অসমৰ বানাক্ৰান্ত ৰাইজৰ বাবে কেন্দ্রৰপৰা পাপ্য পুঁজি আৰু সাহায্য বিচাৰি নতুন দিল্লীৰ সাংসদ ভৱনৰ চৌহদত অসমৰ সাংসদসকলে আজি পুৱা ১০.৩০ বজাত এক ধৰ্ণা কায্যসূচী গ্ৰহণ কৰে।
মন কৰিবলগীয়া যে ভয়াৱহ প্ৰলয়ংকাৰী বানে অসমলৈ হাহাকাৰ নমাই অনাৰ পিছতো বৰ্তমানলৈকে কেন্দ্ৰীয় চৰকাৰে নিৰ্বিকাৰ ভূমিকা পালন কৰি আছে। গতিকে আজি কেন্দ্ৰৰ পৰা প্ৰাপ্য পুঁজি আৰু বান সাহায্য বিচাৰি অসমৰ কংগ্ৰেছ সাংসদসকলে ধৰ্ণা কাৰ্যসূচী ৰূপায়ণ কৰে।
এই ধৰ্ণা কাৰ্যসূচীত ৰিপুন বৰা, সাংসদ ভূৱনেশ্বৰ কলিতা, সঞ্জয় সিং, প্ৰদ্যুত বৰদলৈ, আব্দুল খালেক আৰু ৰাণী নৰহে।
তাৰোপৰি অসম প্ৰদেশ কংগ্ৰেছৰ সভাপতি ৰিপুন বৰাই ৰাজ্যসভাতো অসমৰ বানপানীৰ সমস্যাৰ কথা উল্লেখ কৰে। ৰিপুন বৰাই ৰাজ্যসভাত উল্লেখ কৰি কয় যে অসম চৰকাৰে বন্যাৰ্তসকলক উদ্ধাৰ কৰা তথা বান সমস্যা সমাধান কৰাত সম্পূৰ্ণ ৰূপে ব্যৰ্থ হৈছে।
গতিকে বৰাই এই ক্ষেত্ৰত কেন্দ্ৰীয় চৰকাৰৰ তৰফৰ পৰা এটা বিশেষ দল অসমত উপস্থিত হৈ অসম চৰকাৰক গাইড দিয়াৰ বাবে দাবী জনাইছে যাতে অসম চৰকাৰে বানপীড়িত সকলক সহায় কৰিব পাৰে।
ৰিপুন বৰাই কেন্দ্ৰীয় চৰকাৰক তাৎক্ষণিকভাৱে বান সাহায্য মকুলি কৰি দিয়াৰো দাবী জনাইছে। লগতে অসমৰ বানপানীৰ সমস্যাক ৰাষ্ট্ৰীয় সমস্যা হিচাপে স্বীকৃতি দিয়াৰ দাবী জনাইছে।
তাৰোপৰি বৰাই কেন্দ্ৰৰ ফালৰ পৰা কোনো দায়িত্বশীল মন্ত্ৰী অসমত উপস্থিত হৈ অসমৰ বানপানীৰ সমস্যা তথা পৰিস্থিতিৰ বুজ ল’বৰ বাবে দাবী জনাইছে।
