চিকিৎসাধীন ৰোগীক যৌন নিৰ্য্যাতনৰ দৰে এটা জঘন্য কাণ্ডই জোকাৰি গৈছে উত্তৰ গুৱাহাটীৰ আমিনগাওঁস্থিত জি এন আৰ চি হাস্পতাল। চিকিৎসালয়খনৰ আই চি য়ুৰ ভিতৰতে এগৰাকী ১৪ বছৰীয়া কিশোৰীক তিনিবাৰকৈ যৌন নিৰ্য্যাতন চলোৱাৰ অভিযোগ উঠিছে চিকিৎসালয়খনৰ ৱাৰ্ডবয় চান মহম্মদ আলীৰ বিৰুদ্ধে।
ভুক্তভোগীৰ দেউতাকৰ অভিযোগৰ ভিত্তিত গৌৰীপুৰ আৰক্ষীয়ে ইতিমধ্যে অভিযুক্ত চান মহম্মদক আটক কৰিছে।
ঘটনাৰ বিবৰণ অনুসৰি, ২৮ মাৰ্চৰ দিনা বিয়লি প্ৰায় ৩:৩০ বজাত বৰপেটাৰ ভলুকাবাৰীৰ এগৰাকী কিশোৰীক জটিল ৰোগৰ চিকিৎসাৰ বাবে ভৰ্তি কৰোৱা হৈছিল জি এন আৰ চি চিকিৎসালয়খনৰ আই চি য়ু কক্ষত।
কিন্তু কালি মাজনিশা প্ৰায় ১২ মান বজাত কিশোৰীগৰাকী থকা কক্ষত কোনো নথকাৰ সুযোগ লৈ অভিযুক্ত ৱাৰ্ডবয় চান মহম্মদে প্ৰৱেশ কৰি কিশোৰীগৰাকীৰ কাপোৰ খুলি গুপ্তাংগত স্পৰ্শ কৰাৰ লগতে যৌন নিৰ্য্যাতনো চলায় আৰু ৩ বাৰকৈ ধৰ্ষণৰ চেষ্টা চলায়। কিশোৰীগৰাকীৰ পিতৃয়ে গৌৰীপুৰ থানাত দাখিল কৰা এজাহাৰত এই কথা উল্লেখ কৰে।
এজাহাৰখনৰ ভিত্তিত গৌৰীপুৰ আৰক্ষীয়ে অভিযুক্ত ৱাৰ্ডবয় চান মহম্মদ আলীক আটক কৰি সোধা-পোছা অৱ্যাহত ৰাখিছে।
গৌৰীপুৰ আৰক্ষীক যোগাযোগ কৰিবলৈ চেষ্টা কৰা সত্ত্বেও ফোনত পোৱা নগ’ল।
উল্লেখযোগ্য যে যোৱা ৩১ ডিচেম্বৰত গুৱাহাটীৰ ডাঃ বি বৰুৱা কেন্সাৰ প্ৰতিষ্ঠানৰ আই চি য়ুতো একে ধৰণৰ এটা ঘটনা ঘটিছিল। কমলকান্তি সেন চৌধুৰী নামৰ এজন নাৰ্ছে তিনিগৰাকীকৈ কেন্সাৰ ৰোগীক ধৰ্ষণ কৰাৰ ঘটনা ঘটিছিল। ত্ৰিপুৰাৰ যুৱকজনক পিছত আৰক্ষীয়ে গ্ৰেপ্তাৰ কৰিছিল।
