য্যালয়ত এক সংবাদমেলযোগে এই কথা জানিবলৈ দিয়ে বিজেপি যুৱমৰ্চাৰ ৰাজ্যিক সভাপতি অনুপ বৰ্মণে। তেওঁ লগতে জনায় যে প্ৰত্যেকটো লোকসভা সমষ্টিৰ পৰা সমষ্টিভেদে অতি কমে ৫০০ আৰু সৰ্বাধিক ১০০০ খন বাইক ব্যৱহাৰ কৰিব বিজেপিৰ যুৱ কৰ্মীসকলে।
সেই অনুসৰি, প্ৰত্যেকটো সমষ্টিৰ পৰা যদি কমেও ১০০০ খন বাইক ৰেলী বাহিৰ কৰে, তেন্তে ৫৪৫ টা লোকসভা সমষ্টিৰ পৰা অতি কমেও প্ৰায় ৫ লাখ ৪৫ হাজাৰখন বাইক ব্যৱহাৰ কৰা হ’ব এই বাইকৰেলীত।
আনহাতে, ভাৰতৰ যুৱসকলক অধিক সক্ৰিয় কৰি তোলাৰ বাবে এই মহা বাইক ৰেলী অনুষ্ঠিত কৰা হৈছে বুলি উল্লেখ কৰি বৰ্মণে সংবাদমেলত কয়, ‘চৰকাৰ গঠনৰ ক্ষেত্ৰত এই বাইকৰেলীয়ে যুৱ সমাজৰ মনত সজাগতাৰ লগতে উদ্দীপনাৰ সঞ্চাৰ কৰিব বুলি যুৱ মৰ্চাই আশা প্ৰকাশ কৰিছো।‘
উক্ত দিনটোত এই বাইক ৰেলী ভাৰতীয় জনতা পাৰ্টীৰ ৰাষ্ট্ৰীয় সভপতি অমিত শ্বাহে মধ্যপ্ৰদেশৰ শ্বাহদলৰ পৰা দিনৰ ১২ বজাত শুভাৰম্ভণি কৰিব বুলি জানিব দিয়ে।
মন কৰিবলগীয়া যে এই বাইক ৰেলীৰ জৰিয়তে চৰকাৰৰ জনকল্যাণমূলক আঁচনিসমূহ ৰাইজৰ মাজলৈ নিয়া হ’ব বুলি সংবাদমেলত বৰ্মণে সদৰী কৰিলেও এখন বাইকত তেল ভৰোৱাৰ বাবদ যদি ২০০ টকাকৈ ধৰা হয় তেন্তে মুঠ ১০,৯০,০০০০০ টকা খৰচ হ’ব উক্ত বাইকৰেলীত।
প্ৰশ্ন হয়, নিবনুৱা সমস্যাই জুৰুলা কৰি থকাৰ সময়ত এই বাইক ৰেলীয়ে যুৱ প্ৰজন্মক উৎসাহিত কৰিব বা মনত সজাগতা আনিব নে বাইক ৰেলীৰ নামত দেশত শৰাধ হ’ব কোটি কোটি ধন?
