দেওবাৰে অৰুণাচলৰ তেজুত সংঘটিত এক ভয়ংকৰ পথ দুৰ্ঘটনাত পতিত হয় অসমৰ কেইজনমান যুৱক। ইয়াৰ পিছতে ঘটনাস্থলীত উত্তপ্ত পৰিস্থিতিৰ সৃষ্টি হয়।
ঘটনাৰ বিৱৰণি মতে অসমৰ কাকপথাৰ আৰু দুলীয়াজানৰ পৰা ৩০ জনীয়া এটা দল মটৰচাইকেলেৰ অৰুণাচললৈ ফুৰিবলৈ গৈছিল।
দেওবাৰে অৰুণাচলৰ তেজুত অসমৰ পৰা যোৱা যুৱকৰ দলটোৰ মটৰচাইকেলৰ খুন্দাত এজন স্থানীয় লোকে থিতাতে মৃত্যুক আঁকোৱালি লয়। ফলত স্থানীয় ৰাইজ উত্তেজিত হৈ পৰে।
একাংশ উত্তেজিত ৰাইজে যুৱকৰ দলটোৰ ৫ খনকৈ মটৰচাইকেলত জুই লগাই দিয়ে। ইয়াৰে দুৰ্ঘটনাত পতিত ৩০ জনীয়া দলটোৰ প্ৰায় ১০ জন যুৱক বাতৰি লিখা পৰলৈকে অৰুণাচলতে আবদ্ধ হৈ আছে বুলি জানিব পৰা গৈছে।
ইতিমধ্যে আৰক্ষীয়ে আটাইকেইজন যুৱককে আটক কৰিছে বুলি জানিব পৰা গৈছে।
