লোকসভা নিৰ্বাচনত প্ৰাৰ্থিত্ব লাভৰ প্ৰবল হাবিয়াস থকাৰ পাছতো দলীয় টিকটৰ পৰা বঞ্চিত মন্ত্ৰী তথা নেডাৰ আহ্বায়ক হিমন্তৰ ওপৰতে বিজেপিৰ ৰাষ্ট্ৰীয় নেতৃত্বই ন্যস্ত কৰিছে উত্তৰ-পূবত বিজেপিক জয়ী কৰোৱাৰ দায়িত্ব।
পূৰ্বেও একেদিনাই একেৰাহে তিনি চাৰিখন নিৰ্বাচনী সভাত প্ৰচাৰ চলাই অভিলেখ সৃষ্টিকাৰী হিমন্তৰ ওপৰত এইবাৰো গধুৰ দায়িত্ব দিছে ৰাষ্ট্ৰীয় নেতৃত্বই। উত্তৰ-পূবৰ ২৫ খন আসনৰ ২০ খনতেই বিজেপিক জয়ী কৰোৱাৰ বোজা জাপি দিয়া হৈছে হিমন্তৰ কান্ধত। সেই উদ্দেশ্যে অহা ৩১ মাৰ্চৰ পৰা প্ৰথম পৰ্য্যায়ৰ ভোটগ্ৰহণ অনুষ্ঠিত হ’বলগীয়া লোকসভা সমষ্টিত তিনিদিন একেৰাহে প্ৰচাৰ চলাব হিমন্তই।
হেলিকপ্তাৰত একেৰাহে নিৰ্বাচনী প্ৰচাৰ চলাই উৰণীয়া মন্ত্ৰীৰ খিতাপ ল’ব মন্ত্ৰী হিমন্তই। পূৰ্বৰ দৰে ৰাজ্যৰ উজনিৰ পৰা নামনিলৈ প্ৰতিদিনেই চাৰিখনকৈ নিৰ্বাচনী প্ৰচাৰ সভাত অংশগ্ৰহণেৰে তিনিদিনত সৰ্বমুঠ ১২ খন ঠাইত প্ৰচাৰ চলাই অভিলেখ সৃষ্টিৰ দিশে আগবাঢ়িব ধৰিছে মন্ত্ৰীগৰাকী।
উল্লেখযোগ্য যে, লোকসভা নিৰ্বাচনী প্ৰচাৰৰ বাবে শাসকীয় দল বিজেপিয়ে ব্যৱহাৰ কৰিছে চাৰিখনকৈ হেলিকপ্তাৰ। উক্ত হেলিকপ্তাৰকেইখন ৰখা হৈছে খানাপাৰাস্থিত পশু চিকিৎসা মহাবিদ্যালয় খেলপথাৰত।
অহা ৩১ মাৰ্চৰ দিনা পুৱা ৯ :৩০ বজাত খানাপাৰা পশু চিকিৎসা মহাবিদ্যালয় খেলপথাৰৰ পৰা হেলিকপ্তাৰৰে বটদ্ৰৱালৈ যাত্ৰা আৰম্ভ কৰিব মন্ত্ৰী হিমন্ত বিশ্ব শৰ্মাই। ১০:১৫ বজাত উপস্থিত হ’ব বটদ্ৰৱাত। তাৰ পাছতে মন্ত্ৰীগৰাকীয়ে বটদ্ৰৱা থানত সেৱা জনাই ১১ বজাত ভাগ ল’ব এক নিৰ্বাচনী সভাত।
উক্ত দিনটোতে বটদ্ৰৱাৰ পৰা ১২ বজাত হেলিকপ্তাৰৰে চামগুৰিলৈ ৰাওনা হ’ব মন্ত্ৰীগৰাকী। চামগুৰিটো এক নিৰ্বাচনী প্ৰচাৰ সভাত অংশগ্ৰহণ কৰিব হিমন্তই। তাৰ পাছত মন্ত্ৰীগৰাকীয়ে হেলিকপ্তাৰৰে ১:৫০ মিনিটত দেৰগাঁৱত উপস্থিত হ’ব। তাত অগপ-বিজেপিৰ মিত্ৰজোঁটৰ প্ৰাৰ্থী মণিমাধৱ মহন্তৰ হৈ নিৰ্বাচনী প্ৰচাৰ চলাব মন্ত্ৰীগৰাকীয়ে।
দেৰগাঁৱত নিৰ্বাচনী প্ৰচাৰ চলাই উক্ত দিনটোৰ বাবে প্ৰচাৰ সামৰিব মন্ত্ৰীগৰাকীয়ে। দেৰগাঁৱৰ পৰা বিয়লি ৩:৪৫ মিনিটত আহি খানাপাৰাত হেলিকপ্তাৰ অৱতৰণ কৰিব মন্ত্ৰী হিমন্তৰ। উক্ত দিনটোত মুঠ ৬ ঘন্টা ৪৫ মিনিট সময় হেলিকপ্তাৰেৰে নিৰ্বাচনী প্ৰচাৰত ব্যস্ত থাকিব মন্ত্ৰী হিমন্ত বিশ্ব শৰ্মা।
