আগন্তুক লোকসভা নিৰ্বাচনত তেজপুৰ সমষ্টিৰ পৰা প্ৰতিদ্বন্দ্বিতাৰে ৰাষ্ট্ৰীয় ৰাজনীতিলৈ উত্তৰণ আশা কৰি পিছত ৰাষ্ট্ৰীয় নেতৃত্বৰ বাধাৰ সন্মুখীন হোৱা বিজেপি মন্ত্ৰী হিমন্তই ঘটনাটোৰ প্ৰথম প্ৰতিক্ৰিয়া কৰিছে। দলটোৰ ৰাষ্ট্ৰীয় সভাপতি অমিত শ্বাহলৈ কৃতজ্ঞতাবোধ প্ৰকাশ কৰি হিমন্তই অলপতে এটা টুইট কৰিছে, য’ত তেওঁৰ ওপৰত আস্থা প্ৰকাশ কৰা বাবে অমিত শ্বাহলৈ কৃতজ্ঞতা জ্ঞাপন কৰে।
“মাননীয় অধ্যক্ষ শ্ৰীযুত অমিত শ্বাহ ডাঙৰীয়া, মোৰ প্ৰতি আপুনি যি আস্থা তথা বিশ্বাস ব্যক্ত কৰিছে তাৰ বাবে কৃতাৰ্থ বোধ কৰিছো৷ মোৰ দৰে এজন সাধাৰণ কাৰ্যকৰ্তাৰ বাবে এয়া এক ডাঙৰ স্বীকৃতি আৰু ইয়াক মই আজীৱন পাহৰিব নোৱাৰিম৷ আপোনাৰ সিদ্ধান্ত বিনম্ৰতাৰে গ্ৰহণ কৰিছো৷” টিকট বঞ্চিত হোৱা হিমন্তই দলে দিয়া নিৰ্বাচনৰ গধুৰ দায়িত্ব শিৰপাতি লোৱা বুলি প্ৰকাশ কৰি এইদৰে লিখে।
অমিত শ্বাহে তেওঁক টিকট নিদিয়াৰ কাৰণ ব্যাখ্যা কৰি হিন্দীতে কৰা এটা টুইটৰ “উত্তৰ” হিচাপে হিমন্তই এইদৰে কয়।
মন কৰিব লগীয়া যে টুইটটোত নিজকে এজন “সাধাৰণ কাৰ্য্যকৰ্তা” বুলিও অভিহিত কৰে মন্ত্ৰী হিমন্তই।
লগতে পঢ়ক হিমন্ত বিশ্ব শৰ্মাই নিৰ্বাচনত প্ৰতিদ্বন্দ্বিতা নকৰা সন্দৰ্ভত কি ক’লে অমিত শ্বাহে?
উল্লেখযোগ্য যে অসম বিজেপিৰ সভাপতি ৰঞ্জিত দাসে দলৰ ৰাষ্ট্ৰীয় নেতৃত্বই হিমন্তক তেজপুৰ সমষ্টিত টিকট দিয়াৰ পৰিৱৰ্তে নেডাৰ আহ্বায়ক হিচাপে সমগ্ৰ উত্তৰ-পূবত দলটোৰ আৰু ইয়াৰ সহযোগী দলবোৰৰ প্ৰাৰ্থীসকলক জয়ী কৰি নিয়াৰ বাবে দায়িত্ব ল’বলৈ নিৰ্দেশ দিছে। মন্ত্ৰীজনক টিকট নিদিয়াৰ সেয়ে কাৰণ বুলি সংবাদ মাধ্যমক জানিবলৈ দিছে সভাপতি দাসে।
1 মাননীয় অধ্যক্ষ শ্ৰীযুত অমিত শ্বাহ ডাঙৰীয়া, মোৰ প্ৰতি আপুনি যি আস্থা তথা বিশ্বাস ব্যক্ত কৰিছে তাৰ বাবে কৃতাৰ্থ বোধ কৰিছো ৷ মোৰ দৰে এজন সাধাৰণ কাৰ্যকৰ্তাৰ বাবে এয়া এক ডাঙৰ স্বীকৃতি আৰু ইয়াক মই আজীৱন পাহৰিব নোৱাৰিম ৷ আপোনাৰ সিদ্ধান্ত বিনম্ৰতাৰে গ্ৰহণ কৰিছো ৷ https://t.co/iojOsiiHCA
— Himanta Biswa Sarma (@himantabiswa) March 21, 2019
আনহাতে ৰাষ্ট্ৰীয় নেতৃত্বই নিৰ্বাচনত প্ৰতিদ্বন্দ্বিতা কৰাত বাধা দিয়াৰ পিছতে ৰহস্যজনক নীৰৱতা অৱলম্বন কৰিছিল মন্ত্ৰী হিমন্তই। ৰাজ্যত দলটোৰ আৰু প্ৰাৰ্থীসকলৰ যি নিৰ্বাচনী কুচকাৱাজ চলি আছে, তাৰ কোনোটো দৃশ্যৰ মাজতে দেখা নগৈছিল হিমন্তৰ প্ৰত্যক্ষ অথবা পৰোক্ষ ভূমুকি। অৱশ্যে আজি মন্ত্ৰীজনে ডিব্ৰুগড়ত মুখ্য মন্ত্ৰী সোণোৱালৰ সৈতে ৰামেশ্বৰ তেলীৰ মনোনয়ন পত্ৰ দাখিলৰ সমদলত যায়।
আনহাতে ছ’চিয়েল মিডিয়াত এই বিষয়টোক লৈ যথেষ্ট পানী ঘোলা হোৱা দেখা গৈছে। একাংশৰ প্ৰশ্ন,- ৰাষ্ট্ৰীয় সভাপতি হৈ নিৰ্বাচনৰ গধুৰ দায়িত্ব থকা সত্ত্বেও অমিত শ্বাহে নিৰ্বাচনত প্ৰতিদ্বন্দ্বিতা কৰিব পাৰে যদি হিমন্তক নিৰ্বাচনৰ দায়িত্বৰ দোহাই দিয় প্ৰাৰ্থিত্বৰ পৰা বঞ্চিত কৰিছে কি যুক্তিত? হিমন্তক দলে কেৱল দলটোৰ স্বাৰ্থতহে লগাব বিচাৰিছে নেকি? অসম তথা উত্তৰ-পূবৰ দক্ষ মানুহক সুযোগ নিদিয়াৰ এয়া আন এটা নমুনা নহয়নে?
