শিৱসাগৰ প্ৰেছ ক্লাৱত অনুষ্ঠিত এখন সংবাদমেলত ২৬ টা সংগঠনৰ যৌথ সংগ্ৰামী মঞ্চৰ নেতৃত্বই সোমবাৰে শিৱসাগৰৰ ঐতিহাসিক গেলেকী তৈল ক্ষেত্ৰ বহুজাতিক কোম্পানীৰ হাতত গোটোৱা চক্ৰান্তৰ বাবে অ’ এন জি চিক সকীয়নি প্ৰদান কৰে।
সংগ্ৰামী মঞ্চয় অ’ এন জি চিকে ধৰি বহুজাতিক কোম্পানীত এশ শতাংশ থলুৱা নিযুক্তি নিশ্চিত কৰাৰ বাবেও দাবী তোলাৰ লগতে প্ৰতিষ্ঠানটোৰ অসম বিৰোধী প্ৰৱণতাৰ বিৰুদ্ধে তীব্ৰ ক্ষোভ প্ৰকাশ কৰে।
তদুপৰি, অ’ এন জি চিৰ অসম সম্পদৰ কাৰ্য্যালয় যোৰহাটলৈ স্থানান্তৰণৰ ষড়যন্ত্ৰৰ বিৰুদ্ধে সংবাদমেলখনত তীব্ৰ অসন্তষ্টি ব্যক্ত কৰে সংগ্ৰামী মঞ্চৰ বিষয়ববীয়াসকলে।
শিৱসাগৰৰ ভূগৰ্ভ খনন কৰি ১০০ কৈ অধিক তৈলখাদৰ পৰা সম্পদ আহৰণ কৰি থকা অৱস্থাত যোৰহাটলৈ কাৰ্য্যালয় স্থানান্তৰ কৰিলে অ’ এন জি চি বন্ধৰ দৰে কাৰ্য্যসূচী গ্ৰহণ কৰিবলৈ সংগ্ৰামী মঞ্চ বাধ্য হ’ব বুলি হুংকাৰ দিয়াৰ লগতে অ’ এন জিক নিজৰ স্থিতি স্পষ্ট কৰাৰ বাবে দহ দিনৰ সময়সীমা বান্ধি দিয়ে।
আনহাতে, সংবাদ মেলত মুখ্য মন্ত্ৰী সৰ্বানন্দ সোণোৱালে প্ৰতিশ্ৰুতি প্ৰদানৰ ২ মাহ উকলি যোৱাৰ পাছতো শিৱসাগৰৰ ঐতিহাসিক কীৰ্তিচিহ্নসমূহ বেদখল মুক্ত নকৰাৰ প্ৰতিবাদত সংগ্ৰামী মঞ্চয় ১১ ছেপ্তেম্বৰত উপায়ুক্ত কাৰ্য্যালয় ঘেৰাও কাৰ্য্যসূচী ঘোষণা কৰে।
উল্লেখযোগ্য যে, হাঁহচৰা উচ্চ মাধ্যমিক বিদ্যালয়ৰ শিক্ষক বিভূতি মহন্তৰ ছাত্ৰী নিৰ্যাতনৰ ঘটনাৰো নিৰপেক্ষ তদন্তৰ দাবী জনায় সংগ্ৰামী মঞ্চৰ প্ৰতিনিধিসকলে।
ৰাজ্য চৰকাৰ আৰু শিৱসাগৰ জিলা প্ৰশাসনে শিক্ষকগৰাকীৰ বিৰুদ্ধে শাস্তিমূলক ব্যৱস্থা হাতত নললে তীব্ৰ আন্দোলনৰ ভাবুকি দিয়ে সংগঠনটোৱে।