ইপিনে, তাৰ পাছদিনা অৰ্থ্যাৎ ১ এপ্ৰিলৰ দিনা মন্ত্ৰীগৰাকীয়ে ৯:২০ত খানাপাৰৰ পৰা পোনে পোনে হেলিকপ্তাৰৰে ৰাওনা হ’ব টিংখংলৈ। টিংখংত বিজেপিৰ প্ৰাৰ্থী ৰামেশ্বৰ তেলীৰ হৈ প্ৰচাৰ চলাব মন্ত্ৰীজনে। তাৰ পাছতেই হিমন্তই লাহোৱালতো নিৰ্বাচনী প্ৰচাৰ সভাত অংশগ্ৰহণ কৰি তাৰ পৰা বিয়লি ২ বজাত আহি মাৰ্ঘেৰিটাত উপস্থিত হ’ব। মাৰ্ঘেৰিটাৰ পৰা সৰুপথাৰত মণি মাধৱ মহন্তৰ হৈ নিৰ্বাচনী সভাত প্ৰচাৰ চলাই সন্ধ্যা ৫:০০ বজাত আহি খানাপাৰাত হিমন্তৰ হেলিকপ্তাৰ অৱতৰণ কৰিব।
উক্ত দিনটোত মুঠ ৭ ঘন্টা ৪০ মিনিটত হেলিকপ্তৰৰে প্ৰচাৰ চলোৱাত ব্যস্ত থাকিব মন্ত্ৰীগৰাকী।
তদুপৰি ২ এপ্ৰিলৰ দিনা ৯:২০ বজাত খানাপাৰাৰ পৰা নাজিৰাত প্ৰচাৰ চলাবলৈ যাব হিমন্ত বিশ্ব শৰ্মা। নাজিৰাত নিৰ্বাচনী প্ৰচাৰ শেষ কৰি মন্ত্ৰীগৰাকী দুপৰীয়া ১২:৩০ বজাত আহি মৰিয়নী সমষ্টিত উপস্থিত হৈ তপন গগৈৰ হৈ নিৰ্বাচনী প্ৰচাৰ চলাব বুলি জানিব পৰা গৈছে। তাৰ পাছতেই হিমন্ত পোনে পোনে ৰাওনা হ’ব তিতাবৰলৈ। তাতো তেওঁ নিৰ্বাচনী সভাত অংশগ্ৰহণ কৰি ৩:৩০ বজাত বোকাখাতত উপস্থিত হ’ব মন্ত্ৰীগৰাকী। বোকাখাতত মণিমাধৱ মহন্তৰ হৈ প্ৰচাৰ চলাই খানাপাৰাত আহি উপস্থিত হ’ব মন্ত্ৰীগৰাকী।
উক্ত দিনটোত মুঠ ৭ ঘন্টা ৫৫ মিনিট হেলিকপ্তাৰযোগে নিৰ্বাচনী প্ৰচাৰ চলাব হিমন্তই।
মন কৰিবলগীয়া যে, তিনিদিনত মুঠ ২২ ঘন্টা ২০ মিনিট হেলিকপ্তাৰ ব্যৱহাৰ কৰি নিৰ্বাচনী প্ৰচাৰত ব্যস্ত হৈ পৰিব মন্ত্ৰী হিমন্ত বিশ্ব শৰ্মা।
যদি প্ৰতি ঘন্টাৰ হেলিকপ্তাৰৰ খৰচ ১ লাখ ২০ হাজাৰ টকা ধৰা হয় তেন্তে কেৱল হিমন্ত বিশ্বই প্ৰথম পৰ্য্যায়ৰ নিৰ্বাচনী প্ৰচাৰৰ বাবদ এখন হেলিকপ্তাৰত ব্যয় কৰিব ২৭ লাখ ৬০ হাজাৰ টকা।
প্ৰশ্ন হয়, কেৱল এজন কেম্পেইনাৰৰ বাবদ যদি মাত্ৰ তিনি দিনৰ প্ৰচাৰত প্ৰায় ২৮ লাখ টকা খৰচ কৰে, তেন্তে সঁচাকৈয়ে নিৰ্বাচনী আয়োগে বান্ধি দিয়া নিৰ্বাচনী ব্যয়ৰ সীমা অতিক্ৰম কৰিব নেকি শাসকীয় দল বিজেপিয়ে? নে নিজৰ প্ৰাৰ্থীক জয়ী কৰোৱাৰ স্বাৰ্থত বিজেপিয়ে ভংগ কৰিব নিৰ্বাচনী আচৰণ বিধিও?
