অসমৰ কয়লা চিণ্ডিকেট প্ৰসংগত লোকসভাত মঙলবাৰে প্ৰদ্যুৎ বৰদলৈয়ে লোৱা সৰৱ ভূমিকাৰ পিছতে গুৱাহাটীত সংবাদমেলযোগে কংগ্ৰেছ নেতাজনক শাসক দল বিজেপিয়ে উভতি ধৰিছে।
মঙ্গলবাৰে সন্ধিয়া হেঙেৰাবাৰীস্থিত বিজেপিৰ ৰাজ্যিক কাৰ্য্যালয়ত জয়ন্ত মল্ল বৰুৱাই নগাঁৱৰ সাংসদগৰাকীক কটাক্ষ কৰাৰ লগতে ‘দন্দুৰী মহিলা’ আখ্যা দিয়ে।
“প্ৰদ্যুৎ বৰদলৈয়ে সংসদৰ মজিয়াত কয়লা চিণ্ডিকেটৰ প্ৰসংগ উত্থাপন কৰাৰ পাছত এনে লাগিছে যে বহুদিন মনে মনে থকা নিমাতী কন্যা এগৰাকী যেন দন্দুৰী মহিলা হ’ল,” সংবাদমেলত বৰুৱাৰ মন্তব্য।
লগতে পঢ়ক– লোকসভাৰ মজিয়াত অসমৰ কয়লা চিণ্ডিকেট প্ৰসংগ, এন এছ চি এনলৈ যায় ধনৰ ভাগ
মুখ্য মন্ত্ৰী হোৱাৰ অবাস্তৱ সপোন দেখি নিমাতী কন্যাৰ পৰা দন্দুৰী মহিলা হ’ব নালাগে বুলিও বৰুৱাই সংবাদমেলত কয়। “মুখ্য মন্ত্ৰী হোৱাৰ অবাস্তৱ সপোন দেখি দন্দুৰী মহিলা হ’ব নালাগে। তেওঁৰ যি স্বভাৱ সেই স্বভাৱতে থাকক। সাংসদ হোৱাৰ পাছত মুখ্য মন্ত্ৰী হোৱাৰ অলীক কল্পনা লৈ অনাহকত কিছুমান কথা ক’বলৈ আৰম্ভ কৰিছে।”
আনহাতে, ২০০১ চনৰ পৰা প্ৰদ্যুৎ বৰদলৈয়েহে মাৰ্ঘেৰিটাত কয়লা চিণ্ডিকেট চলাই অহা বুলি অভিযোগ তোলে বৰুৱাই।
তেওঁ কয়, “২০০১ চনৰ পৰা মাৰ্ঘেৰিটাত কেনেদৰে কয়লা চিণ্ডিকেট চলি আছিল সেই উত্তৰ বৰদলৈয়ে ভালদৰে দিব পাৰিব।”
ইপিনে, বৰদলৈয়ে সংসদত কয়লা চিণ্ডিকেটৰ তদন্তৰ বাবে মন্ত্ৰী গোট গঠনৰ বাবে জনোৱা দাবীক আদৰণি জনাই বৰুৱাই কয় যে এই মন্ত্ৰী গোটে ২০০১ চনৰ পৰা তদন্ত কৰিব লাগে বুলি বৰদলৈয়ে কওক।
লগতে পঢ়ক– খেতিয়কৰ পৰাও কমিছন খায় চিণ্ডিকেটৰ মহানায়ক অখিল গগৈয়ে
“তেতিয়াহে প্ৰকৃততে জোলোঙাৰ মেকুৰী কি সেই কথা ওলাই পৰিব,” বৰুৱাই কয়।
আনহাতে, বৰদলৈয়ে অবৈধ কয়লাৰ ধন এন এছ চি এনলৈ যায় বোলা প্ৰসংগত বৰুৱাই কয়, “তেওঁৰ দিনত এন এছ চি এন, আলফা বা সন্ত্ৰাসবাদী সংগঠনক টকা-পইচা দিছিল। সেই পৰম্পৰা আজিও চলি আছে বুলি তেওঁ ভাবিছে। তেওঁ মাৰ্ঘেৰিটাত চলাই অহা পৰম্পৰা আজি নাই।”
“ইতিমধ্যে গুৱাহাটী উচ্চ ন্যায়ালয়ে কয়লা চিণ্ডিকেটৰ ওপৰত নিজাববীয়াকৈ এটা গোচৰ লৈছে। বৰদলৈৰ হাতত যদি কিবা তথ্য আছে তেওঁ ন্যায়ালয়ত দাখিল কৰক, আমি তাত স্বাগতম জনাম। কিন্তু ৰাজনৈতিক মুনাফা ল’বৰ বাবে যি কাৰবাৰ আৰম্ভ কৰিছে সেইবিলাক বাদ দিব লাগে,” বিজেপিৰ ৰাজ্যিক মুখপাত্ৰগৰাকীৰ মন্তব্য।
আনহাতে, উক্ত সংবাদমেলত উপস্থিত থাকি বিজেপিৰ আন এগৰাকী ৰাজ্যিক মুখপাত্ৰ পবিত্ৰ মাৰ্ঘেৰিটাই দাবী কৰে যে “কয়লাৰ খনিত ৮০ জন লোকৰ মৃত্যু হোৱা” বুলি বৰদলৈয়ে অনা অভিযোগ মিছা।
“তেওঁ এই তথ্য দাঙি অসমৰ ৰাইজক বিপথে পৰিচালনা কৰিছে। যদি তেওঁৰ হাতত ৮০ জন লোকৰ কয়লাখনিত মৃত্যু হোৱাৰ তথ্য আছে তেন্তে জিলা প্ৰশাসন বা উচ্চ ন্যায়ালয়ত নাম-তথ্য সহকাৰে দাখিল কৰক। মাৰ্ঘেৰিটাৰ এগৰাকী স্থানীয় যুৱক হিচাপে কওঁ, আমি দেখি আহিছিলো যে ধন আৰু বাহুবলৰে মাৰ্ঘেৰিটাত বৰদলৈয়ে ১০-১২ বছৰ চিণ্ডিকেট চলাই আহিছিল। আমাৰ চৰকাৰ অহাৰ লগে লগে সেই চিণ্ডিকেট যেতিয়া সম্পূৰ্ণৰূপে বন্ধ কৰি দিয়া হ’ল তেওঁ আৰু তেওঁৰ চেলা-চামুণ্ডাসকল এতিয়া সম্পূৰ্ণৰূপে মানসিক ভাৰসাম্য হেৰুৱাই ওলোটাই চোৰে চকীদাৰক গালি পৰা আৰম্ভ কৰিছে,” পবিত্ৰ মাৰ্ঘেৰিটাই কয়।
