বৃহস্পতিবাৰে দেশৰ সপ্তদশ লোকসভা নিৰ্বাচনৰ প্ৰথম পৰ্য্যায়ৰ ভোটগ্ৰহণ। দেখৰ ২০ খন ৰাজ্যৰ মুঠ ৯১ টা লোকসভা সমষ্টিত হ’ব প্ৰথম পৰ্য্যায়ৰ ভোটগ্ৰহণ। অসমৰো ৫ টা লোকসভা সমষ্টিত অনুষ্ঠিত হ’ব প্ৰথম পৰ্য্যায়ৰ ভোটগ্ৰহণ প্ৰক্ৰিয়া।
অসমৰ কলিয়াবৰ, তেজপুৰ, লখিমপুৰ, যোৰহাট আৰু ডিব্ৰুগড় লোকসভা সমষ্টিত পুৱা ৭ বজাৰ পৰা বিয়লি ৫ বজালৈকে অনুষ্ঠিত হ’ব ভোটগ্ৰহণ। প্ৰথম পৰ্য্যায়ৰ ভোটগ্ৰহণৰ বাবে ইতিমধ্যে নিৰ্বাচন আয়োগে প্ৰস্তুতি সম্পূৰ্ণ কৰি তুলিছে।
১১ নং কলিয়াবৰ লোকসভা সমষ্টিৰ মুঠ ২১৭৪ টা ভোটগ্ৰহণ কেন্দ্ৰত ১৭,৩১,৬১০ গৰাকী ভোটাৰে কাইলৈ ভোটদান কৰিব। ইয়াৰে ৮,৮৩,৩৮৮ জন পুৰুষ ভোটাৰ, ৮,৪৮,১৭৬ গৰাকী মহিলা আৰু ৪৬ গৰাকী তৃতীয় লিংগৰ ভোটাৰ। কলিয়াবৰৰ ভোটাৰ ৰাইজে সমষ্টিটোৰ মুঠ ৭ গৰাকী প্ৰাৰ্থীৰ ভাগ্য নিৰ্ণয় কৰিব।
৯ নং তেজপুৰ লোকসভা সমষ্টিৰ মুঠ ১৮৮০ টা কেন্দ্ৰত ১৪,৯৪,৮৭৮ গৰাকী ভোটাৰে ৭ গৰাকী প্ৰাৰ্থীৰ ভাগ্য নিৰ্ণয় কৰিব। ইয়াৰে ৭,৬৩,৫৯৯ জন পুৰুষ ভোটাৰ, ৭,৩১,২৪৮ গৰাকী মহিলা ভোটাৰ আৰু ৩১ গৰাকী তৃতীয় লিংগৰ ভোটাৰ।
১৪ নং লখিমপুৰ লোকসভা সমষ্টিত ১৭,০৪,৪৪৭ গৰাকী ভোটাৰে সৰ্বাধিক ১১ গৰাকী প্ৰাৰ্থীৰ নিৰ্ণয় কৰিব ভাগ্য। ইয়াৰে ৮,৬৬,৬৭৫ জন পুৰুষ, ৮,৩৭,৭৩০ গৰাকী মহিলা আৰু ৪২ গৰাকী তৃতীয় লিংগৰ ভোটাৰ আছে। সমষ্টিটোত মুঠ ২১১০ টা ভোটকেন্দ্ৰত হ’ব ভোটগ্ৰহণ।
১২ নং যোৰহাট লোকসভা সমষ্টিত ১৩,৬০,৩২৮ গৰাকী ভোটাৰে মুঠ ১৭৫৩ টা ভোটগ্ৰহণ কেন্দ্ৰত ভোটদান কৰিব। সমষ্টিটোত মুঠ ভোটাৰৰ ৬,৮৯,০৩৮ জন পুৰুষ ভোটাৰ, মহিলা ভোটাৰ ৬,৭১২৮৩ গৰাকী আৰু তৃতীয় লিংগৰ ভোটাৰ ৭ গৰাকী। সমষ্টিটোত প্ৰতিদ্বন্দিতা আগবঢ়োৱা প্ৰাৰ্থীৰ সংখ্যা ৮ গৰাকী।
তদুপৰি, ১৩ নং ডিব্ৰুগড় লোকসভা সমষ্টিত ১৩,১২,১৯৫ গৰাকী ভোটাৰে ভাগ্য নিৰ্ণয় কৰিব মুঠ ৮ গৰাকী প্ৰাৰ্থীৰ ভাগ্য। লোকসভা সমষ্টিটোৰ মুঠ ভোটাৰৰ ৬,৬২,৬৩৪ জন পুৰুষ ভোটাৰৰ বিপৰীতে ৬,৪৯,৫৩৩ গৰাকী মহিলা ভোটাৰ, তৃতীয় লিংগৰ ভোটাৰ ২৮ গৰাকী।
মন কৰিবলগীয়া যে, ৰাজ্যত প্ৰথম পৰ্য্যায়ৰ ৫ টা সমষ্টিত সৰ্বমুঠ ৭৬,০৩,৪৫৮ গৰাকী ভোটাৰ আছে। ইয়াৰে ৩৮,৬৫,৩৩৪ জন পুৰুষ আৰু ৩৭,৩৭,৯৭০ গৰাকী মহিলা ভোটাৰ। ৫ টা সমষ্টিত মুঠ ১৫৪ গৰাকী তৃতীয় লিংগৰ ভোটাৰ। এইসকলৰ ভোটাৰে ভাগ্য নিৰ্ণয় কৰিব সমষ্টিকেইটাৰ মুঠ ৪১ গৰাকী প্ৰাৰ্থীৰ। ৫ টা সমষ্টিত মুঠ ৯৫৭৪ টা ভোটকেন্দ্ৰত অনুষ্ঠিত হ’ব ভোটগ্ৰহণ।
ইতিমধ্যে, পুলিং, প্ৰিজাইডিং, চেক্টৰ আৰু জ’নেল অফিচাৰসকলক ভোটগ্ৰহণ কেন্দ্ৰসমূহলৈ প্ৰেৰণ কৰা হৈছে বুলি জানিব পৰা গৈছে। ভোটগ্ৰহণ কেন্দ্ৰ সমূহত মোটায়েন কৰা হৈছে নিৰাপত্তা বাহিনী তথা স্পৰ্শকাতৰ আৰু অধিক স্পৰ্শকাতৰ অঞ্চলসমূহত নিৰাপত্তা বাহিনী বেছিকৈ মোটায়েন কৰা হৈছে।
