১৯৬৯ চনত মেট্ৰিক পৰীক্ষাত প্ৰথম বিভাগত উত্তীৰ্ণ হৈ বহুতৰ পৰামৰ্শ নুশুনি তেওঁ বিজ্ঞানৰ সলনি কটন কলেজত কলা শাখাত নাম ভৰ্তি কৰিছিল। সেইগৰাকী ব্যক্তি আজি দেশৰ সৰ্বোচ্চ ন্যায়ালয়ৰ মুখ্য ন্যায়াধীশ।
মুখ্য ন্যায়াধীশ হিচাপে দেওবাৰে তাহানিতে পঢ়ি যোৱা কটন কলেজলৈ (এতিয়াৰ বিশ্ববিদ্যালয়) আহিল ৰঞ্জন গগৈ। কটন এলমনাই ভৱনৰ শুভ উদ্বোধন কৰি তেওঁ ভাগ লয় কটনৰ প্ৰাক্তন ছাত্ৰ সন্মিলনত। ইয়াতেই কটনত পঢ়ি যোৱা দিনৰ বহু স্মৃতি ৰোমন্থন কৰে দেশৰ মুখ্য ন্যায়াধীশ গৰাকীয়ে।
ভাষণৰ মাজতেই যুৱ কটনিয়ানক উদ্দেশ্যি ৰঞ্জন গগৈয়ে কয়, ‘’এইখন পৃথিৱীত বহুত অন্যায় হৈ আছে, বহুত নহ’বলগীয়া কাম হৈ আছে। কোনো কথাত নিশ্চিত হৈ নাথাকিবা। নিজৰ কাম কৰি যোৱা, ভগৱানৰ ওপৰত বিশ্বাস ৰাখা, তুমি লক্ষ্যত হ’বা।‘’
কটনক কলেজ বা বিশ্ববিদ্যালয় বোলাতকৈ তেওঁ ইয়াক এক অনুষ্ঠান বুলিহে অভিহিত কৰিব বিচাৰে বুলিও মন্তব্য কৰে। তেওঁ কয়, ‘’কটনক কলেজ বা বিশ্ববিদ্যালয় বুলি ক’লে ইয়াৰ পৰিসৰ সীমিত হৈ থাকিব। ই এক অনুষ্ঠান। মই ভাবো এনে অনুষ্ঠান এখন সমাজক আগুৱাই নিয়াৰ এক স্তম্ভস্বৰূপ। ই ৰাষ্ট্ৰ নিৰ্মাণতো অৱদান আগবঢ়ায়।‘’
পূৰ্বৰ কটনিয়ানক লৈ এতিয়াৰ কটনিয়ানে গৌৰৱ কৰে বুলি উল্লেখ কৰি নতুন সকলকো সেইদৰে নিজৰ লক্ষ্যত আগুৱাই যাবলৈ তেওঁ পৰামৰ্শ আগবঢ়ায়।
নৱেম্বৰ মাহত মুখ্য ন্যায়াধীশৰ আসনৰ পৰা অৱসৰ লোৱাৰ পাছত গুৱাহাটীলৈ আহি এই অনুষ্ঠানৰ লগত পুনৰ জড়িত হৈ পৰিব বুলিও তেওঁ মন্তব্য কৰে।
এই অনুষ্ঠানত গুৱাহাটী উচ্চ ন্যায়ালয়ৰ ভাৰপ্ৰাপ্ত মুখ্য ন্যায়াধীশ অৰূপ গোস্বামীৰ উপৰিও বিভিন্ন ক্ষেত্ৰৰ লগত জড়িত ঐতিহ্যমণ্ডিত শিক্ষানুষ্ঠানখনৰ যথেষ্ঠ সংখ্যক প্ৰাক্তন ছাত্ৰ-ছাত্ৰী উপস্থিত থাকে।
উল্লেখ্য যে, ৰাজ্য সভাৰ সাংসদ ভুৱনেশ্বৰ কলিতা, ৰিপুন বৰা আৰু বিশ্বজিত দৈমাৰীৰ সাংসদ পুঁজিৰে কটন বিশ্ববিদ্যালয় চৌহদত কটন এলমনাই ভৱনটো নিৰ্মাণ কৰি উলিওৱা হৈছে।
