আসন্ন নিৰ্বাচনত তেজপুৰ লোকসভা সমষ্টিৰ বিজেপি প্ৰাৰ্থী পল্লৱ লোচন দাসৰ বাবে নিৰ্বাচনী বৈতৰণী পাৰ হোৱাৰ পথত কঠিন প্ৰত্যাহ্বান আহি পৰিছে। বিজেপিৰ বিধায়ক আৰু মন্ত্ৰীয়ে গোৰ্খাসকলৰ সন্দৰ্ভত কৰি অহা অপমানসূচক মন্তব্যৰ বাবেই বিজেপি নেতৃত্বাধীন মিত্ৰজোঁটে ইয়াৰ পৰিনাম ভোগ কৰিবলগীয়া হ’ব পাৰে।
ইতিমধ্যে, বিজেপি মন্ত্ৰী-বিধায়ক তুচ্ছ-তাচ্ছিল্যসূচক মন্তব্যত জাঙুৰ খাই উঠা গোৰ্খা সমাজে নিৰ্বাচনত ইয়াৰ পোতক লোৱাৰ ইংগিত দিছে। সেয়ে হ’লে, অকল তেজপুৰেই নহয়, ডিব্ৰুগড়, লখিমপুৰ, মংগলদৈ, নগাঁও, কলিয়াবৰ আদি সমষ্টিটো বিজেপি তথা মিত্ৰজোঁটৰ প্ৰাৰ্থীসকল কঠিন প্ৰত্যাহ্বানৰ সন্মুখীন হোৱাৰ সম্ভাৱনা আছে।
তেজপুৰ লোকসভা সমষ্টিত প্ৰায় ১ লাখ ৭০ হাজাৰ তথা অসমত প্ৰায় ২৫ লাখ গোৰ্খা সম্প্ৰদায়ৰ ভোটাৰ আছে। সমগ্ৰ অসমৰ এই গোৰ্খা সমাজ বৰ্তমান বিজেপিৰ ওপৰত ক্ষুব্ধ হৈ পৰিছে। গোৰ্খাসকলে স্পষ্ট কৰি কৈছে যে আৰ পি শৰ্মাই টিকট পোৱা নোপোৱাটো ডাঙৰ কথা নহয়, কিন্তু টিকটৰ নামত গোৰ্খা জাতিক লৈ যি খেলা কৰা হৈছে সেয়া অত্যন্ত অপমানজনক।
বিজেপিৰ বিধায়কে গোৰ্খা সম্প্ৰদায় নিৰ্বাচনত কোনো ফেক্টৰেই নহয় বুলি কোৱা মন্তব্যত জাঙু খাই উঠা গোৰ্খা সমাজে এইবাৰ নিৰ্বাচনত গোৰ্খাসকল ফেক্টৰ হয় নে নহয় সেয়া দেখুৱাবলৈ সাজু হোৱা বুলিও সকীয়াই দিছে।
অসম গোৰ্খা সন্মিলনৰ প্ৰাক্তন সম্পাদক অৰুণ উপাধ্যায়ে বিজেপিৰ বাবেই গোৰ্খাসকলৰ জাতীয় স্বাভিমান আহত হৈছে বুলি মন্তব্য কৰিছে। তেওঁ কয় যে গোৰ্খাসকল ‘ঘায়েল’ হৈছে আৰু সেই ‘ঘায়েল’ৰ ট্ৰিটমেণ্ট কেনেদৰে কৰিব পাৰি তেজপুৰ সমষ্টিৰ গোৰ্খাসমাজে এতিয়া তাৰ চিন্তা কৰিছে।
আনহাতে, তেজপুৰ সমষ্টিত বিজেপি প্ৰাৰ্থী পল্লৱ লোচন দাসৰ বিৰুদ্ধে গোৰ্খাসকলে প্ৰচাৰ চলাব। গোৰ্খাসকলৰ প্ৰতি বিজেপিৰ নেতাসকলে কৰা অপমানসূচক মন্তব্যৰ বাবে বিজেপিয়ে গোৰ্খা সমাজৰ ভোট হেৰুৱাব পাৰে।
ইপিনে, গোৰ্খাসকলক হিমন্ত বিশ্ব শৰ্মাই লক্ষ্য কৰি লোৱা বুলিও গোৰ্খাসকলে আন এক অভিযোগ আনিছে। তেওঁলোকৰ চিধা অভিযোগ যে ২০০৯ চনত মনি কুমাৰ চুব্বাক কংগ্ৰেছে টিকট নিদিয়াৰ সময়ত হিমন্ত বিশ্ব শৰ্মা আছিল কংগ্ৰেছৰ আগশাৰীৰ নেতা আৰু বৰ্তমান ২০১৯ চনতো আৰ পি শৰ্মাৰ টিকট কটাৰ সময়ত হিমন্ত বিশ্ব শৰ্মা বিজেপিৰ মুধা ফুটা লীডাৰ।
সমাগত নিৰ্বাচনত বিজেপিৰ পুৰণি সমৰ্থক হিচাপে থকা গোৰ্খাসকলৰ পৰা অহা এই প্ৰত্যাহ্বানৰ দলটোৱে কেনেদৰে মোকাবিলা কৰে সেয়া লক্ষণীয় হ’ব।
