কেঁচু খান্দোতে সাপ!! অধ্যাপিকা ড০ পল্লৱী ডেকা বুজৰবৰুৱাই যৌন নিৰ্য্যাতনৰ অভিযোগ প্ৰত্যাহাৰৰ হেঁচা দিছিল ছাত্ৰীগৰাকীক

কেঁচু খান্দোতে সাপ ওলোৱাৰ দৰে পোহৰলৈ আহিছে ডিব্ৰুগড় বিশ্ববিদ্যালয়ৰ অসমীয়া বিভাগৰ অধ্যাপিকা ড০ পল্লৱী ডেকা বুজৰবৰুৱাৰ এক “আচৰিত কাণ্ড”।

বৰ্তমান সাংস্কৃতিক বিশ্ববিদ্যালয়ৰ উপাচাৰ্য্য হিচাপে নিযুক্ত ড০ ডম্বৰুধৰ নাথৰ বিৰুদ্ধে যৌন নিৰ্য্যাতনৰ অভিযোগ অনা ভুক্তভোগী ছাত্ৰীগৰাকীক অভিযোগ প্ৰত্যাহাৰৰ বাৰম্বাৰ হেঁচা দিছিল অধ্যাপিকাগৰাকীয়ে।

ভুক্তভোগী ছাত্ৰীগৰাকীক “ছাৰে অৱসৰ ল’লে যেতিয়া মই এতিয়া ইমানতে সন্তুষ্ট আৰু তেওঁক একো শাস্তি দিব নালাগে” এই বুলি লিখি তেওঁৰ হাতত ১১ এপ্ৰিল, ২০১৭ তাৰিখৰ ভিতৰত দিবলৈ কৈছিল অধ্যাপিকাগৰাকীয়ে।

অসম প্ৰদেশ যুৱ কংগ্ৰেছে আজি ৰাজীৱ ভৱনত দিয়া এখন সংবাদমেলত ড০ ডম্বৰুধৰ নাথৰ বিৰুদ্ধে যৌন নিৰ্য্যাতনৰ অভিযোগ থকা বুলি দাঙি ধৰোতে প্ৰদৰ্শন কৰা নথি-পত্ৰৰ প্ৰতিলিপিৰ মাজেৰে এই কথাটো পোহৰলৈ আহে।

ভুক্তভোগী বুৰঞ্জী বিভাগৰ ছাত্ৰীগৰাকীয়ে ২৬-০৪-১৭ তাৰিখে অসমীয়া বিভাগৰ অধ্যাপিকা ড০ পল্লৱী ডেকা বুজৰবৰুৱালৈ এখন পত্ৰ লিখিছিল, য’ত অধ্যাপিকাগৰাকীয়ে তেওঁক অধ্যাপকজনৰ বিৰুদ্ধে অনা গুৰুতৰ অভিযোগটো প্ৰত্যাহাৰ কৰিবলৈ কৰা অনুৰোধ ৰাখিবলৈ অপাৰগতা প্ৰকাশ কৰা হৈছে।

“দুঃখিত যে মই আপোনাৰ কথাটো ৰাখিব নোৱাৰিম”, অধ্যাপিকাগৰাকীলৈ লিখা আৰু ‘সন্মান সহকাৰে জনাওঁ যে…’ বুলি সম্বোধন কৰা পত্ৰখনত ছাত্ৰীগৰাকীয়ে লিখিছে।

নিজৰ ন্যায় প্ৰাপ্তিৰ দাবীত ছাত্ৰীগৰাকীয়ে এইদৰে অটল স্থিতি প্ৰকাশ কৰাৰ প্ৰায় তিনি মাহৰ পিছত (২১-০৭-২০১৭ তাৰিখে) বিশ্ববিদ্যালয় কৰ্তৃপক্ষই তেওঁলৈ এখন পত্ৰ দিয়ে। পত্ৰখনত তেওঁৰ অভিযোগপত্ৰখন পোৱাৰ লগে লগে বিশ্ববিদ্যালয়খনৰ অন্তৰ্গত Gender sensitization and complaint committee for sexual harassment, Dibrugarh University (GSCASH)-লৈ ব্যৱস্থা গ্ৰহণৰ বাবে প্ৰেৰণ কৰা বুলি জানিবলৈ দিও অৱসৰ লোৱা বাবে অভিযুক্ত ড০ নাথক বিশ্ববিদ্যালয়খনৰ নিয়ম-নীতিৰ ভিতৰত বিচাৰ কৰিব পৰা নাযাব বুলি ছাত্ৰীগৰাকীক জনাই দিয়ে।

অধ্যাপিকা ড০ পল্লৱী ডেকা বুজৰবৰুৱা এই যৌন নিৰ্য্যাতন সম্পৰ্কীয় অভিযোগৰ বিচাৰ কৰা কমিটীখনৰো সদস্যা।

লগতে পঢ়ক “ভাল নম্বৰৰ বিনিময়ত ছাত্ৰীৰ প্ৰেম দাবী”ত অভিযুক্তক সাংস্কৃতিক বিশ্ববিদ্যালয়ৰ উপাচাৰ্য্য নিযুক্তিত তীব্ৰ প্ৰতিক্ৰিয়া

