ম্যানমাৰ সেনাৰ আক্ৰমণত নিহত সশস্ত্ৰ বিদ্ৰোহী সংগঠন আলফা (স্বাঃ)ৰ মেজৰ জ্যোতিৰ্ময় অসমৰ মৃতদেহ উদ্ধাৰ কৰি যথা নিয়মে শেষকৃত্য কৰা হৈছে বুলি সংগঠনটোৰ তৰফৰ পৰা স্পষ্ট কৰা হৈছে। সংগঠনটোৱে এই কথা জনোৱা বুলি দাবী কৰি এই বাতৰি দিছে News18 Assam North East নামৰ ব্যক্তিগত খণ্ডৰ নিউজ চেনেলটোৱে।
জানিব পৰামতে, জ্যোতিৰ্ময়ৰ ঘৰ যোৰহাট জিলাৰ তিতাবৰত৷ ম্যানমাৰৰ শিবিৰতে তেওঁ দীৰ্ঘদিনৰ পৰা জটিল ৰোগত আক্ৰান্ত হৈ আছিল।
উল্লেখযোগ্য যে যোৱা মাহত ম্যানমাৰ সেনাই ইয়াৰ ভূমিত থকা আলফা (স্বাঃ) আৰু এন এছ চি এনৰ শিবিৰত আক্ৰমণ চলাইছিল। এই বাতৰি নৰ্থ-ইষ্ট নাওত প্ৰকাশ হৈছিল।
লগতে পঢ়ক ম্যানমাৰ সেনাৰ আক্ৰমণত নিহত আলফা (স্বা:)ৰ কেডাৰ
ম্যানমাৰ সেনাই শিবিৰত আক্ৰমণ চলোৱাৰ পিছতে আলফা (স্বাঃ)ৰ সেনাধ্যক্ষ পৰেশ বৰুৱাই কোনো কেডাৰৰ মৃত্যু হোৱাৰ খবৰ ‘নিশ্চিত নহয়’ বুলি সংবাদ মাধ্যমক টেলিফোন কৰি জনাইছিল। কিন্তু ইয়াৰ কেইদিনমান পিছতে সংগঠনটোৰ মেজৰ পৰ্য্যায়ৰ নেতাজনৰ মৃত্যু আৰু শেষকৃত্যৰ বিষয়ে জানিবলৈ দিয়ে।
মন কৰিব লগীয়া যে ম্যানমাৰ সেনাই দেশখনৰ ভৌগোলিক পৰিসীমাৰ ভিতৰত শিবিৰ পাতি থকা এন এছ চি এন, আলফাকে ধৰি উত্তৰ-পূবৰ উগ্ৰপন্থীৰ প্ৰতি কঠোৰ স্থিতি লোৱা বুলি পৰেশ বৰুৱাই আজি পোন্ধৰ দিন মানৰ আগত স্বীকাৰ কৰিছিল সংবাদ মাধ্যমৰ আগত। বৰুৱাই ইয়াক অৰ্থনৈতিক কূটনীতিৰ পৰিণতি বুলি অভিহিত কৰিছিল।
লগতে পঢ়ক ম্যানমাৰত আলফা (স্বাঃ) সংকটৰ সন্মুখীন, স্বীকাৰ কৰিলে পৰেশ বৰুৱাই
