গণৰাজ্য দিৱসৰ লগত সংগতি ৰাখি খানাপাৰাৰ পশু চিকিৎসা মহাবিদ্যালয়ৰ খেলপথাৰত ৰাজ্যিক ভিত্তিত আয়োজন কৰা ‘গণতন্ত্ৰ দিৱস সাংবাদিকতা বঁটা’ প্ৰদান অনুষ্ঠানত মুখ্য মন্ত্ৰী সৰ্বানন্দ সোণোৱাল আৰু ৰাজ্যপাল জগদীশ মুখী উপস্থিত থাকে।
উক্ত অনুষ্ঠাতে মুখ্য মন্ত্ৰী সৰ্বানন্দ সোণোৱালে অসম সাহিত্য সভাৰ প্ৰাক্তন সভাপতি তথা দৈনিক অগ্ৰদূত কাকতৰ মুখ্য সম্পাদক কনকসেন ডেকাক ‘গণতন্ত্ৰ দিৱস সাংবাদিকতা বঁটা’ প্ৰদান কৰে।
উল্লেখযোগ্য যে ডেকা হৈছে ‘গণতন্ত্ৰ দিৱস সাংবাদিকতা বঁটা’ লাভ কৰা দ্বিতীয়জন ব্যক্তি।
তথ্য আৰু জনসংযোগ বিভাগৰ দ্বাৰা প্ৰদান কৰি অহা ‘গণতন্ত্ৰ দিৱস সাংবাদিকতা বঁটা’ সাংবাদিকতাৰ ক্ষেত্ৰত বিশিষ্ট অৱদান আগবঢ়াই অহা লোক সকলক সন্মানিত কৰাৰ উদ্দেশ্যে প্ৰদান কৰি অহা হৈছে।
ইয়াৰ পিছতে মুখ্য মন্ত্ৰী গৰাকীয়ে গণৰাজ্য দিৱস উপলক্ষে শ্ৰদ্ধাঞ্জলি কাননৰ গণৰাজ্য দিৱস উদযাপন অনুষ্ঠানত উপস্থিত হয়।
শ্ৰদ্ধাঞ্জলি কাননত উপস্থিত হৈ মুখ্য মন্ত্ৰী গৰাকীয়ে ভাৰতৰ স্বাধীনতা সংগ্ৰামত চহিদ হোৱা সকলক ফুল অৰ্পন কৰি শ্ৰদ্ধাঞ্জলি জ্ঞাপন কৰাৰ লগতে তেওঁলোকৰ হৈ প্ৰাৰ্থনা জনায়।
ডিব্ৰুগড়, অভিক চক্ৰবৰ্তী :
ৰাজ্যৰ বিভিন্ন প্ৰান্তত গণৰাজ্য দিৱস উদযাপন কৰাৰ সমান্তৰালভাৱে আজি ডিব্ৰুগড়তো ৬৯ সংখ্যক গণৰাজ্য দিৱস উপলক্ষে প্ৰভাত ফেৰি উলিওৱা হয়।
দেশপ্ৰেমমূলক গীত আৰু জাতীয় পতাকাৰ তিনি ৰঙেৰে সজোৱা এই গণৰাজ্য দিৱস উপলক্ষে উলিওৱা প্ৰভাত ফেৰিয়ে চহৰখনৰ বিভিন্ন স্থানত ভ্ৰমণ কৰে।
জিলা সূচনা, জনসম্পৰ্কৰক্ষী বিষয়া, জিলা পৰিবহণ বিষয়া, কেন্দ্ৰীয় চৰকাৰৰ দুটা বিভাগ, নেহৰু যুৱ কেন্দ্ৰ আৰু ক্ষেত্ৰ প্ৰচাৰ সঞ্চালকালয়ৰ যৌথ উদ্যোগত এই কাৰ্যসূচী গ্ৰহণ কৰা হয়।
নেহৰু যুৱ কেন্দ্ৰৰ বেদব্ৰত ভূঞা ক্ষেত্ৰ প্ৰচাৰ বিষয়া প্ৰণৱ কুমাৰ নাথৰ, তথ্য আৰু জিলা জনসংযোগ বিভাগ আৰু নেহৰু যুৱ কেন্দ্ৰৰ স্বেচ্ছাসেৱক সকলে প্ৰভাত ফেৰিটোত অংশ গ্ৰহণ কৰে।
জিলা উপায়ুক্ত লয়া মাদুৰীয়ে চৌকিডিঙীৰ খেলপথাৰত পতাকা উত্তোলন কৰে।
মঙলদৈ, ময়ুখ গোস্বামী :
ইফালে মঙলদৈৰ জিলা কাৰাগাৰত কয়দী সকলৰ সহযোগত আজি ৬৯ সংখ্যক গণৰাজ্য দিৱস উদযাপন কৰা হয়।
কাৰাগাৰখনৰ জেষ্ঠ্য কয়দী আৰু জাৱজ্জীৱন কাৰাদণ্ড প্ৰাপ্ত ৰাম নাথে কাৰাগাৰ অধীক্ষক অশোক কুমাৰ গোস্বামীৰ উপস্থিতিত পতাকা উত্তোলন কৰে।
এই গণৰাজ্য দিৱস উদযাপন কাৰ্যসূচীত কাৰাধক্ষ্য মুনিন্দ্ৰ চন্দ্ৰ শৰ্মা, কাৰাগাৰৰ অন্যান্য বিষয়াসকলৰ লগতে ১৮০ জন কয়দী উপস্থিত থাকে।
আনহাতে কয়দী সকলে আজিৰ অনুষ্ঠানটোত এক সংগীতানুষ্ঠানৰ আয়োজন কৰে।
