সোমবাৰে শিৱসাগৰ মহাবিদ্যালয়ত অনুষ্ঠিত ছাত্ৰ একতা সভাৰ নিৰ্বাচনত আছুৰ হাতত ধৰাশায়ী হয় অখিল ভাৰতীয় বিদ্যাৰ্থী পৰিষদ।
মহাবিদ্যালয়ৰ ছাত্ৰ একতা সভাৰ এঘাৰটা পদত অনুষ্ঠিত নিৰ্বাচনত এঘাৰটা পদেই দখল কৰে আছুৰ সমৰ্থিত প্ৰাৰ্থীয়ে।
ছাত্ৰ একতা সভাৰ নিৰ্বাচনটোত আছুৰ সমৰ্থিত প্ৰাৰ্থীক এক প্ৰকাৰ প্ৰত্যাহ্বান জনোৱা বিজেপি দলৰ ভাতৃ সংগঠন অখিল ভাৰতীয় বিদ্যাৰ্থী পৰিষদৰ সমৰ্থিত এজন প্ৰাৰ্থীও বিজয়ী হব নোৱাৰিলে।
মহাবিদ্যালয়ৰ ছাত্ৰ একতা সভাত নিৰ্বাচিত প্ৰাৰ্থীসকলৰ ভিতৰত সভাপতি পদত প্ৰাণজিৎ বৰা, উপ সভাপতি চিৰঞ্জীৱ বৰা, সাধাৰণ সম্পাদক চাৰুহ আলম শইকীয়া, সহকাৰী সাধাৰণ সম্পাদক অংকিতা গগৈ, সমাজসেৱা ইমন ফুকন, তৰ্ক আৰু কুইজ প্ৰিয়ংকা পাপৰি হাজৰিকা নিৰ্বাচিত হয়।
সেইদৰে সাহিত্য আৰু আলোচনী বিভাগত চান্দিনী বৰা, কলা আৰু সংগীত সৌৰভ শেখৰ চাহু, ছাত্ৰ জিৰণি কোঠা সুৰজ গগৈ, গুৰু ক্ৰীড়া বিভাগ স্বপ্নীল দুৱাৰা, বেডমিন্টনত গৌতম গগৈ, শৰীৰ চৰ্চাত প্ৰাণদ্বীপ দত্ত, ভলীবল সৌৰভ জ্যোতি কলিতা, ছাত্ৰী জিৰণি কোঠা জ্যোতিকা য়েইন আৰু শ্ৰেণী প্ৰতিনিধি কাব্যশ্ৰী বৰদলৈ বিজয়ী হয়।
বিজয়ী আছুৰ সমৰ্থিত ছাত্ৰ-ছাত্ৰী সকলক মহাবিদ্যালয়ৰ পৰা সমদল কৰি চহৰৰ বৰ্ডিং ৰোডৰ আছুৰ শিৱসাগৰ জিলাৰ কাৰ্যালয়ত উপস্থিত হোৱাৰ পাছত অভিনন্দন জনোৱা হয়।
এই বিজয় সন্দৰ্ভত শিৱসাগৰ জিলা ছাত্ৰ সন্থাৰ সাধাৰণ সম্পাদক সমীৰণ ফুকনে কয় যে, শিৱসাগৰ মহাবিদ্যালয়ৰ ছাত্ৰ একতা সভা নিৰ্বাচনত বিজেপিৰ ভাতৃ সংগঠন এভিবিপিৰ সমৰ্থিত প্ৰাৰ্থী এজনো জয়ী হব নোৱাৰিলে।
তেওঁ কয় যে ইয়াৰ দ্বাৰা এইটো প্ৰমাণ হয় যে শিৱসাগৰ মহাবিদ্যালয়ৰ ছাত্ৰ সমাজ বৰ্তমানৰ চৰকাৰৰ কামকাজ তথা নীতিক সমৰ্থন নকৰে। সেইবাবে আছুক সমৰ্থন কৰিছে।
তেওঁ বিজয়ী প্ৰাৰ্থী সকলক অভিনন্দন জনোৱাৰ লগতে ভৱিষ্যতে ছাত্ৰ সমাজৰ হকে কাম কৰি যাবলৈ আহ্বান জনায়।
আনহাতে সোমবাৰে অনুষ্ঠিত সোণাৰী মহাবিদ্যালয়ৰ ছাত্ৰ একতা সভা নিৰ্বাচনত আছু সমৰ্থিত চৈধ্যগৰাকী প্ৰাৰ্থী বিজয়ী হয়।
