সুৰা নিষিদ্ধ কৰাৰ দাবীত সদৌ অসম দুৰ্নীতি নিবাৰক প্ৰকৃতি সুৰক্ষা সমিতিয়ে ২৭ ফেব্ৰুৱাৰিৰ পৰা আৰম্ভ কৰা অনির্দিষ্টকালীন অনশনত অনিন্দিতা দাস নামৰ এগৰাকী মহিলা অসুস্থ হৈ পৰে। বিগত দুটা দিন ধৰি অবিৰত অনশন কৰি থকা গোলাঘাট জিলা সমিতিৰ কাৰ্য্যকাৰী সভাপতি অনিন্দিতাক স্বাস্থ্য পৰীক্ষাৰ বাবে গোলাঘাট অসামৰিক চিকিৎসালয়ত ভৰ্তি কৰা হয়।
উল্লেখযোগ্য যে, সদৌ অসম দুৰ্নীতি নিবাৰক প্ৰকৃতি সুৰক্ষা সমিতিৰ পাঁচজন সদস্যই আমৰণ অনশন কাৰ্য্যসূচীত অংশ গ্ৰহণ কৰি অসম তথা ভাৰতবৰ্ষৰ অন্য ৰাজ্যতো সুৰা নিষিদ্ধ কৰা আৰু গুটখা জাতীয় সামগ্ৰী নিষিদ্ধ কৰাৰ বাবে চৰকাৰক দাবী জনাইছে। আনহাতে, গোলাঘাট জিলাত বিষাক্ত সুৰাপান কৰি ডেৰ শতাধিক লোকৰ মৃত্যু হোৱাক কেন্দ্ৰ কৰি জিলাখনৰ যোগান আৰু আবকাৰী বিভাগৰ দুয়োগৰাকী অধীক্ষকৰ বিৰুদ্ধে নিলম্বন আৰু আইনী ব্যৱস্থা গ্ৰহণ কৰাৰ বাবেও দাবী উত্থাপন কৰে।
ইপিনে, বিষাক্ত লালিগুৰ, মিথাইল ব্যৱসায়ৰ লগত জড়িত ব্যক্তিসকলক শীঘ্ৰে গ্ৰেপ্তাৰ কৰি এই ব্যৱসায় বন্ধ কৰিবৰ বাবেও প্ৰতিবাদকাৰী সকলে দাবী জনায়। তদুপৰি, গোলাঘাট জিলাৰ উপায়ুক্ত গৌৰৱ বোথ্ৰাকো গোলাঘাটত সংঘটিত ভয়ানক ঘটনাৰৰ বাবে তদন্তৰ আওটালৈ আনিব লাগে বুলি উল্লেখ কৰে।
সংগঠনটোৰ ৰাজ্যিক সভাপতি নিতুল শইকীয়াৰ নেতৃত্বত ৰূপায়ন কৰা আমৰণ অনশন কাৰ্য্যসূচীত অনিন্দিতা দাসৰ লগতে গোলাঘাট জিলা সমিতিৰ সভাপতি মৃদুজ্যোতি বৰা, সম্পাদক ৰাজু বাউৰী,সহকাৰী সম্পাদক প্ৰাঞ্জল বৰুৱা আৰু জিলা সমিতিৰ উপদেষ্টা দ্বীপেন বৰাই অংশগ্ৰহণ কৰিছে।
