অসমত হাতী ক্ৰয় কৰা তথা বিক্ৰী কৰাটো ‘আইনীভাৱে স্বীকৃত’-আৰু আনকি এজন মৃত মানুহেও ৰাজ্যখনত তেওঁৰ হাতী বিক্ৰী কৰিব পাৰে।
বন্যপ্ৰাণী (সুৰক্ষা) আইন, ১৯৭২ৰ ধাৰা ৪৩ অনুসৰি, ভাৰতত হাতী বিক্ৰী বা ক্ৰয় কৰাটো এটা অপৰাধ।
আকৌ, হাতী এটা বিক্ৰী কৰোতে কোনোৱে যদি ধৰা পৰে, তেওঁৰ ১০,০০০ টকা জৰিমনা সহ সাত বছৰৰ বাবে জেইল হ’ব পাৰে।
কিন্তু, এই নিয়ম কেৱল কাগজতে সীমাবদ্ধ থকা দেখা যায়। ইপিনে, অসমত এতিয়াও মুকলিকৈ হাতী কিনা-বেচা চলি আছে।
এটা হাতী বিক্ৰী কৰাৰ এখন শপতনামা (এফিডেভিট) নৰ্থইষ্ট নাওৰ হাতত পৰিছে, আৰু ইয়াত স্পষ্টভাৱে দেখা গৈছে যে তিনিচুকীয়াৰ ডুমডুমাৰ ওচৰৰ ৰাইডিং গাঁৱৰ ৰত্নেশ্বৰ মৰাণৰ পুত্ৰ নন্দেশ্বৰ মৰাণে তেওঁৰ ১৮ মহীয়া হাতীটো বিক্ৰী কৰিছে।
শপতনামাখনত কোৱা হৈছে, নন্দেশ্বৰ মৰাণে ১৮ মহীয়া হাতী পোৱালি পুষ্পা/পখিলিক তিনিচুকীয়া জিলাৰ বৰহাপজানৰ ওচৰৰ চিঙলিজান গাঁৱৰ প্ৰয়াত টেনিছুৰ ৰহমানৰ পুত্ৰ মহম্মদ মুমতাজ ছিদ্দিকিক বিক্ৰী কৰিছিল।
শপতনামাত কোৱা হৈছে যে ২০০১ চনৰ ৭ জানুৱাৰিত হাতী পোৱালিটো জন্ম পাইছিল আৰু তাৰ মাক আছিল ভোগমালা।
ইয়াত কোৱা হৈছে যে হাতী পোৱালিটো ২০০২ চনৰ ৫ জুলাইত ইয়াৰ ক্ৰেতাক (মহম্মদ মুমতাজ ছিদ্দিকি)বিক্ৰী তথা গতাই দিয়া হৈছে।
শপতনামাখন ২০১৬ চনৰ ২৫ জুনত তিনিচুকীয়া জিলাৰ কোনো জনৈক পি এন গগৈয়ে (ন’টাৰী পঞ্জীয়ন নম্বৰ ৩) স্বাক্ষৰ কৰি দিছিল আৰু চুক্তিপত্ৰৰ সাক্ষী আছিল তিনিচুকীয়াৰ এগৰাকী উকীল।
এজন ন’টাৰী ব্যক্তি সাধাৰণতে সা-সম্পত্তি, চুক্তিপত্ৰ, পাৱাৰ অফ এটৰ্নি আৰু বৈদেশিক তথা আন্তৰ্জাতিক বাণিজ্যৰ সৈতে সম্বন্ধিত বিতৰ্কহীন বিষয়ত ৰাইজক সেৱা কৰিবলৈ আইনে গঠন কৰি দিয়া এগৰাকী পাব্লিক অ’ফিচাৰ।
দৰাচলতে, ২০০২ চনৰ ৫ জুলাইত হাতী পোৱালিটো বিক্ৰী কৰা আৰু ২০১৬ চনৰ ২৫ জুনত বিক্ৰী দলিলত স্বাক্ষৰ কৰা নন্দেশ্বৰ বৰ্মনৰ প্ৰকৃততে ১৯৯৩ চনৰ ১২ অক্টোবৰত নিজা বাসগৃহত মৃত্যু হৈছিল।
তিনিচুকীয়া জিলাৰ জন্ম আৰু মৃত্যু পঞ্জীয়কে জাৰি কৰা মৃত্যুৰ প্ৰমাণ পত্ৰ নৰ্থইষ্ট নাওৰ হাতত আছে।
১৯৯৩ চনৰ অক্টোবৰত মৃত্যুবৰণ কৰা এজন ব্যক্তিয়ে কেনেকৈ তেওঁৰ হাতীটো ২০০২ চনত বিক্ৰী কৰিব আৰু ২০১৬ চনৰ জুনত শপতনামাত স্বাক্ষৰ কৰিব পাৰে?
আমোদজনকভাৱে, হাতী পোৱালিটো ক্ৰয় কৰিছিল কুখ্যাত বন্যপ্ৰাণী স্মাগলাৰ মহম্মদ মুমতাজ ছিদ্দিকিয়ে।
মুমতাজ ছিদ্দিকি চৰাইপুং সংৰক্ষিত বনাঞ্চলৰ পৰা ধৰি অনা ১২টা বনৰীয়া হাতীক অসমৰ বাহিৰৰ লোকক বিক্ৰী কৰাৰ বাবে দায়ী আছিল।
তিনিচুকীয়াত বিক্ৰী শপতনামাথনত স্বাক্ষৰ কৰাৰ ৪দিন পিছত ২০১৬ চনৰ ২৯ জুনত তেওঁক গ্ৰেপ্তাৰ কৰা হৈছিল।
আনহাতে, নন্দেশ্বৰ মৰাণৰ ভাতৃ মনেশ্বৰ মৰাণও অলপতে বাতৰিত আহিছিল।
মনেশ্বৰ মৰাণ বাবুলাল নামৰ অপ্ৰাপ্তবয়স্ক মতা হাতীটোৰ গৰাকী। অসমৰ বন বিভাগে বাবুলালক (আন ৩টা হাতীৰ সৈতে) আহমেদাবাদৰ জগন্নাথ মন্দিৰলৈ পৰিবহণৰ অনুমতি প্ৰদান কৰিছিল।
কিন্তু আইনী মেৰপাক আৰু উত্তৰ ভাৰতৰ গ্ৰীষ্ম প্ৰবাহৰ বাবে বৃহস্পতিবাৰে বন বিভাগে অপ্ৰাপ্তবয়স্ক হাতী চাৰিটা পৰিবহণৰ অনুমতি স্থগিত ৰখাৰ সিদ্ধান্ত লয়।
অৱশেষত বৃহস্পতিবাৰে অসমৰ বন বিভাগে তিনিচুকীয়াৰ পৰা আহমেদাবাদৰ জগন্নাথ মন্দিৰলৈ অপ্ৰাপ্তবয়স্ক হাতী চাৰিটা পৰিবহণৰ সিদ্ধান্ত স্থগিত ৰখাৰ সিদ্ধান্ত ল’লে।
