অৱশেষত গভীৰ নিদ্ৰাৰ পৰা সাৰ পালে ৰাজ্যখনৰ জাতীয় জীৱনৰ পৰিচয় বহন কৰা অন্যতম সাহিত্যৰ অনুষ্ঠান অসম সাহিত্য সভাই।
নাগৰিকত্ব সংশোধনী বিধেয়কৰ বিৰুদ্ধে মৌনতা অৱলম্বন কৰা বুলি বহ সমালোচনাৰ সন্মুখীন হোৱা অসম সাহিত্য সভাই শুকুৰবাৰে ৰাজপথলৈ ওলাই আহে।
সাহিত্য সভাৰ সদস্যসকলে নাগৰিকত্ব সংশোধনী বিধেয়কৰ বিৰুদ্ধে যোৰহাটত দুঘন্টীয়া অৱস্থান ধৰ্মঘট পালন কৰে।
সভাই লগতে যোৰহাটৰ উপায়ুক্তৰ কাৰ্যালয়ৰ জৰিয়তে প্ৰধান মন্ত্ৰীলৈ এখন স্মাৰক পত্ৰও প্ৰেৰণ কৰে।
অসম সাহিত্য সভাই স্মাৰক পত্ৰখনত কয় যে নাগৰিকত্ব সংশোধনী বিধেয়কে খিলঞ্জীয়া লোকসকলক নিজৰ ভূমিতে সংখ্যালঘুত পৰিণত কৰিব আৰু সেয়েহে বিধেয়কখন বাতিল কৰিব লাগে।
ইপিনে, সদৌ অসম চুতীয়া ছাত্ৰ সন্থাৰ সৈতে সদৌ অসম ছাত্ৰ সন্থাৰ সদস্যসকলে ৫৭ নং ৰাষ্ট্ৰীয় ঘাইপথ অৱৰোধ কৰে।
ছাত্ৰসকলে লগতে প্ৰধান মন্ত্ৰী নৰেন্দ্ৰ মোদী, কেন্দ্ৰীয় গৃহ মন্ত্ৰী অমিত শ্বাহ আৰু মুখ্য মন্ত্ৰী সৰ্বানন্দ সোমোৱাল প্ৰতিকৃতিও দাহ কৰে।
আনহাতে, কংগ্ৰেছৰ সদস্যসকলে উপায়ুক্ত কাৰ্যালয়ৰ চৌহদত ৰাতিপুৱা ৮বজাৰ পৰা বিয়লি ৩ বজালৈ বিধেয়কখনৰ বিৰুদ্ধে অনশন কাৰ্যসূচী ৰূপায়ন কৰে।
ইপিনে, আছুৰ যোৰহাট গোটে আন সংগঠনৰ সৈতে লগ লাগি এক প্ৰতিবাদী সমদল উলিয়ায় আৰু উপায়ুক্ত কাৰ্যালয়ৰ চৌহদৰ সন্মুখত অৱস্থান ধৰ্মঘট পালন কৰে।
তদুপৰি, যোৰহাট প্ৰেছ ক্লাবৰ সদস্যসকলেও বিতৰ্কিত বিধেয়কখনৰ বিৰুদ্ধে এক প্ৰতিবাদী সমদল উলিয়াই নিজৰ ৰাজ্যখনতে খিলঞ্জীয়া অসমীয়াক সংখ্যালঘু কৰি তোলাৰ কেন্দ্ৰৰ ষড়যন্ত্ৰৰ বিৰুদ্ধে সকলোকে ওলাই আহিবলৈ আহ্বান জনায়।