উল্লেখযোগ্য যে ছাত্ৰীগৰাকীয়ে তেওঁক যৌন নিৰ্য্যাতনৰ সবিশেষ লিখি ১৫-১১-১৬ তাৰিখত বিশ্ববিদ্যালয় কৰ্তৃপক্ষক অভিযোগ দিয়াৰ ১৫ দিনৰ ভিতৰতে সেই সময়ত বুৰঞ্জী বিভাগৰ অধ্যাপক আৰু অনিৰুদ্ধদেৱ আসনত অধিষ্ঠিত অধ্যাপক ড০ ডম্বৰুধৰ নাথে স্বাস্থ্যজনিত কাৰণ দৰ্শাই স্বেচ্ছামূলক অৱসৰ লৈছিল আৰু বিশ্ববিদ্যালয়ৰ পৰা আঁতৰি গৈছিল।

আজিও ন্যায়ৰ পৰা বঞ্চিত হৈ থকা ছাত্ৰীগৰাকীয়ে ড০ পল্লৱী ডেকা বুজৰবৰুৱাক জনায় যে বিশ্ববিদ্যালয়ৰ সুস্থ শৈক্ষিক পৰিৱেশৰ স্বাৰ্থতে তেওঁৰ অভিযোগটোৰ তদন্ত আগ বঢ়াই নিয়াটো বিচাৰে।

অভিযোগটো অনাৰ সময়ত বুৰঞ্জী বিভাগৰ প্ৰথম ষান্মাষিকত পঢ়ি থকা ছাত্ৰীগৰাকীয়ে ২৬-০৪-১৭-ত অধ্যাপিকা ড০ পল্লৱী ডেকা বুজৰবৰুৱালৈ লিখা চিঠিখনৰ মূল অংশটো এনে ধৰণৰ :

সন্মান সহকাৰে জনাওঁ যে যোৱা ২০১৬-ৰ ১৫ নৱেম্বৰ তাৰিখে মই মোৰ বুৰঞ্জী বিভাগৰ প্ৰধ্যাপক ড০ ডম্বৰুধৰ নাথ চাৰৰ বিৰুদ্ধে এটা অভিযোগ দিছিলো। অভিযোগ মৰ্মে তদন্তকালীন অৱস্থাত তেওঁ অৱসৰ লয়। মই জনামতে তেখেতে স্বাস্থ্যজনিত কাৰণত অৱসৰ লৈছে। কিন্তু তেখেতৰ অৱসৰৰ কাৰণৰ লগত মোৰ অভিযোগৰ বিষয় সম্পূৰ্ণ বেলেগ। তেনেস্থলত আপুনি মোক ২৫ মাৰ্চ, দেওবাৰে পুৱা ৮:৫৫ বজাত ফোনত আৰু ৬ এপ্ৰিল ২০১৭-ৰ বৃহস্পতিবাৰে দিনৰ প্ৰায় ১:০০ বজাত জঃছাগ কেণ্টিনত কয় যে, “ছাৰে অৱসৰ ল’লে যেতিয়া মই এতিয়া ইমানতে সন্তুষ্ট আৰু তেওঁক একো শাস্তি দিব নালাগে” এই বুলি লিখি আপোনাৰ হাতত ১১ এপ্ৰিল, সোমবাৰৰ ভিতৰত দিবলৈ কয়। বিহুৰ বন্ধত ঘৰৰ সকলোৰে লগত আলোচনা কৰি মোৰ ফালৰ পৰা আপোনাক এইটো জনাবলৈ পাই দুঃখিত যে মই আপোনাৰ কথাটো ৰাখিব নোৱাৰিম। কাৰণ ভৱিষ্যতে এক সুস্থ শৈক্ষিক পৰিৱেশ বৰ্তাই ৰাখিবৰ বাবে এক সুস্থ ন্যায়িক তদন্ত হোৱা উচিত। এই সন্দৰ্ভত বিশেষ একো ন্যায়িক তদন্ত হোৱা পৰিলক্ষিত হোৱা দেখা নাই। গতিকে মোৰ অভিযোগটোৰ উচিত তদন্ত আগ বাঢ়ি যোৱাটো মই বিচাৰো।

যৌন নিৰ্য্যাতন সম্পৰ্কীয় অভিযোগৰ বিচাৰ কৰা কমিটীখনৰ সদস্যা তথা সাহিত্য চৰ্চা কৰা অধ্যাপিকা ড০ পল্লৱী ডেকা বুজৰবৰুৱাৰ এই কাণ্ডই হতচকিত কৰিছে বহুতকে। নাৰীয়ে কৰ্মস্থান, শিক্ষানুষ্ঠানত সন্মুখীন হৈ অহা যৌন নিৰ্য্যাতনৰ প্ৰতি এগৰাকী মহিলা হিচাপে অধ্যাপিকাগৰাকীৰ এই অনুভূতিহীনতা চিন্তনীয়। একেদৰে বিশ্ববিদ্যালয়খনক এনেকুৱা “ভাল নম্বৰৰ প্ৰলোভনেৰে নাৰী চিকাৰ” জাতীয় অপবাদৰ পৰা মুক্ত কৰিবলৈ বিশ্ববিদ্যালয় কৰ্তৃপক্ষৰ উদ্যোগহীনতাও হতাশাজনক।