ঠিকাদাৰক ধন দাবী কৰি সদৌ অসম ছাত্ৰ সন্থাৰ গৰিমা ম্লান কৰা সংগঠনটোৰ নেতাকেইজনৰ বিৰুদ্ধে তদন্ত কৰিব আছুৱে। এই কথা জনাইছে আছুৰ সাধাৰণ সম্পাদক লুৰিণজ্যোতি গগৈয়ে।
আনহাতে ঠিকাদাৰজনে ৰুজু কৰা গোচৰত ধন দাবী কৰা নেতাকেইজনক গোলাঘাট সদৰ থানালৈ তলব কৰা বুলি জানিব পৰা গৈছে।
এটা সূত্ৰই জনোৱা মতে, আছুৰ নেতাকেইজন আজি থানাত উপস্থিত হয়।
আছুৰ কেন্দ্ৰীয় মুখ্য সাংগঠনিক সম্পাদক ৰাজু ফুকন আৰু গোলাঘাট জিলা ছাত্ৰ সন্থাৰ সাধাৰণ সম্পাদক প্ৰিন্স দলেই টেলিফোনত এজন ঠিকাদাৰক বৃহৎ পৰিমাণৰ ধন দাবী কৰা অডিঅ’টোসহ বাতৰি প্ৰকাশ পাইছিল নৰ্থ-ইষ্ট নাওত।
অডিঅ’টোত থকা কথা-বাৰ্তাত আছুৰ নেতাকেইজনে ভূপেন হাজৰিকাৰ মৃত্যু বাৰ্ষিকী অনুষ্ঠিত কৰাৰ বাবে ৫০ হাজাৰ টকা বিচৰাটো স্পষ্ট হয়।
ঠিকাদাৰজন আছিল ফকৰুদ্দিন আলী আহমেদ ফাণ্ডৰ ঠিকাদাৰ চাহানুৰ আহমেদ আৰু তেওঁ নুমলীগড় তেল শোধানাগাৰত ৫ কোটি টকাৰ এটা ঠিকা কাম লোৱা বুলি দুয়ো পক্ষৰ কথা-বাৰ্তাৰ পৰা জানিব পাৰি।
বাৰ্তালাপৰ অডিঅ’টো ইতিমধ্যে ছ’চিয়েল মেডিয়াতো ভাইৰেল হৈ পৰিছে।
ঘটনাটো সন্দৰ্ভত আজি নৰ্থ-ইষ্ট নাওৰ পৰা সদৌ অসম ছাত্ৰ সন্থাৰ সাধাৰণ সম্পাদক লুৰিণজ্যোতি গগৈক যোগাযোগ কৰাত তেওঁ ঘটনাটোৰ তদন্ত কৰিবলৈ এখন তদন্ত কমিটী গঠন কৰাৰ কথা জনায়।
“তদন্ত কৰিবলৈ দিয়া হৈছে। আমি কথা পাতিব দিছো। কোন কোন আছে, কি কথা কি বতৰা সেই সকলোখিনি চোৱা হ’ব। তদন্ত কমিটী বনাই দিয়া হৈছে, তেওঁলোক তদন্ত কৰিবলৈ যাব।” কমিটীখন অভ্যন্তৰীণভাৱে গঠন কৰা হৈছে বাবে ইয়াৰ সদস্যসকলৰ নাম প্ৰকাশৰ অপাৰগতা প্ৰকাশ কৰি গগৈয়ে কয়।
ঠিকাদাৰ চাহানুৰে গোলাঘাট সদৰ থানাত যোৱা ৪ নৱেম্বৰৰ দিনা মেইলযোগে এজাহাৰ দাখিল কৰিছিল।
তেওঁ এজাহাৰখনত গোলাঘাট জিলা ছাত্ৰ সন্থাৰ সাধাৰণ সম্পাদক প্ৰিন্স দলে আৰু আঞ্চলিকৰ সাধাৰণ সম্পাদক চম্পক বৰাৰ বিৰুদ্ধে ফোনযোগে ধন দাবী কৰাৰ অভিযোগ তুলিছিল।
এজাহাৰৰ ভিত্তিত গোলাঘাট আৰক্ষীয়ে ১১ নবেম্বৰত ভাৰতীয় দণ্ডবিধিৰ ৩৮৫ ধাৰাত ১১১২/১৯ নম্বৰত গোচৰ পঞ্জীয়ন কৰা বুলি জানিব পৰা গৈছে।
গোলাঘাট আৰক্ষীয়ে জনায় যে তেওঁলোকে সমগ্ৰ ঘটনা সন্দৰ্ভত তদন্ত আৰম্ভ কৰি আছে।
আনহাতে, চাহানুৰে গোচৰ ৰুজু কৰাৰ পাছতে তেওঁক কোনো অচিনাক্ত যুৱকে গোচৰটো উঠাই ল’বলৈ ভাবুকি দিয়া বুলি গুৰুতৰ অভিযোগ আনিছে। ১৩ নৱেম্বৰত ১০-১২ জনীয়া অচিনাকি যুৱকৰ এটা দলে দিনৰ ভাগতে তেওঁক আগুচি ধৰি গোচৰটো উঠাই ল’বলৈ ভাবুকি দিছিল, চাহানুৰৰ অভিযোগ।
ইপিনে গোচৰ দিলেও আছুক “ভাল পাওঁ” বুলি মন্তব্য কৰি এই গোচৰ ব্যক্তি বিশেষৰ বিৰুদ্ধেহে, আছুৰ বিৰুদ্ধে নহয় বুলি কয় গোচৰীয়া চাহানুৰে।
