খটখটী আৰক্ষীয়ে সোমবাৰে নিশা পূব কাৰ্বি আংলঙৰ অসম-নাগালেণ্ড সীমান্ত অঞ্চলত এখন দহচকীয়া মালভৰ্তি ট্ৰাক অপহৰণ কৰাৰ চেষ্টা ব্যৰ্থ কৰে। আৰক্ষীয়ে ট্ৰাকখনৰ ড্ৰাইভাৰ, হেণ্ডিমেনৰ লগতে ঘটনাটোৰ লগত জড়িত মুঠ আঠগৰাকী লোকক ইতিমধ্যে গ্ৰেপ্তাৰ কৰিছে।
ঘটনাৰ বিৱৰণী অনুসৰি, ট্ৰাকখনৰ চালকগৰাকীয়ে নুমলীগড় জংচনৰ ওচৰৰ পৰা ট্ৰাকখনৰ গতিপথ ডিমাপুৰ অভিমুখে সলনি কৰে। ট্ৰাকখনৰ গৰাকীয়ে ইতিমধ্যে ড্ৰাইভাৰজনৰ লগত সংযোগ হেৰুৱাই যদিও ট্ৰাকৰ লগত সংযুক্ত হৈ থকা জি পি এচ যন্ত্ৰৰ সহায়ত সাম্ভাব্য অপহৰণৰ উমান পাই খটখটী আৰক্ষীক ঘটনাটো অৱগত কৰে।
খটখটী আৰক্ষীয় প্ৰকাশ কৰা মতে তেওঁলোকে নিৰ্দ্ধাৰিত সূত্ৰৰ পমখেদি ট্ৰাকখন নাগালেণ্ডত প্ৰবেশৰ পূৰ্বে খটখটীত থকা অন্তিমটো পহৰাচকীত আটক কৰিবলৈ সক্ষম হয় আৰু চালক তিলক বিশ্বকৰ্মা আৰু সহযোগী সুমন চেত্ৰীকো আটক কৰে।
আনহাতে, আৰক্ষীৰ জেৰাত ট্ৰাক ড্ৰাইভাৰগৰাকীয়ে দিয়া ভাষ্য অনুসৰি ট্ৰাক অপহৰণৰ লগত জড়িত আন ছজন লোকক আৰক্ষীয়ে আটক কৰে।
আৰক্ষীয়ে আটক কৰা লোক কেইগৰাকী গীলবাৰ্ট পাও, কিভি কিহো, ৰাণা চৌধুৰী, স্বৰূপ চাহানী, সুবোধ যাদৱ আৰু বিকি দেৱ বুলি চিনাক্ত কৰা হয়। আৰক্ষীয়ে আটক কৰা আটাইকেইগৰাকী লোক নাগালেণ্ডৰ ডিমাপুৰৰ বাসিন্দা।
