কাইলৈ মুক্তি পাব এই বৰ্ষৰ আটাইতকৈ চৰ্চিত ছবি ‘আমিষ’

কাইলৈ অৰ্থাৎ ২২ নৱেম্বৰত মুক্তি লাভ কৰিব বহু প্ৰতিক্ষিত অসমীয়া চলচ্চিত্ৰ ‘আমিষ’। অসমৰ ছবিগৃহসমূহৰ লগতে শ্বিলং, মুম্বাই, কলকাতা, দিল্লী, বাংগালুৰ আৰু পুনেত ছবিখনে মুক্তি পাব।

এটা ব্যতিক্ৰমী প্ৰেম কাহিনীক লৈ নিৰ্মাণ কৰা চিনেমাখনে ইতিমধ্যে দেশ-বিদেশৰ বিভিন্ন চলচ্চিত্ৰ মহোৎসৱত চলচ্চিত্ৰ সমালোচক আৰু দৰ্শকৰ পৰা বিপুল সহাৰি লাভ কৰিছে।

এগৰাকী চিকিৎসকৰ পত্নীৰ অকলশৰীয়া জীৱন কাহিনী আৰু এগৰাকী গৱেষক ছাত্ৰৰ মাজত বিভিন্ন প্ৰকাৰৰ খাদ্যৰ জুতিৰ মাজেৰে গঢ়ি উঠা আত্মীয়তাকলৈ ‘আমিষ’ৰ কাহিনীভাগ আগবাঢ়ে।

বলিউডৰ যসশী পৰিচালক অনুৰাগ কাশ্যপে ছবিখনক ভূয়সী প্ৰশংসা কৰি কৈছিল, “Trust me, you have not seen anything like ‘Aamis’ coming out of India”।

ইণ্ডিয়া টুডেৰ মতে, “That one Indian film to see this year”।

ভাস্কৰ হাজৰিকাৰ চিত্ৰনাট্য আৰু পৰিচালনাৰে নিৰ্মাণ কৰা ‘আমিষ’ত অৰ্ঘ্যদ্বীপ বৰুৱা, লিমা দাস, নেতালী দাস, মানস দাস আৰু সাগৰ সৌৰভ বৰুৱা আদি অভিনেতাই অভিনয় কৰিছে। চলচ্চিত্ৰখনৰ প্ৰযোজনা পুনম দেউল আৰু শ্যাম বৰাৰ।

ভাস্কৰ হাজৰিকাৰ এইখন দ্বিতীয়খন পূৰ্ণ্য দৈঘ্যৰ চলচ্চিত্ৰ, ইয়াৰ পূৰ্বে তেওঁ লক্ষ্মীনাথ বেজবৰুৱাৰ ‘বুঢ়ী আইৰ সাধু’ত থকা দুটা সাধুৰ আধাৰত তেওঁৰ প্ৰথমখন চলচ্চিত্ৰ ‘কথানদী’ নিৰ্মাণ কৰিছিল।