স্বচ্ছতা বা পৰিস্কাৰ-পৰিচ্ছন্নতাৰ ক্ষেত্ৰত ৰাজ্য চৰকাৰে বিভিন্ন আঁচনিৰে লাখ-লাখ টকা ব্যয় কৰিলেও এতিয়াও দেশৰ আন চহৰৰ তুলনাত পিছ পৰি আছে অসম। ৬ মাৰ্চ অৰ্থাৎ বুধবাৰে ভাৰত চৰকাৰে স্বচ্ছ সৰ্বেক্ষণ ২০১৯ৰ আধাৰত ঘোষণা কৰা দেশৰ আটাইতকৈ স্বচ্ছ আৰু পৰিষ্কাৰ চহৰৰ তালিকাই এই কথা প্ৰমাণিত কৰে।
স্বচ্ছ চহৰ সমূহৰ এক সমীক্ষা অনুসৰি চলিত বৰ্ষৰ স্বচ্ছ সৰ্বেক্ষণত দেশৰ আগশাৰীৰ চহৰ সমূহৰ ভিতৰত গুৱাহাটীয়ে ৩০৩ নং স্থান লাভ কৰিছে।
গুৱাহাটীৰ উপৰি অসমৰ আন কেইখনমান চহৰ ক্ৰমে নগাঁৱে ৩৭০ নং, ডিব্ৰুগড়ে ৪১৫ নং আৰু শিলচৰে ৪২৩ নং স্থান লাভ কৰিবলৈ সক্ষম হৈছে।
বিভিন্ন শিতানত নিৰ্ধাৰণ কৰা ৫ হাজাৰ পইণ্টৰ ভিতৰত অসমৰ গুৱাহাটীয়ে ১,৭৭০.২৯ পইণ্ট, নগাঁৱে ১,৪১৫.৪৭, ডিব্ৰুগড়ে ১,০৩৮.৭২ আৰু শিলচৰে ৭৩৫.২৬ পইণ্ট লাভ কৰিছে।
আনহাতে এই বাছনিত দেশৰ ভিতৰত ৪,৬৫৯ পইণ্টেৰে শীৰ্ষস্থান দখল কৰিবলৈ সক্ষম হৈছে মধ্যপ্ৰদেশৰ ইণ্ডোৰ চহৰ।
পৰিস্কাৰ-পৰিচ্ছনাতাকে ধৰি জাবৰ নিষ্কাশনৰ ক্ষেত্ৰত গ্ৰহণ কৰা বিভিন্ন পদ্ধতি তথা চহৰ সমূহৰ জনসাধাৰণৰ পৰা সংগ্ৰহ কৰা মতামতৰ ভিত্তিতে দেশৰ স্বচ্ছ বা পৰিষ্কাৰ চহৰ সমূহ বাছনি কৰা হৈছে।
ইফালে উত্তৰ-পূবৰ ৫০ হাজাৰৰ পৰা ১ লাখ জনসংখ্যা থকা চহৰৰ ভিতৰত সকলোতকৈ পৰিষ্কাৰ চহৰ হিচাপে বিবেচিত হৈছে অসমৰ শিৱসাগৰ।
উল্লেখ্য যে ২০১৯ বৰ্ষৰ স্বচ্ছ সৰ্বেক্ষণত বিভিন্ন স্থান লাভ কৰা চহৰ সমূহক ৬ মাৰ্চ অৰ্থাৎ বুধবাৰে দেশৰ ৰাষ্ট্ৰপতি ৰামনাথ কোবিন্দে এক অনুষ্ঠানৰ জৰিয়তে পুৰস্কৃত কৰে।
