যোৰহাটৰ টীয়ক চাহ বাগিচাত শনিবাৰে শ্ৰমিকে এগৰাকী জ্যেষ্ঠ চিকিৎসকক আক্ৰমণ কৰাৰ ফলত চিকিৎসকগৰাকীৰ মৃত্যু হয়।
শ্ৰমিকৰ আক্ৰমণত গুৰুতৰভাৱে আহত চিকিৎসকজনে যোৰহাট চিকিৎসা মহাবিদ্যালয় হাস্পাতলত শেষ নিশ্বাস ত্যাগ কৰে।
শ্ৰমিকসকলে ৭৩ বছৰীয়া আৱাসিক চিকিৎসক ড০ দেৱেন দত্তক কৰ্তব্যত অনুপস্থিত থকাৰ তথা টীয়ক চাহ বাগিচাৰ এগৰাকী অস্থায়ী শ্ৰমিকৰ মৃত্যুৰ বাবে দায়ী বুলি অভিযোগ তুলি নৃশংসভাৱে প্ৰহাৰ কৰে।
যোৰহাট চহৰৰ পৰা প্ৰায় ২২ কিলোমিটাৰ দূৰত টীয়ক আৰক্ষী থানাৰ অন্তৰ্গত এই টীয়ক চাহ বাগিচা।
এক সূত্ৰই জানিব দিয়ে যে বাগিচাৰ ১২ নং লাইনত বাস কৰা এগৰাকী অস্থায়ী শ্ৰমিক ৩৩ বছৰীয়া সুক্ৰা মাঝিক আত্মীয়সকলে বাগিচাখনৰ ভিতৰত থকা হাস্পাতলখনলৈ শনিবাৰে দুপৰীয়া প্ৰায় ১২ বজাত সংকটজনক অৱস্থাত লৈ আনে।
‘’কিন্তু সেই সময়ত ড০ দত্ত হাস্পাতলখনত উপস্থিত নাছিল আৰু ফাৰ্মাচিষ্ট গৰাকীও ছুটীত আছিল। কৰ্তব্যত থকা নাৰ্ছে এটা চেলাইন যদিও শ্ৰমিকজনৰ মৃত্য হয়। ফলত বাগিচাখনৰ শ্ৰমিকসকল উত্তেজিত হৈ পৰে,’’-সূত্ৰটোৱে কয়।
‘’ড০ দত্তই যেতিয়া প্ৰায় ৩.৩০ বজাত উপস্থিত হয়, তেওঁক নৃশংসভাৱে প্ৰহাৰ কৰাৰ লগতে হাস্পাতলখনৰ এটা কোঠাত বন্দী কৰি ৰাখে,’’-সূত্ৰটোৱে জানিবলৈ দিয়ে।
সূত্ৰটোৱে লগতে জানিবলৈ দিয়ে যে হাস্পাতলখনৰ কাষতে থকা চাহ বাগিচাখনৰ কল্যাণ বিষয়া জীৱন কুৰ্মীয়ে চিকিৎসকগৰাকীক উদ্ধাৰ কৰিবলৈ চেষ্টা কৰে যদিও শ্ৰমিকসকলে তেওঁকো প্ৰহাৰ কৰে।
প্ৰায় ৫ বজাত টীয়ক আৰক্ষী থানাৰ পৰা আৰক্ষী তথা চি আৰ পি এফ বাহিনীৰ লোকে আহি চিকিৎসকগৰাকীক উদ্ধাৰ কৰে আৰু যোৰহাট চিকিৎসা মহাবিদ্যালয় হাস্পাতললে প্ৰেৰণ কৰে যদিও তাত তেওঁৰ মৃত্যু হয়।
উল্লেখযোগ্য যে ড০ দত্তই বহুদিন আগেয়ে অৱসৰ গ্ৰহণ কৰিছিল যদিও চাকৰিকাল বৃদ্ধিৰ যোগেদি সেৱা আগবঢ়াই আহিছিল।
তেওঁৰ ঘৰ আছিল টীয়কৰ পৰা মাত্ৰ কেই কিলোমিটাৰমান আঁতৰৰ জগদুৱাৰত।
টীয়ক আৰক্ষী থানাৰ ভাৰপ্ৰাপ্ত বিষয়া দীপাংকৰ গগৈয়ে এই সন্দৰ্ভত এটা গোচৰ ৰুজু কৰাৰ কথা জানিব দিয়ে।
যোৰহাটৰ উপায়ুক্ত ৰশ্নি এ কোৰাটিয়ে কয় যে চিকিৎকগৰাকীক দণ্ডাধীশ আৰু আৰক্ষীয়ে উদ্ধাৰ কৰিছিল।
‘’তেওঁক ততাতয়াকৈ যোৰহাট চিকিৎসা মহাবিদ্যালয় হাস্পাতললৈ প্ৰেৰণ কৰা হৈছিল যদিও দুৰ্ভাগ্যজনকভাৱে ড০ দেৱেন দত্তই চিকিৎসাধীন অৱস্থাতে শেষ নিশ্বাস ত্যাগ কৰে,’’-তেওঁ কয়।
কোৰাটিয়ে এক দণ্ডাধীশ পৰ্যায়ৰ তদন্তৰ নিৰ্দেশ দিয়া বুলি জানিব দিয়ে।
অতিৰিক্ত উপায়ুক্ত সুভান গোৱালাই তদন্তৰ দায়িত্ব দিয়া হৈছে আৰু ৭ দিনৰ ভিতৰত প্ৰতিবেদন দাখিল কৰিবলৈ কোৱা হৈছে।
