বিগত লোকসভা নিৰ্বাচনত টিকটৰ পৰা শেষ মুহূৰ্তত বঞ্চিত, তাৰ পিছত ৰাজ্যসভাৰ প্ৰাৰ্থিত্বৰ পৰা বঞ্চিত আৰু শেষত মোদীৰ দ্বিতীয়খন মন্ত্ৰীসভাৰো বাহিৰত ৰৈ যোৱা “অতি সক্ৰিয়” মন্ত্ৰী ড০ হিমন্ত বিশ্ব শৰ্মা নাই অলপতে নতুনকৈ হ’ব লগীয়া ৰাজ্যিক বিজেপিৰ সভাপিত পদৰ দৌৰতো।
ৰাজ্যিক বিজেপিৰ এটা সূত্ৰই জনোৱা মতে অহা মাহত দলৰ সভাপতি সলনি হোৱাটো নিশ্চিত আৰু তাৰ বাবে কেইবাজনৰো নাম চৰ্চাত আছে। কিন্তু তাৰ মাজত নাই হিমন্তৰ নাম।
সূত্ৰটোৰ মতে, এইবাৰ যুৱ প্ৰজন্মৰ পৰাহে সভাপতিজন নিৰ্বাচন কৰাৰ সম্ভাৱনা অধিক।
সৰ্বাধিক গুৰুত্বসহ চৰ্চাত আছে সোণোৱাল কেবিনেটৰ জলসিঞ্চন বিভাগৰ মন্ত্ৰী ভৱেশ কলিতাৰ নাম, নিৰ্ভৰযোগ্য সূত্ৰটোৰ দাবী।
ৰাজ্যসভাৰ কাৰণেও প্ৰাৰ্থিত্ব বিচাৰি বিমুখ হোৱা বিজেপিৰ উপ-সভাপতি প্ৰদীপ ঠাকুৰীয়ায়ো সভাপতি পদটোৰ বাবে ইতিমধ্যে আৱেদন জনাইছে যদিও তেওঁৰ সম্ভাৱনা তেনেই খীণ বুলি জনালে সূত্ৰটোৱে।
আনহাতে, সূত্ৰটোৱে লগতে বৰ্তমানৰ সভাপতি ৰঞ্জিত দাসে সোণোৱাল মন্ত্ৰী সভাত স্থান পূৰোৱাৰ সম্ভাৱনা ব্যক্ত কৰে। শক্তি মন্ত্ৰী তপন গগৈ আৰু শ্ৰম মন্ত্ৰী পল্লৱলোচন দাস সাংসদ হিচাপে নিৰ্বাচিত হোৱাত সোণোৱাল মন্ত্ৰীসভাত নতুন মুখ অন্তৰ্ভুক্তিৰ বাট মুকলি হৈ আছে।
উল্লেখ কৰিব পাৰি যে মন্ত্ৰী হিমন্তই লোকসভা নিৰ্বাচনত তেজপুৰ সমষ্টিৰ পৰা প্ৰাৰ্থিত্ব পাব বুলি শেষ মুহূৰ্তলৈকে চৰ্চা হৈ আছিল, যিটো পিছত হৈ নুঠিল। তাৰ পিছত যোৱা ৩০ মে’ত মোদীৰ দ্বিতীয়খন মন্ত্ৰীসভাৰ শপত গ্ৰহণৰ দিনটোলৈকে হিমন্ত কেন্দ্ৰীয় মন্ত্ৰীসভাত অন্তৰ্ভুক্ত হ’ব বুলি ৰাজ্যৰ ৰাজনৈতিক মহলত চৰ্চা হৈছিল যদিও সেয়াও হৈ নুঠিল।
