ডিব্ৰুগড় লোকসভা সমষ্টিৰ মাৰ্ঘেৰিটা বিধান সভাৰ অন্তৰ্গত মাৰ্ঘেৰিটাৰ মহকুমাৰ সঞ্জুৱাৰা গাঁৱত থকা ভোটগ্ৰহণ কেন্দ্ৰত বৃহস্পতিবাৰে অনুষ্ঠিত হোৱা প্ৰথম পৰ্য্যায় ভোট গ্ৰহণত এটাও ভোট নপৰিল।
লেখাপানী গাঁও পাঞ্চায়তৰ অন্তৰ্গত সঞ্জুৱাৰা গাঁৱত ১০৫ জন টাংচা জনগোষ্ঠীৰ ভোটাৰে অৰুণাচলত ভোট দিয়ে ৷ অসম আৰু অৰুণাচল প্ৰদেশৰ সীমান্তত অৱস্থিত অতি দুৰ্গম অঞ্চলটোলৈ নিৰ্বাচনী বিষয়া আৰু সেনা-আৰক্ষীৰ দলে ২৪৩ নং সঞ্জুৱাৰা কমিয়ুনিটি চেণ্টাৰ ভোট কেন্দ্ৰ বিচাৰি গাঁওখনত উপস্থিত হয় যদিও উক্ত অঞ্চলটোত সেই নামৰ কোনো ভোটকেন্দ্ৰ নাছিল। ফলত নিৰ্বাচন অনুষ্ঠিত কৰিব যোৱা বিষয়া সকলে গাঁওখনৰ এজোপা গছৰ তলত ভোট কেন্দ্ৰ স্থাপন কৰি দিনটো ভোটাৰৰ বাবে অপেক্ষা কৰে যদিও এজনো ভোটাৰে ভোট দিবলৈ নাহিল।
অসম চৰকাৰৰ দীৰ্ঘদিনীয়া বঞ্চনা, অদূৰদৰ্শী নীতিৰ বাবে অঞ্চলৰ ভোটাৰ ৰাইজে ইতিমধ্যে অসমৰ পৰিবৰ্তে অৰুণাচল প্ৰদেশৰ ৰেচন কাৰ্ড, বিজুলী সেৱা, খোৱা পানী আদি লাভ কৰি আহিছে। অসম চৰকাৰে এইক্ষেত্ৰত অঞ্চলটোৰ জনসাধাৰণৰ মৌলিক সমস্যা সমূহ সমাধান কৰাৰ বাবে কোনো ধৰণৰ উদ্যোগ গ্ৰহণ কৰা পৰিলক্ষিত নহ’ল বুলি অঞ্চলটোৰ এজন বাসিন্দাই উল্লেখ কৰে।
উল্লেখযোগ্য যে, বিগত পঞ্চায়ত নিৰ্বাচনত লেখাপানীৰ টিপং ভোট কেন্দ্ৰত সঞ্জুৱাৰা গাঁৱৰ তিনিজন ভোটাৰে ভোট দান কৰিছিলে যদিও এইবাৰ লোকসভা নিৰ্বাচনত সম্পূৰ্ণৰূপে ভোট বৰ্জন কৰা ঘটনাই তীব্ৰ প্ৰতিক্ৰিয়াৰ সৃষ্টি হৈছে ৷ এইক্ষেত্ৰত চৰকাৰ আৰু প্ৰশাসনৰ যথেষ্ট দায়িত্ব আৰু কৰ্তব্য আছে বুলি সচেতন মহলে মন্তব্য কৰিছে
