আগন্তুক লোকসভা নিৰ্বাচনৰ দিন চমু চাপি অহাৰ সময়তে মুখ্য মন্ত্ৰী সৰ্বানন্দ সোনোৱালে আজি শিলচৰত উপস্থিত হৈ বৰাক উপত্যকাৰ ৰাইজৰ বাবে কেইবাটাও উন্নয়ণমূলক আঁচনিৰ আধাৰশিলা স্থাপন কৰে।
ইয়াৰ অংশ হিচাপে শিলচৰৰ পুলিচ গ্ৰাউণ্ডত বৰাকৰ জনসাধাৰণে দীৰ্ঘদিন ধৰি দাবী জনাই অহা এটা মিনি চেক্ৰেটেৰিয়েটৰ আধাৰশিলা স্থাপন কৰে। উক্ত অনুষ্ঠানতে সোণোৱালে জিলা গ্ৰন্থগাৰ প্ৰাঙ্গনত নতুন প্ৰেক্ষাগৃহসহ জিলা পুথিভৰাল ভৱন নিৰ্মাণ, ‘উত্তৰণ’ প্ৰকল্পৰ অধীনত শিলচৰ পুলিচ পেৰেড গ্ৰাউণ্ডত ক্ৰীড়া ষ্টেডিয়ামৰ উন্নীতকৰণ, অসম বিশ্ববিদ্যালয়ত স্বামী বিবেকানন্দ সাংস্কৃতিক গৱেষণা কেন্দ্ৰ আৰু ইটখোলা ঘাটৰ কাষত বৰাক নৈৰ ওপৰত আৰ চি চি দলঙৰ আধাৰশিলাও স্থাপন কৰে।
ইয়াৰ উপৰি কেন্দ্ৰীয় অপৰিশোধেয় পুঁজিৰ অধীনত শিলচৰ-কুম্ভীগ্ৰাম পথৰ সদৰ ঘাটত বৰাক নৈৰ ৬০ কোটি টকা ব্যয়েৰে নিৰ্মিত পকী দলংখন আনুষ্ঠানিকভাৱে উদ্ধোধন কৰে। উল্লেখযোগ্য যে ২০১৪ চনত প্রাক্তন মুখ্য মন্ত্ৰী তৰুণ গগৈ আৰু প্রাক্তন গৰকাপ্তানী মন্ত্ৰী অজন্তা নেওঁগে আধাৰশিলা স্থাপন কৰা দলংখনৰ নিৰ্মাণ সম্পূৰ্ণ হ’বৰ বাবে পাঁচ বছৰ সময় লাগিল।
নিজৰ ভাষণ প্ৰসংগত মুখ্য মন্ত্ৰী গৰাকীয়ে কয় যে বৰাক উপত্যকাৰ আন্তঃগাঁথনি উন্নয়নৰ ওপৰত কৰা বৰ্তমানৰ ৰাজ্য চৰাকাৰে উপত্যকাটোত ২০০০ কিঃমিঃ পথ নিৰ্মাণৰ পদক্ষেপ গ্ৰহণ কৰাৰ লগতে ১২০ খন কাঠৰ দলং পকী দলঙলৈ ৰূপান্তৰৰ কাম দ্ৰুত গতিত অব্যাহত ৰাখিছে।
তদুপৰি গুৱাহাটী মহানগৰীৰ সম্প্ৰসাৰণৰ বাবে গ্ৰহণ কৰা ‘ষ্টেট কেপিটেল ৰিজন’ৰ লেখীয়াকৈ শিলচৰ সম্প্ৰসাৰণৰ বাবেও অনুৰূপ পদক্ষেপ গ্ৰহণ কৰা হ’ব বুলি কয়। ইয়াৰ লগতে কৰিমগঞ্জত এখন চিকিৎসা মহাবিদ্যালয় আৰু বৰাক উপত্যকাত ৩০ খনতকৈ অধিক খেলপথাৰ নিৰ্মাণৰ সিদ্ধান্ত গ্ৰহণ কৰিছে বুলি তেওঁ কয়।
মুখ্য মন্ত্ৰীৰ লগতে পৰিৱেশ আৰু বন মন্ত্ৰী পৰিমল শুক্লবৈদ্য, অসম বিধানসভাৰ প্ৰাক্তন অধ্যক্ষ তথা শিলচৰৰ বিধায়ক দিলীপ কুমাৰ পালেও ভাষণ দিয়ে।
