অৰুণাচলৰ পৰা অহা এখন বিয়েৰ ভৰ্তি ট্ৰাক কৰায়ত্ত কৰি আৰক্ষীৰ হাতত গতাবলৈ যোৱাৰ সময়ত বৃহত্তৰ অসমীয়া যুৱ মঞ্চৰ প্ৰধান সম্পাদক প্ৰণৱ জ্যোতি সন্দিকৈক আৰক্ষীয়ে ওলোটাই আটক কৰাক লৈ তীব্ৰ প্ৰতিক্ৰিয়াৰ সৃষ্টি হৈছে বোকাখাতত।
ঘটনাৰ বিৱৰণী অনুসৰি, এক বিশেষ সূত্ৰৰ আধাৰত বৃহত্তৰ অসমীয়া যুৱমঞ্চৰ সম্পাদক প্ৰণৱজ্যোতি সন্দিকৈয়ে নুমলীগড় তেল শোধানাগাৰৰ সমীপত অৰুণাচলৰ পৰা অসম অভিমুখে আহি থকা এখন অবৈধ বিয়েৰ ভৰ্টি ট্ৰাক কৰায়ত্ত কৰে। নুমলীগড় আৰক্ষী চকীত ঘটনা সন্দৰ্ভত সন্দিকৈয়ে এখন এজাহাৰ দাখিল কৰে। কিন্তু ঘটনাতো বোকাখাত আৰক্ষী থানাৰ অন্তৰ্গত এলেকাত সংঘটিত হোৱা বুলি নুমলীগড় আৰক্ষী চকীৰ ভাৰপ্ৰাপ্ত বিষয়াগৰাকীয়ে সন্দিকৈক বিয়েৰ ভৰ্তি ট্ৰাকখনৰ সৈতে বোকাখাত আৰক্ষী থানালৈ লৈ আহে আৰু আশ্চৰ্যজনকভাবে সন্দিকৈকহে আটক কৰে।
শুকুৰবাৰে বৃহত্তৰ যুৱ মঞ্চৰ সম্পাদকজনক আৰক্ষীয়ে আদালতলৈ নিবলৈ ওলাওতে দলটোৰ কৰ্মীসকলে আৰক্ষীক বাধা দি প্ৰতিবাদ সাব্যস্ত কৰাকলৈ অঞ্চলটোত উত্তেজনাময় পৰিস্থিতিৰ সৃষ্টি হয়। দলীয় কৰ্মীসকলে অপৰাধীক কৰায়ত্ত কৰিব নোৱাৰা আৰক্ষীয়ে নিৰপৰাধীক মিছা অভিযোগত আটক কৰা কাৰ্য্যৰ বিৰুদ্ধে তীব্ৰ প্ৰতিবাদ সাব্যস্ত কৰে।
বোকাখাত আৰক্ষীয়ে সুনীল চহৰীয়া নামৰ এজন ব্যক্তিয়ে প্ৰণৱ জ্যোতি সন্দিকৈয়ে ট্ৰাকখনৰ পৰা পাঁচ লাখ টকা দাবী কৰিছিল আৰু টকা নিদিলে ট্ৰাকখন জ্বলাই দিয়াৰ ভাবুকি দিছিল বুলি দিয়া এজাহাৰৰ ভিত্তিতে সন্দিকৈক আটক কৰা হয় বুলি সংবাদমাধ্যমৰ আগত প্ৰকাশ কৰে।
আনহাতে, সমগ্ৰ ঘটনাটো সন্দৰ্ভত স্থানীয় ৰাইজৰ মাজত আৰক্ষীয়ে দোষীক ৰক্ষণাবেক্ষণ দিয়াৰ অভিযোগ উত্থাপন হৈছে। জব্দ কৰা ট্ৰাকখন অৰুণাচলৰ পৰা নামচাই অভিমুখে গৈ আছিল। আদালতত হাজিৰ কৰাৰ পাছত প্ৰণৱ জ্যোতি সন্দিকৈক জেললৈ প্ৰেৰণ কৰা হৈছে।
