মুকেশ আম্বানিৰ কণিষ্ঠ পুত্ৰ অনন্ত আৰু অসমৰ বন্যপ্ৰাণীৰ চোৰাংকাৰবাৰী মুমতাজ ছিদ্দিকিৰ পুত্ৰ ইমৰাণৰ মাজত আছে বিশেষ হলিগলি।
আৰু, দুয়োটাৰ মাজত থকা সাধাৰণ যোগসূত্ৰটো হৈছে ‘‘হাতী’’।
বাতৰি অনুসৰি, ইমৰাণ ছিদ্দিকি ওৰফে ইমৰাণ খানে দাবী কৰিছে যে ভাৰতৰ আটাইতকৈ ধনী ব্যক্তিগৰাকীৰ পুত্ৰ অনন্ত আম্বানি তেওঁৰ বন্ধু।
প্ৰকৃততে, ইমৰাণ ছিদ্দিকি ওৰফে ইমৰাণ খান হৈছে উজনি অসমৰ তিনিচুকীয়া জিলাৰ ডুমডুমাৰ কুখ্যাত বন্যপ্ৰাণীৰ চোৰাংকাৰবাৰী মুমতাজ ছিদ্দিকিৰ পুত্ৰ।
২০১৬ চনৰ জুন মাহত মুমতাজ ছিদ্দিকিক অসমৰ পৰা আন ৰাজ্যলৈ হাতীৰ চোৰাং সৰবৰাহৰ সৈতে জড়িত থকাৰ বাবে তিনিচুকীয়া জিলাৰ বৰহাপজানৰ পৰা গ্ৰেপ্তাৰ কৰা হৈছিল।
মুমতাজ ছিদ্দিকিয়ে চৰাইপুঙ সংৰক্ষিত বনাঞ্চলৰ পৰা বিহাৰ, গুজৰাট আৰু কেৰালাত অবৈধভাৱে ১২ টা হাতী বিক্ৰী কৰিছিল।
উজনি অসমৰ এখন সৰু চহৰ ডুমডুমাৰ যুৱক ইমৰাণে কেনেকৈ অনন্ত আম্বানিৰ সৈতে প্ৰত্যক্ষ সম্পৰ্ক স্থাপন কৰিবলৈ সক্ষম হৈছে সেয়া এতিয়ালৈকে জানিব পৰা হোৱা নাই।
সেয়া যিয়েই নহওক, ইমৰাণে অনন্ত আম্বানিৰ সৈতে তেওঁৰ সম্পৰ্কক লৈ গৌৰৱান্বিত। তেওঁ ছচিয়েল মিডিয়া ছাইট ফেইচবুকত অতি গৌৰৱেৰে সেয়া সদৰী কৰিছে।
আকৌ, মাজত এটা মালা পিন্ধা হাতীৰ সৈতে অনন্ত আৰু ইমৰাণৰ এখন ফটো যোৱা ২০১৬ চনৰ ১৩ জুনত ফেইচবুকত প’ষ্ট কৰিছিল।
অসমৰ বন্যপ্ৰাণীৰ চোৰাং কাৰবাৰীৰ পুত্ৰই মুকেশ আম্বানিৰ পুত্ৰক কেইবাবাৰো লগ পোৱাৰ দাবী কৰিছে। অনন্তৰ জন্তুৰ প্ৰতি, বিশেষকৈ হাতীৰ প্ৰতি অত্যন্ত আকৰ্ষণ আছে।
আনকি এগৰাকী কিশোৰ হিচাপে অনন্ত আম্বানি ব্যতিক্ৰমীভাৱে আধ্যাত্মিক ভাৱাপন্ন। সংবাদ মাধ্যমৰ বাতৰি ওলাইছিল যে তেওঁ সঘনে প্ৰভু বালাজী মন্দিৰ ভ্ৰমণ কৰিছিল।
তেওঁৰ বিশ্বাসৰ প্ৰমাণ হিচাপে, অনন্ত আম্বানিয়ে প্ৰভু বালাজীলৈ উপাসনাৰ উদ্দেশ্যে বগা হাতী এক বিশেষ উপহাৰ হিচাপে আগবঢ়াইছিল।
অনন্ত লগতে তিৰুপতিৰ মন্দিৰৰ হাতী চোৱাচিতা বিষয়কলৈ তেওঁৰ চিন্তাৰ বাবে বাতৰিৰ শিৰোণামলৈ আহিছিল। তেওঁকবদ্ৰীনাথ কেদাৰনাথ মন্দিৰ সমিতিৰ এগৰাকী সদস্য হিচাপেও নিযুক্তি দিয়া হৈছে।
ইমৰাণ ছিদ্দিকি ওৰফে ইমৰাণ খান অলপতে বাতৰিৰ শিৰোনামালৈ আহিছিল যেতিয়া আহমেদাবাদৰ জগন্নাথ মন্দিৰলৈ চাৰিটা অপ্ৰাপ্ত বয়স্ক হাতী যোগানৰ বাবে তেওঁ এগৰাকী ‘’মধ্যভোগী’’ আছিল বুলি বাতৰি প্ৰকাশ পাইছিল।
ইমৰাণ ছিদ্দিকি ওৰফে ইমৰাণ খানৰ লগতে জগন্নাথ মন্দিৰলৈ হাতী যোগানৰ আন ‘’মধ্যভোগী’’ হৈছে তিনিচুকীয়াৰ হুকুমদৰ খান ওৰফে মুন্না খান।
উল্লেখযোগ্য যে ইমৰাণ ছিদ্দিকি ওৰফে ইমৰাণ খানে ২০১৬ চনত অসম বিধানসভাৰ নিৰ্বাচনত ডিগবৈ সমষ্টিৰ পৰা ভাৰত বিকাশ মৰ্চাৰপ্ৰাৰ্থী হিচাপে প্ৰতিদ্বন্দ্বিতা কৰিছিল।
